張繼聰

為冧老婆張繼聰出奇招 行行吓街走去Busking大唱情歌

育兒

廣告

噚日係一年一度嘅情人節,大部男士都會為咗氹另一半而出盡法寶,只為搏紅顏一笑。藝人張繼聰噚晚同老婆謝安琪(Kay)行行吓街,竟然走去尖沙咀海旁問正在街頭演唱嘅年青人借結他,大唱張學友《每天愛你多一些》,簡直令Kay心花怒放!

撰文:Kayla|來源:Instagram

事緣就係今年情人節,Kay同張繼聰講唔想要任何物質嘢,只係想要一份過咗好多年之後都仲記得嘅禮物。依個難題又點會難倒一向鬼馬嘅張繼聰,佢於是帶咗Kay去尖沙咀海旁,問正在表演嘅年青人借咗支結他,即場自彈自唱情歌《每天愛你多一些》俾Kay聽,引來一大班途人圍觀。

睇吓Kay笑得幾開心!

張繼聰仲留言話:「老婆話唔要d物質禮物,但係要難忘嘅冧豬嘅幾十年後都記得嘅🍃 於是我帶佢去海旁,問班年輕人借咗d架生…… 講都無人信,仲要撞到Endy同阿嫂 😂 氹老婆嘅嘢,梗係搵啲志同道合嘅人一齊啦(主要係互相拍片😂)P.S.十分感謝借樂器比我地嘅年輕人s😘🙏🏻打攪晒😅🙏🏻」

 

在 Instagram 查看這則貼文

 
張繼聰 Louis(@louischeung2013)分享的貼文 張貼

張繼聰今次突發Busking仲撞到周國賢同佢太太,周國賢同樣為咗氹老婆,都唱出《目黑》,全場仲陪佢一齊大合唱添呀!

囡囡同謝安琪爭咪唱歌

張繼聰一直都係圈中公認嘅「愛妻號」,佢哋一家四口亦一直都受到網民追捧,同太太謝安琪仲不時擺仔女嘅生活片段到社交網站同網民分享。呢日Kay要出席活動,張繼聰就帶埋對仔女去探老婆班,仲化身為攝影師不停咁影囡囡張靖同Kay,相中見到囡囡露中一個崇拜眼神望住媽咪,十分可愛!張繼聰仲為女兒配上設計對白:「Mommy真係好靚……Daddy真係好本事,Daddy 叻叻,I love u Daddy!」文字間唔只讚老婆靚,仲兜個圈讚自己叻,真係好搞笑!

另外,囡囡張靖仲同Kay爭咪唱歌,張繼聰又再次發揮創意,幫囡囡設計對白:「Mommy , 我ready啦,我想出去唱….」仲話囡囡要唱好多小朋友都好鐘意嘅兒歌《Baby Shark》。另一邊廂,哥哥張瞻雖然冇同Kay爭咪唱歌,但就一直企喺鏡面前擺出型格甫士,真係遺傳咗父母嘅表演慾!

張繼聰同仔女齊變偷窺Fans

之後Kay去咗表演嘅時候,張繼聰同對仔女都冇走到,仲變身做偷窺Fans,喺門罅偷窺Kay演出,仲笑言佢哋係「三個瘋狂到帶點可憐嘅fans」。