楊張新悅 想三個女學好普通話

Nicola 自小聽明伶俐，港大法律系畢業，陀二女時轉讀環境管理碩士，並以全班第一名畢業，之後走訪社企及商業機構講talk宣揚環保，口才了得，她希望三個女能學好兩文三語與人溝通，尤其身為中國人應加以學習普通話，到內地做慈善工作，都能發揮所長。

湊三個女︰似天堂做奴隸

本身是獨女的Nicola，與丈夫渴望有個大家庭，2007年婚後即展開造人大計，七年間誕下三女，「我哋都鍾意大家庭，但生完第三個就覺得，大家庭係無比快樂，亦係無比嘅，每日係好快樂滿足咁，我哋成日話我哋喺天堂做奴隸，天堂係美好，但做到奴隸咁，湊三個日夜冇停手。」
Nicola形容大女Lucy和二女Lily性格相近，都是爽朗多言的人，但6歲的Lucy開始有兒童心事，「佢哋好似我鍾意講嘢，但每個階段有唔同，大女開始明白咩叫尷尬，俾人笑會唔開心，有啲心事嗰個階段，我要經常解釋， 亦要俾佢知道父母好錫佢， 令佢感覺到愛，唔好因為小小事唔開心，咁會好痛苦，要教佢用最少時間令自己開心番。」

大女有心事 二女爽朗

相比家姐，Lily比較男仔頭，好多古靈精怪想法，「佢係好得意爽朗，講嘢好好笑，好似佢最近同我講，『媽媽，新年一定要着紅色衫，因為新年怪獸驚紅色，如果唔係佢會食咗我哋！』我就問點解怪獸新年先嚟嘅？佢就話：『媽媽，因為佢叫新年怪獸！』聽完覺得佢好傻，唔知佢點諗到，哈哈！人哋A for Apple，B for Boy，佢就B for Bee，T for Tea！」

去到第三個，Nicola已好有經驗， 覺得細女Leah算易湊，並開始睇到性格，「佢好直接，想食嘢同瞓覺係有某一個聲，只要一聽到個聲就知佢想點，已經好識溝通。」兄弟姊妹難免有爭寵情況，但她們仨之間絕無爭寵及呷醋，Lucy和Lily反而爭着湊妹妹，Nicola沒好氣道，「佢哋係呷我醋，話我霸住BB呀。」

(左圖)Nicola丈夫楊哲安為前任教育局政治助理，現從商做獵頭公司執行總監，卸下政府包袱，有更多時間陪伴家人。

(右圖)Nicola覺得香港狹窄，小朋友常困在細小室內好易有近視，必須多帶小朋友到戶外活動睇遠景，對眼睛及身心發展都有幫助。

讀環保拯救地球

Nicola是高材生，港大法律系畢業，陀二女時重拾書本，棄法律轉讀環境管理，亦為女兒做到一個好榜樣。「以前讀法律唔知自己讀緊乜，嗰時個個都話做律師好呀，讀法律啦，咁我就去讀，渾渾噩噩過咗大學生涯，生第二個女嗰時覺得係時候進修，俾多次機會自己用心讀書，當時大肚係最好時間，又唔會出街做啲咩，又冇返工，最好係讀書啦，就用咗兩年時間讀。」

「我想拯救地球，好老土㗎我！」她笑稱細個想做醫生，但怕血做不到，又想救「某啲嘢」，長大後就想到拯救地球，「對生活環境嘅要求，同經濟應該成正比，香港經濟體系同歐洲差唔多，但對環境要求低，所以香港呢方面仲有好大進步空間，我自己睇吓有咩幫到手。」

名牌紙盒做勞作

她常走訪各區講環保講座，教女亦有灌輸環保訊息，她笑言自己是「環保傻媽媽」，在家堆放了許多垃圾給囡囡玩，「好多品牌邀請我出席event，咁名牌嘅packing十分靚啦，盒呀、邀請卡呀都用好厚好靚紙，學校一有勞作要整乜整物，突然要張粉紅色紙好難搵㗎嘛，既然要特登買，不如我平時收集好，所以好多勞作係用Gucci、Van Cleef & Arpels等好多唔同品牌嘅紙，其實對阿女嚟講都係一張厚紙。」
還有一大堆護膚品化妝品，她統統不放過，每次用剩的空樽她會洗乾淨，當做女兒的玩具，「佢哋會拎嚟裝顏色，溝吓唔同顏色好似做實驗咁，又可以用筷子敲唔同空樽當敲擊樂，其實我冇話要用啲樽做咩，只係話俾佢哋聽，呢啲就係玩具，佢哋就會自己發揮，玩具都唔使買。」

(左圖)Nicola覺得好多所謂勞作玩具包有齊材料，欠缺創意，寧願儲一堆廢物給女兒發揮創意，今次兩女利用廢物製作了一架飛船。

(右圖)兩女利用媽媽的護膚品空樽做實驗。

聖士提反重品德美術

兩女現就讀熱門學校聖士提反女子中學附屬幼稚園，Nicola指好難把該校的課程與其他學校比較，不知道程度深淺，但可以肯定女兒返學開心，對課程有興趣，返家會自發做功課。「唔會忙到12點都未瞓得，功課量合理，另外學校好重視品德、親子同美術呢三方面，我都覺得好重要，好似美術係發揮小字宙嘅途徑，因為小朋友未識用其他方法表達。我會由得個女自己整嘢，我唔會控

制，只會輔助佢例如貼嘢要用呢隻膠紙，膠水黐唔到嘅，雖然製成品好核突，但佢用自己方法喎。」

棄flash card實戰學語言

Nicola重視一家人溝通、講道理，而語言是溝通橋樑，她希望女兒好好學習兩文三語，「語言係了解文化同溝通，廣東話係我哋
母語，所以廣東話一定要最流利；第二係英文，要同工人姐姐溝通，喺香港亦好重要；第三就係普通話，身為中國人需要學好普通話，一有機會接觸就學，最好可以同內地小朋友做同學仔，有機會就到內地旅行，明白語言嘅重要性。
到內地不是常常有機會，所以Nicola報讀了兒童普通話教學中心Mini Mandarins，睇中課程有情景教學，可以實戰講普通話，「睇書只能夠學某啲嘢，但實戰先有用，我冇理由逢周末帶個女返內地講㗎，所以能夠喺一個小小區域玩情景學習，好似

超級市場，就可以學到點樣禮貌購物。」
Nicola教女不用flash card，一有時間就叫女兒放下功課出街玩，「我完全唔俾識字卡小朋友，要識呢個字大個一定會識，但
大個會唔會四點鐘去公園玩？未必有機會，點解唔好好把握依家自由嘅童年時間呢？郁多啲對身心發展都好啲，語言可以慢慢學，唔能夠一步登天，但我希望訓練阿女由語言、計數、讀書、人生，全部都自發性學習，發掘當中樂趣。」

●撰文：Ling
●攝影： 溫俊鏘（部分相片由受訪者提供）

場地：Mini Mandarins Learning Centre（tel: 2320 1128）