應昌佑

歌手應昌佑 兼職搵奶粉錢

育兒

廣告

前A Music旗下歌手、黎明愛將應昌佑(Charles),不經不覺已入行十年,星途一直浮沉,剛為人父的他為了養妻活兒,去年約滿A Music後決定尋求新發展。幾時都話藝人應有一技之長,當身在低谷仍可選擇其他出路,Charles本身擅長平面設計,在美國羅德島設計大學畢業,回港曾在Nike做設計師,歌手約滿後食老本頻接設計freelance,加上友人開公司邀請一齊搞活動,收入比以前更可觀。「係對我太太同屋企嘅承諾,只靠單一工作喺香港社會唔係好work,有咩潛質有咩可以兼顧到嘅,就盡量去做。」

離開A music 重生

Charles初出道備受老闆黎明力捧,經常與衛蘭結伴出show,更為黎明演唱會做表演嘉賓,但之後無以為繼,效力九年間只出過一張唱片,間中拍電影及港視劇集維持生計。去年Charles一索得男,令他不得不向奶粉錢低頭。「我覺得係時候重整一下自己,你都見到我有個好活躍嘅囝囝啦,係時候去為囝囝諗多啲,點樣去support將來生活,始終人大咗顧慮多咗好多,尤其是有家庭之後,香港使費又大,我不得不顧及錢銀嘅嘢,所以我一定要諗方法搵多啲錢。」
Charles離巢後,從沒有公開埋怨舊公司,只想重新出發,「我又唔可以講舊公司乜乜乜,我絕對唔想提呢樣嘢,其實成個樂壇都好難做,我唔會去怪邊個,怪責亦冇乜得着,我只會向前望,東家唔打打西家囉,呢樣唔啱,我咪試吓做其他嘢囉,唔試過又點知。我放低咗啲嘢唔代表完結,隨時係一個新開始,唔覺得係失去青春。」

兼職搞活動做設計

思想正面的他有一技之長,不愁沒工作,新開始亦好快出現,而且不只一個,「唔知點解突然多咗其他嘢搵我做,我有做開設計,即時有好多人搵我做 graphic design freelance,多到由上年九月到依家,我晚晚都唔夠瞓,因為我好多時要返工,仲要湊仔,夜晚就做freelance嘅嘢,成日朝早4、5點先瞓,第 二日又返工。」
Charles口中的返工,是他的另一瓣工作,離巢後適逢有朋友開公司搞活動,獲對方邀請做freelance,「你唔唱歌住,不如幫我手啦。」雙方一拍 即合,早前在商場搞了一個大型親子吹氣嘉年華,現正籌備更大型的親子跑步活動,Charles已為人父後,對親子活動更有熱誠。

 

前助手邀再戰樂壇

入行多年鮮有代表作,但Charles對唱歌的熱誠未減,希望有機會再戰樂壇,因緣際會下,他在衛蘭演唱會重遇舊公司一名前助手阿端,為他帶來曙光。「阿端開咗間新公司,佢問我有冇興趣加盟,我想嘅,但同時我又返緊工,而且我個心態同以前係兩個人嚟,唔再係十幾廿歲,我已經三十幾歲,有個仔、有屋企,我必須要兼顧佢哋,你哋俾唔俾我一路返工一路做歌手呢?」
他不能為唱歌等另一個十年,現實比理想來得重要,阿端即大表支持,他感激道:「佢哋覺得應昌佑應該有多個機會喺呢行發展,會一心一意幫我出碟,呢個second chance係一個緣分,好開心仲有人肯定我係歌手。」Charles正籌備新歌,希望暑假後面世。

歌唱世家遺傳囝囝

為準備今次復出,Charles覺得要有改變,不擅樂理的他將嘗試寫歌,更希望憑歌寄意送給囝囝Travis,「之前陳奕迅有首歌送俾個女,雖然我當時未有細路仔,但聽到都覺得幾窩心,我希望做到類似嘅嘢,作為一份禮物送俾囝囝。」
Charles其實來自歌唱世家,媽媽是台灣70年代紅極一時的「低音歌后」冉肖玲,讚過兒子的歌聲好sexy,現年一歲的Travis都有遺傳爸爸和嫲嫲的音樂基因,對音樂反應特別大,聞歌即起舞,「都係播兒歌為主,古典嘅莫札特都有,聽講都會影響到小朋友發展。」他不打算在音樂方面刻意培育個仔,任他自由探索,唯獨想加強籃球培訓,「我想將我嘅興趣傳授俾佢,我好鍾意打籃球,特登買咗個BB籃球架擺屋企俾佢玩,睇吓佢鍾唔鍾意。」

遲報名照入維多利亞

窮有窮養,富有富養,生兒育女不一定等到經濟有能力,只要教得好孩子一樣會成材,Charles都覺得一切順其自然,有仔應該趁嫩生,「好多人都問準備好做爸爸未,其實當時個心真係未定,但囝囝出世後,好多嘢就自自然然發自內心為佢做,慢慢學緊啦做爸爸嘅感覺,好開心見到佢一日一日長大。」
Charles選擇以freelance形式工作,貪其時間彈性方便湊仔,太太Mandy則做在職媽咪,主要由Charles帶仔返學。一歲大的Travis入到維多利亞playgroup,將會原校升PN及幼稚園,「呢間一直係我哋心儀學校,揀學校真係好煩,冇諗過咁瘋狂,好多朋友未生已經報定名,我個仔出世六個月先報都俾人話好遲,佢仲啜緊手指飲緊奶喎,原來依家香港教育係咁。」不過早報都未必入硬,Charles遲報反而入到,所以一切還看孩子本身,囝囝的性格活潑跳跳紮,不怕陌生人,可能就是成功因素。

積極養家
應昌佑幾年無歌出,以為他無工開零收入?其實他好積極做兼職搵奶粉錢,全因去年囝囝出世令他醒覺要孭起頭家,其中一份兼職是做活動搞手,主攻親子活動,家長們都可能帶仔女玩過,片段中Charles會分享他的新動向,樂壇以外都能活得很好,究竟活潑的一歲仔如何改變了他?

想考名校培乖仔

「養兒一百歲,長憂九十九。」Charles話開始感受到,受朋友影響下,他開始鋪定中小學的路,暫時傾向本地學校,名校都會一試,「我中學讀國際學校,太太喺加拿大讀書,但我哋想佢入本地學校打好中文基礎,我太太都有諗名校,好似皇仁、男拔、喇沙……專出乖仔叻仔嘅學校,太太想個仔乖啲。」
兩人有計劃生多個,Charles希望兩年內多賺奶粉錢,足夠養兩個細路,「我哋年紀都唔細,都想快啲生多個,俾我做多一兩年嘢就會決定㗎喇,我希望可以快啲大展拳腳搵多啲錢,老婆就唔使返工,可以做全職媽媽。」

●撰文:Ling
●攝影:Paul Choi (部分相片由受訪者提供)

你有獨家湊BB心得嗎?

更多精選內容