工作家庭難以平衡 森美：同家人相處嘅時間係追唔番
撰文：劉倬延
攝影：Jacy
場地提供：Oyster & Wine Bar
老婆話未搵夠
坊間傳聞，阿Bob(林盛斌)搵三百萬一個月，你又係唔係呢？
冇⋯⋯冇去計，哈！我有時同阿Bob傾偈，佢都會同我講：「我就嚟搵到幾多錢㗎嘞！」我好少計，阿Bob Business Mind多啲，我唔知頭唔知路，我成日都問我老婆：「究竟我搵幾多錢㗎？我哋屋企夠唔夠錢使？夠你講聲我聽，我唔使咁辛苦。」我老婆答：「未夠！」我話：「你唔好呃我，我真係唔同做法，依家我好辛苦。」佢話：「未夠！」咁就做啦！
我今年比前年同大前年做多咗嘢，我休息咗三年，盡量唔做咁多嘢，係今年先再做番，因為小朋友要去外國讀書，支出要多啲，所以今年我拍劇，又做旅遊節目，對我嘅私人時間犧牲係大嘅，以往我同太太一年去四、五次旅行，今年我去唔到，當然我太太都冇放棄過，佢今年去咗六次旅行，六次都冇同我去，哈哈！甚至小朋友去丹麥玩幾日，先落英國返學，我都去唔到，惟有淨係送佢返學校，我呢幾年嘅人生改觀咗，我覺得同屋企人相處嘅時間係追唔番轉頭。
希望仔女早啲戀愛嘅
囡囡曦童（Charisse）六年班，囝囝十三、四歲，仔大女大，森美坦言已經冇咗嗰種玩小朋友嘅感覺㗎嘞。「最近我攬住囡囡，佢塊面擰開，我叫佢伏喺我度，佢唔伏，我諗係青春期嘞。夏天我操fit咗喺屋企成日唔著衫，有次佢學校遊船河，佢唔畀我去，佢話：「費事你又除衫！」我話遊船河梗係除衫㗎啦！佢話：「唔係呀，人哋唔除衫㗎！」
森美自言自己係好惡嘅爸爸，「我做節目嘅時候表現唔係好真實嘅我，實際嘅我比較古肅啲、好多道理、好悶嘅、麻煩、唔係成日笑嘅。當然同仔、女相處都唔同，男仔要獨立啲、女仔我會錫多啲，講笑嗰句係，錫個女錫到第時佢揀個男人要錫過爸爸錫佢，就係好男人嘞，但實際我都唔畀佢發脾氣、唔想佢做港女。」
你係咩類型嘅爸爸？仔女拍拖未？你又會係咩類型嘅外父？
外父？我諗我都挑剔㗎，你唔好搞到我個女呀！哈！我好希望佢哋早啲戀愛嘅，早啲學懂傷心好過大個先嚟學會。 我囝囝五、六年班嗰陣有個所謂嘅女朋友仔，我哋會約嗰家人上嚟屋企食飯，我哋要畀佢知道嗰樣嘢係正常嘅，你係可以喜歡嗰個人，佢係可以喜歡你，冇嘢抑壓，但要懂得去相處，點樣去處理感情。
你係咪怪獸家長？
依家好容易扣一個帽子畀啲家長。我見啲家長大部分都唔怪獸，我覺得嗰啲叫做有planning，要知道父母同仔女係有血緣關係，係有遺傳，咩爸爸媽媽就會有咩嘅仔女，如果爸爸媽媽係懶，怪獸極都係hea下hea下。我係一個都幾唔放過自己嘅人，我個女我係要唔畀佢學嘢，因為佢學鋼琴、學唱歌、敲擊樂、又吹笛、又牧童笛、又田徑⋯⋯，我話唔得，你一定要減啲嘢，我見到個性格係嚟自我，因為我係咁嘅人，試過太太叫我估個女數學測驗幾多分，我心一寒、好驚，我話唔係一百分嗎？佢話係，我即刻叫個女唔好咁緊張，我話一百分唔正常，錯少少先有進步，因為我係對自己要求好多嘅人，我覺得我係因為咁嘅性格令自己唔開心咗好長時間，我唔想我囡囡對自己要求咁高。
佢哋兩個有冇話要入行？
有，我問個女第時想做咩，佢話：「想做爹哋！」我話：「吓？」佢話：「電台呀！」我話你讀咗醫科先，講笑啫，其實我唔反對佢喺藝術上去諗，我有畀佢哋做話劇、參加朗誦，我覺得佢哋做乜嘢，依家講太早嘞，小朋友好得意，你愈早叫佢做某一樣嘢，佢就愈反對。我細個阿媽想我讀醫，我有少少阿媽叫我做、我偏偏唔做嘅反叛心態，讀咗新聞系，所以依家同自己講，盡量等佢哋自己發揮，譬如我個仔好鍾意維多利亞時代歷史，咁辛苦畀佢去英國讀書，讀完返嚟，唔係教書呀？係會有驚嘅感覺，但我覺得每一個人搵到自己人生快樂嘅事，然後去做，錢買唔到嘅！
你係咩類型嘅丈夫？
自己講唔公平、唔公正，亦都唔全面，不如我講我太太口中嘅丈夫，我喺《森美旅行團》唔可以同太太睇日落同彩虹感觸流淚，其實唔sweet，多謝(黃)心穎一句「好sweet呀！」然後我老婆就鬧我：「個個都send message嚟話好sweet呀，sweet鬼！依家個個都覺得你係好男人，唔知你平時話我啫、對我幾衰啫！」我覺得中肯嘅，身邊識我嘅人都知我係會尷尬將自己心裡面嘅嘢表達嘅人，我有時會特登冷漠啲，因為覺得尷尬，even對自己最親嘅人，我唔係甜言蜜語、成日送花嗰啲，我係嗰種粗粗魯魯，有時仲呼呼喝喝嘅老公，但係心裡面係錫佢嘅！
你仲後生，唔追多個小朋友？
兩個夠嘞，當然依家個女大咗有啲唔捨得，終於明白係等湊孫嗰種感覺。不過依家小朋友長大都好嘅，我同太太終於有番啲二人生活，有小朋友之後，過去呢十年大家生日都冇去慶祝、情人節喺屋企溫功課，有番啲兩個人嘅生活其實都係好事，同埋真係世事無常，都唔知將來日子大家可以相處到幾耐，懂得欣賞同享受係好緊要。
94年入行，入行23年，你覺得發展成點？有冇高、低潮？
以前唔覺有高、低潮，依家大個咗靜番落嚟諗，以前都幾紅啦！回想番都有起起跌跌，不過我嘅性格唔懂得欣賞自己好嘅地方，低潮譬如話非禮女藝人選舉停工兩個月，嗰個算係人生當中比較大嘅低潮，但我四周圍同人講都覺得係人生入面嘅高潮，因為嗰兩個月，我睇呢個世界更加清楚、明白更加多，我用一年時間將呢個經歷去唔同嘅中學分享，依家好多講座我都仲講緊呢件事，嗰段時間我人生價值好低，因為我覺得我又唔係真係想做呢件事，點解你哋要冤枉我呢？呢件事之後，我冇放棄，繼續做自己覺得啱嘅工作，之後嘅第二年，我接到最多嘅代言工作同攞到最多獎，我依家keep住提自己做錯唔緊要，最緊要知道錯咩、儘快改。
之後講嘢有冇窒住窒住或者避之則吉？
都冇得避吖！你知道講嗰樣嘢要係有趣，就有機會踩鋼線，我諗冇一個人會真係跌，睇下係咪好睇，因為真係會粉身碎骨嘅。盡量有小心嘅，但有冇錯？梗係有，點會冇錯！呢幾年都keep住有講錯嘢、做錯事，驚一驚，再快啲整番好囉。
你曾經患過抑鬱症，你係點發現？之後點過渡？
我知道自己抑鬱係發現自己唔開心，大約十年前，嗰時成日都希望搞笑，做嘢壓力好大，嗰時要寫個搞笑嘅劇，寫唔到，愈緊張愈寫唔到，個心就慌，夾硬寫出嚟，但覺得唔好笑，情緒好低落，發覺唔對路，我都係幾理智嘅人，就用運動幫自己，運動都幫唔到，到有一日要做司儀，揸住份稿記唔到，我估抑鬱令我集中唔到，就睇醫生，食藥食咗兩、三年開始有好轉。
抑鬱症冇得完全痊癒，因為同遺傳有關、同諗嘅嘢有關，只要我有一日諗嘢諗得唔好或者生活壓力大，又會返發。我依家心態同行為為自己治療，我有個方法好好，成日推介畀人，嗰時醫生畀本簿我，叫我寫低開心嘅嘢，一個禮拜後見醫生，冇寫，因為冇嘢開心，醫生叫我作，睇完醫生，我去茶餐廳叫個乾炒牛河，就寫「我叫乾炒牛河竟然有，真係開心嘞！」作吓、作吓，開始識感恩身邊得到嘅嘢。
你覺得外間對《森美旅行團》反應點？
OK吖，可能好多人冇聽收音機，對於我主持節目嘅方法覺得新奇。我有呢個節目做都係我去完旅行，喺電台講，(無綫高層)余詠珊聽到：「你旅遊家嚟喎！」我話唔係，鍾意去旅行啫，嗰年去咗四、五次日本，佢話：「不如你帶隊去一次旅行吖！」我咪試吓囉！啲人將人同杜如風比，但我係一個節目主持人，佢就係一個旅遊家，身份有少少唔同，我係一個節目主持人，根本上，你叫我主持煮食節目我都得，我試過主持煮食節目，啲人問「你識煮嘅咩？」我話識，我係節目主持，梗有辦法令到個節目好睇。
《誇世代》50集入面，你佔幾多集？
頭十集，跟住畀人投閒置散咗，最尾先返嚟，因為有啲時間我忙啲、畀唔到期，監製都對我好好，都好多發揮，譬如打拳，我操fit都係因為監製話要打拳，我都用咗一段時間、一個禮拜三堂學打Boxing，同我打嗰個係泰拳拳王，夾埋武指排咗幾日，排咗套套路可以一take過五分鐘，起碼十幾、二十招，剪出嚟得一分鐘，連埋陳豪叫我喎！
宣傳集中喺我同陳豪HeHe，我見陳豪好enjoy，要演員enjoy先得，唔係宣傳都冇意思，我都估唔到，兩個咁鬼直嘅麻甩佬！我開拍前開始操，陳豪就好忙未得閒操，有日，監製叫我畀陳豪睇下我操成點，睇完，陳豪點一點頭，跟住佢就操嘞，兩個月、六嚿腹肌全部齊晒，靚過我好多！佢嘅意志力好強，我照食嘢，佢減糖、減鹽、減油，拍緊劇都照操，真係犀利！
做電台有冇試過樽頸位？你做咁多嘢，有冇減少到電台嘅工作？
冇減少到，我每日都用最多時間去籌備電台嘅節目，我每日朝早有半個鐘以上去帶一個topic。樽頸位係經常有，因為我哋冇升職㗎嘛，由凌晨節目做到朝早節目再做埋黃金時段，都唔知可以再做啲乜，同埋當聽眾人數多咗，但知名度冇提高，嗰時就樽頸，亦係我情緒病比較嚴重嘅時候，我發覺我好努力做好多嘅嘢，但得出嚟嘅反應都唔大。
愈緊張就愈唔好笑，個人最唔快樂，嗰段時間都有六、七年，依家放鬆咗啲，以前我一年淨係放一次、一個禮拜假，直到呢幾年我先肯放鬆、放下假，依家會諗，我放完假講我去旅遊咪仲好聽，放鬆咗，個人就活啲，做所有嘢都舒服啲，呢個係我呢幾年最大嘅改變。
以前我希望做一個樣樣嘢都可以做得到嘅人，但我發現曹操點解會輸畀劉備呢？就係因為覺得自己咩都做到，但就咩都做唔好，呢個係好大嘅啓示，我唔介意付出多啲時間去做好件事，你做唔好，我就付出時間幫你做埋，最後我發現，同我一齊做嘢嘅人會覺得，你樣樣嘢都做晒，我就唔使用咁多努力，又或者阻礙到人哋嘅發展，我發覺唔係幾好，劉備幾好吖，織吓草鞋、喊吓，啲兄弟幫佢打生打死嘞，呢個都係去到長大咗之後要做嘅事嚟！
