懷孕戒口

撰文︰茄蛋媽
圖片︰新傳媒資料室、Thinkstock

懷孕食雪糕、凍嘢得唔得呀？

中醫話凍嘢係生冷嘢，影響子宮，有無懷孕都唔建議食。西方國家嘅孕婦照食可也，仲會自製好多鮮果Smoothie，營養角度無問題。雪糕都係奶製品，但我哋食之前要留意貯存方式，對於無蓋Cover/ 軟雪糕/ 手作軟雪糕，我都唔會食，因為呢類雪糕最易有菌，例如李斯特菌甚至大腸桿菌。

沙律宜小心 凍飲冰塊勿用生水

至於沙律，自己整嘅沙律，你可以好確定用咩水處理，如果喺餐廳食沙律，你可以確定到佢用咩水洗菜嗎？預先包裝嘅沙律菜都有機會受沙門氏菌污染，想食得安心建議大家親自整。最後要講嘅係凍飲，香港夏天真係可以熱到人體爆炸，但我哋都要小心選擇凍飲，個人覺得樽裝嘅還好，茶記嘅就免喇，始終唔知入面嘅冰塊係咪用生水製成，食咗攪肚痾都算喇，如果有菌或會影響BB健康。

懷孕食朱古力得唔得呀？

好多孕婦都擔心食朱古力會攝取咖啡因而 戒口 ，但今次呢個重大發現，對於鍾意食朱古力嘅孕婦嚟講一定好開心。生果日報係2004年嘅一篇關於「孕婦吃朱古力誕開心嬰兒」報道指出，芬蘭有研究話有食朱古力嘅孕婦，生嘅BB會開心D、笑多D，文章裡面有研究數據，詳情自己上網搵搵。

但咪咁開心住，即使要食都唔可以過量，進食過量或會增加妊娠糖尿病嘅風險，而且食太多就肯肯定會發生 肥媽唔食B嘅狀況，產後瘦身就更加困難，想肥B唔肥媽，食嘅時候都要抑制吓份量。

懷孕可唔可以食……

究竟懷孕可唔可以食香蕉？火龍果？ 豆腐花？ 芝麻？咖啡？ 奶茶？ 壽司？ 榴蓮？ 蝦蟹？羊肉？蛇羹？蜜糖？唔舒服食藥又得唔得？ 唔講食藥亦唔講迷信嘅野，齋以營養角度嚟講，以上樣樣食物都有佢嘅營養價值，對孕婦同BB都有幫助。不過，喺我哋食之前，為左BB嘅健康，不妨問一吓自己：

1. 處理過程乾唔乾淨？會唔會有菌？ 例如壽司

2. 懷孕前食用，有無出現過敏感？ 例如蝦蟹海鮮
3. 成份會唔會影響BB身體發展？例如咖啡/酒

4. 中醫角度係咩屬性，孕婦咩體質？會唔會令孕婦身體唔舒服？ 例如香蕉

如有疑問請教醫生或營養師

每個孕婦體質都唔同，有人戒口戒得好清，亦有人樣樣都會照食，個人認為，只要唔係瘋狂地食，只要食物本身乾淨、無毒性，無令我哋敏感嘅，食一點點都何妨，除非你明知果樣嘢有毒有害，例如 懷孕吸煙 梗係唔可以啦；明知加工食品如火腿/ 煙肉會增加致癌風險，咪食少啲或者唔好食囉；明知食咗海鮮會出疹就梗係唔食啦、明知飲親蜜糖水都會肚痾咪盡量唔好飲或者飲少啲囉。準媽媽們，我哋可以揀嘅食物有好多，對於乜野食物對自己好/ 對自己唔好，自己要懂得分辨啊，共勉之。

下一頁︰中醫助孕調理有法

下一頁︰湊仔必經之路 9大辛酸事

參考資料：衛生處網頁