大肚姚樂怡 急救皮膚敏感
樂怡推戲專心養胎，但整個懷孕過程毫不輕鬆，懷孕初期身體嚴重皮膚敏感、生痱滋、流鼻血、失眠等問題接踵而來，全靠一班圈中好姊妹的幫忙，最後也一一捱過，尤其是一齊大肚的湯盈盈和鍾麗淇（Margaret），三位媽咪排隊生女互相打氣。盈盈三個月前率先誕下細女Kassidy；Margaret亦於上月「光棍節」再誕一女Michela；最後的樂怡現已懷孕九個月，預產期明年1月1日，有機會做元旦B女。
圈中「媽咪級」姊妹多
娛圈近年旺丁，一班女星輪住大肚生B，出名好姊妹的湯盈盈、鍾麗淇、周家蔚（Janet）、文頌嫻（文女）及姚樂怡等人，個個由電視小花變媽媽，由講事業變餵奶換片，一直互相扶持。最難得今年盈盈、Margaret和樂怡同期大肚，經常聚會玩挺肚合照，又結伴shopping買BB用品，非常難得，樂怡慶幸自己首次懷孕有好友陪伴，一起分憂。
「我哋會成日問你幾多weeks呀？個肚咩size？BB有幾多磅？如果問番文女，當時你幾多周幾多磅，佢一定唔會記得。其實我係好好彩，喺呢班女仔入面我算係最遲有BB，變咗呢方面我有好多媽咪級前輩，可以分享番邊隻奶粉尿片好，佢哋乜都可以俾到經驗我。」
這班媽咪級姊妹團有個group chat，最近成了樂怡的發問基地，「我好似一個問題少女咁，乜都問，點解呢度有啲痛嘅？嗰度又脹喎，正唔正常㗎？佢哋叫我唔好咁緊張啦，係正常㗎，因為多咗個BB喺入面 ，大肚婆身體狀況會唔同，啲內臟迫咗去第二個位，所以身體感覺會唔同咗。」
湯盈盈送驗孕棒即中
好友陸續結婚生仔，樂怡一直都希望接棒做媽咪，自己努力之外，亦試試一些求B偏方，「我聽過一啲八卦嘢，如果我身邊朋友當時買咗兩支驗孕棒，其中一支驗到有，另外嗰支就會好lucky！」
樂怡告訴了盈盈有關傳聞，盈盈驗第二胎時，每次買驗孕棒都打孖上，「其實第一次盈盈話佢有咗時，我問佢買咗幾多支驗孕棒，另外一支俾我，跟住佢話冇呀，驗孕棒梗係買一支，跟住我就話俾佢聽單八卦嘢，佢今次真係幫我買多啲，我就係攞佢嗰支驗孕棒嚟驗，真係中咗，所以都要多謝盈盈每次都買兩支幫我儲定。」準媽咪或想生B的女士們，身邊有朋友都想生B，不妨試試。
胸肚紅腫痕癢難當
樂怡懷孕頭三個月，一點也不輕鬆，因胃氣脹吃不下、流鼻血、生飛滋，連過馬路都覺得疲倦，身體上多種變化一次過衝擊，令她感到好難捱。「飛滋生完一粒又一粒，啲位置好卑鄙，生喺脷底，根本講唔到、食唔到嘢，又唔可以用藥、用西瓜霜，只能用鹽水嗽口，好番一粒生第二粒，接住嚟等你冇好日子過。」
捱完飛滋到流鼻血，個鼻一直都好乾，索性塗一些花士令入鼻，居然有效！但最辛苦莫過於皮膚敏感，從沒有皮膚敏感的樂怡，懷孕後因荷爾蒙改變，或因塗了一些防妊娠紋油引起，令胸部至肚的位置出現紅色一撻撻，「我好似馬騮咁日日?，好似皮膚科醫生貼喺診所嗰啲相咁核突！」
神奇澳洲藥膏醫好
樂怡經歷了數星期的皮膚敏感搏鬥，更忍不住在診所爆喊，「我完全瞓唔到覺，睇咗兩個皮膚科醫生，都係俾啲安全嘅安眠藥我，同埋好低類固醇嘅藥膏俾我搽，低到初生嬰兒都搽得，但完全唔掂，第二次拎重少少，都唔得，第三次再加重，已經係孕婦可用嘅類固醇度數上限，我問醫生再唔得咁點算呀？佢話可能會痕到生，一聽到呢句即刻爆喊！你叫我痕多半年？點忍呀！」
每晚痕癢不堪難以入睡，又沒藥可塗，樂怡每晚用冰敷止痕，「我用幾塊冰袋敷個身，敷完呢度唔痕喇，就敷第二度，敷到我醒晒，唔痕再瞓番，瞓咗個幾鐘又痕過，再冰敷，一直循環落去，嗰個星期真係人都癲！」持續了兩個多星期後，樂怡與盈盈、Margaret一齊行BB展，其中一個檔位售賣澳洲醫院級防過敏藥膏，不含類固醇，樂怡決定一試，竟然奏效！「支藥膏只係百幾蚊，我睇一次專科都要成千蚊，第一晚用佢好瞓咗，之後就慢慢搽好咗！」
丈夫荷蘭長大拒怪獸學習
經 過最難捱的皮膚敏感，樂怡第五個月開始舒服陀B，更首次感覺到BB踢媽咪，「嗰次印象好深刻，係咪真㗎？因為之前feel到有啲嘢，周圍問啲姊妹BB踢媽 咪係點，盈盈話好似有隻蝴蝶喺入面飛，咁我又feel唔到有蝴蝶；Margaret就話好似有條羽毛撩你，咁我仲未feel到，原來之前啲感覺係假嘅，到 踏正20周就真係feel到有蝴蝶同羽毛，佢真係踢我喇，真係好興奮！到八個月我feel到佢喺入面游水呀！」
B女的名字仍在選取中，樂怡估計自己不會是嚴母，相信見到BB都會心軟，「我一定唔會係怪獸家長，迫佢學呢樣嗰樣。」學業方面應該會行輕鬆路線，因為丈夫 在荷蘭出世及當地接受教育，有個快樂的讀書生涯，希望小朋友亦一樣，「香港嗰種教育制度迫得小朋友好辛苦，佢係唔贊成嘅。」
預產期元旦日
預產期一日一日逼近，樂怡心情都好緊張，順產或開刀仍考慮中，「盈盈叫我順產啦，佢兩個都係順產，生完第二日已經好精靈行來行去，其他開刀嘅媽咪仲掩住個肚好辛苦咁；除咗佢之外，Margaret、Janet、文女全部都係開刀。我都好驚㗎，驚順產痛完一大輪，可能BB轉身唔好定點樣，最後都要開刀，我咪要痛兩次？」
如果決定開刀可能要提早，做不成元旦B，她和丈夫Alan都想元旦生，連負責接生的婦科醫生都是元旦出世，好有緣分。「1月1日好呀，聰明啲，好多元旦小朋友都好聰明㗎！」如果1月1日凌晨搶閘出世，即刻上新聞㖭呀！
