曹永廉

教仔賞罰分明 曹永廉:我好惡㗎!

育兒

廣告

外貌十年如一日的曹永廉,完全不似53歲,問他有甚麼保養心得,他笑稱自己只是十分幸運,經常拍劇捱更抵夜,根本無時間作特別護理,有時間都給了家庭,「我都諗好多嘢,但唔會擺喺心度。」

撰文:Ling
攝影:IssacPoon(部分相片由受訪者提供)
場地:太古城中心

曹永廉與太太姜依蘭育有一對仔女曹保熙(9歲)和曹曦文(6歲),今年聖誕節因為曹永廉要開新劇,未能一家四口歡度佳節,不過囝囝都沒有太失望,一班親朋戚友會搞party,明白爸爸要專心搵錢養家,「希望爸爸搵多啲錢買嘢畀我食!」問到來年的新年願望,保熙希望愈來愈開心,爸爸少一點鬧人。曹永廉聞言表示自己是一位嚴父,對仔女的品格好嚴謹,「我幾惡㗎!尤其對男仔嘅品格我捉得好嚴,但我賞罰分明,乖都會有獎勵。」

大仔性格腍善 妹妹較霸道

曹永廉指一對仔女的性格幾極端,大仔保熙性格腍善;妹妹則比較霸道。「可能佢細啲,大家會就佢多啲。「阿仔比較似媽咪,做嘢滋油淡定;我就急躁啲,妹妹似我,所以上天好公平,不過我希望阿仔唔好似媽咪咁多,唔好賴床唔起身,哈哈!」
好多父母在湊小朋友的角色上有分工,曹永廉與太太就是嚴父慈母,對仔女的態度亦稍稍不同。「我幾惡㗎!尤其對男仔嘅品格我捉得好嚴,對個女就放鬆少少,男仔將來出嚟做事,各方面都要好啲,讀書讀得叻唔係最重要,如果個人性格唔好、冇禮貌,都會冇人欣賞,我希望我兩個小朋友都係有禮貌,樂於助人,願意分享。」

囝囝想爸爸鬧少啲

細女曦文比保熙細三年,曹永廉面對女兒個心已融化了,好難惡得出樣,他坦言女兒還小,鬧得比較少,「有需要我一樣會鬧嘅!」保熙在旁點頭,並說媽媽比較仁慈,除了督促他們做功課之外。「我有時唔做功課媽咪就惡喇,平時都唔會好惡嘅,仲會成日同我去玩。」

相對於太太,曹永廉忙於工作甚少與仔女玩耍,溝通也不多,幸好太太經常向仔女解釋和輔導,所以保熙明白事理沒有怪責他,只怪他有時太惡。「有時我返到屋企,阿仔會激我,我做嘢咁辛苦返到嚟,佢哋唔聽話又鬧交,係咪抵鬧吖?」保熙聞言笑笑口:「都係嘅。」
一家四口難免家嘈屋閉,但若果經常擺出嚴父樣,與孩子會傷感情,曹永廉的做法是賞罰分明,曳就要罰,乖就會獎。「依家啲細路好識分㗎!乖我一定會錫,仲有好多獎勵,物質上好似佢想買嘢,佢乖我會買畀佢;我亦會盡量抽時間陪佢哋玩,所以佢哋好清楚自己乖同曳,爸爸媽媽嘅態度會好唔同。」

結婚十週年 家庭分工清晰

仔女的性格一凹一凸,爭寵爭嘢玩在所難免,曹永廉和太太花了不少時間教導,現在兩兄妹相處得好好,曹永廉說:「哥哥好錫妹妹,但亦好鍾意激吓妹妹,因為妹妹好易嬲,咁又鬧交喇。」保熙立即為自己平反:「我話我想要啲嘢,佢唔肯就發惡!」面對妹妹霸道,保熙有時看不過眼就與妹妹嘈起上來,愈鬥氣愈開心。曹永廉笑指妹妹比較呷醋,事事都希望與哥哥平等,「哥哥有嘅嘢,佢都一定要有;哥哥有兩隻餃子,佢都要食兩隻,食唔晒都要。」

今年是曹永廉和姜依蘭結婚十周年,兩人恩愛如昔,曹永廉指自己在經營婚姻上,沒有過人之處,太太負責管理家庭及教導小朋友,自己負責賺錢養家,並分擔太太的工作,少說話多聆聽。「我哋兩個嘅分工好清楚,我主要係分擔工作、家庭同日常生活嘅需要。好多事情上我好少特別畀意見,尤其讀書教育方面,我都畀太太揸主意,可以減少好多爭拗,男士們都要學吓,兩個人嘅諗法一定有唔同,男人叉隻腳落去一定好多爭拗,你負責搵錢好過喇。」

姜大偉李琳琳 開明岳父岳母

好多家庭都要面對上一代的問題,婆媳紛爭、岳父岳母看不起女婿多的是。曹永廉慶幸自己與岳父姜大衛和岳母李琳琳相處十分融洽,大讚他們很開通。「佢哋真係一對好好嘅岳父岳母,完全唔會影響我哋點教小朋友,唔會插手我哋家庭嘅嘢,佢哋見到小朋友就同佢哋玩。」在工作上,姜大衛和李琳琳亦給予曹永廉不少意見和鼓勵,令他獲益良多,大家相處十分舒服。

姜大衛最開心見到孫仔孫女,曹永廉笑稱岳父沒有縱容他們,有錯一樣照鬧。保熙話最期待公公婆婆的聖誕禮物,「聖誕節會有禮物,同埋新年會有利是收!」姜大衛平日好少用物質去氹孫仔孫女,除非有特別日子。曹永廉指他們一家甚少用物質滿足孩子,不能讓他們覺得唾手可得,太太就設計了一個獎勵計劃,達標就有獎勵。「個獎勵計劃係計分制,做啱會加分,做錯就扣分,達到指定分數就有禮物,咁佢哋就清楚知道對與錯,慢慢成為習慣。」

每個人的性格不同,加上上一代的生活文化不同,要三代同堂溫馨和睦絕不簡單。曹永廉認為,自己首先要有耐心,無論對上一代和下一代,都要時間磨合。「對上一代同下一代都係需要溝通。教小朋友唔係一朝一夕,唔係你一講佢就即刻聽你話,你都要時間了解佢哋性格再溝通,希望可以從性格慢慢改變。

鍾意睇爸爸見古代人和警察

姜大衛現在有劇集《誇世代》播映,問到保熙有沒有看公公的演出,他答道:「有時間做晒功課就會睇!」曹永廉笑囝囝多數做不完功課,就算是他主演的劇集,小朋友也要待放假才會追看,保熙笑說:「爸爸有啲劇我都會睇番晒嘅!」他表示最鍾意看爸爸演古代人和警察,而近期劇集最愛《超時空男臣》,「因為佢個角色學嘢好犀利,好似講一條最難嘅題目,佢都答得到。」曹永廉指這套劇集適合小朋友收看,兩兄妹都喜歡,「呢套劇冇粗俗說話,一家人可以嘻嘻哈哈睇得開心。」
拍劇無數的曹永廉,去年終於奪得TVB最佳男配角,演技備受肯定。還有一類角色是曹永廉最擅長,有眼利的觀眾發現他是TVB「御用失蹤王兼罪犯」,試過因為釣魚、破產、做土匪而失蹤;又試過「干犯不同罪行被收監」,包括5次謀殺:放火、推人落樓及行刺等,2次挪用公款、盜竊、非法收受回佣、貪污、勒索等等,罪孽深重!曹永廉對此有以下回應:「我都唔知點解呀……我做過好多次中間唔見咗幾集再出返嚟,所以搵錢真係好辛苦,成日都搵唔足全套劇集。近期都好啲㗎喇,主導比較多,可以由頭做到尾。」

新年願望:想爸爸買嘢畀我食

今個聖誕節,曹永廉要拍新劇,不能與家人歡度佳節。「做我哋呢行好奇怪,每逢聖誕節同假期就最多嘢做,所以多數都係家人自己去玩。」

沒有爸爸陪伴的聖誕節,小朋友也不愁寂寞,因為媽咪與親朋戚友會大搞party,廣邀仔女的同學仔及父母參與,囝囝保熙最開心有大餐食,「可以食嘢又可以同朋友玩最開心!」小朋友的願望好簡單,開心度過每一天就行,保熙的新年願望也一樣。「下年開心啲,冇咁多功課。」曹永廉笑囝囝,不想爸爸少一點鬧他嗎?他笑笑口說不,「希望爸爸搵多啲錢買嘢畀我食!」

曹永廉坦言人大了,沒有甚麼願望祈求,最重要是家人身體健康,因沒有健康就難以實現任何願望。不過新一年在事業上,他亦希望更上一層樓,「希望自己多啲嘢做,多啲人鍾意。」曹永廉形象入屋,大人細路也喜歡他。訪問當日,曹永廉與囝囝出席太古城中心「聖誕光影樂園」活動,罕有一齊跳舞,他們笑說平時沒有跳舞,希望不會太難看,最重要大家睇得開心。現場一班街坊見到曹永廉歡呼聲不絕,受歡迎程度不下於一線小生,相信對他們的舞步都很滿意,度過了一個開心的聖誕前夕。