湯鎮業孖仔靚仔有型高學歷 簽宇宙最強闖影壇！
撰文：Sunday Kiss 圖片：新傳媒資料室、湯君慈、湯君耀IG
三姊弟都係UCLA高材生
阿Bruce同阿Chris，仲有家姐湯愛嘉，都係湯鎮業第一任妻子姜坤所生，三個都遺傳咗父母嘅靚人基因，而且讀書都好叻，三個都係讀美國著名大學加州大學洛杉磯分校（University of California, Los Angeles, UCLA），阿Bruce同阿Chris仲一齊主修社會經濟學，副修電影。
湯鎮業對三人能考上名校感到驕傲，「我好注重佢哋學業，你知啦，花咁多錢捱到佢哋咁大，都係希望佢哋讀到好學校，我成日問大女，兩個細佬考成點？但個女覺得我好煩，做老竇就係咁喇，好緊張學業。」
孖仔大學係讀世界著名學府，中學時代，喺香港一樣係讀名校㗎！兩個都喺位於赤柱嘅百年傳統名校-聖士提反書院畢業！
細個係一對肥仔, 齋睇相已經知道斤両十足！
孖仔性格隨和，自小就不會爭寵爭嘢玩。
話哂都係孖仔，細個嗰陣打扮造型都會好相似！
但係大個咗就刻意有唔同打扮，塑造個人特色。
湯鎮業受訪時話過，孖仔性格好唔同，但係一樣唔鍾意人哋覺得佢哋似樣！
第一次拍戲就同丹爺合作，阿Bruce同阿Chris自言都有向爸爸請教演技。
喺北京上優先場嗰陣，孖仔都有請爸爸去捧場！爸爸仲話套戲好精彩，好耐冇睇過咁好睇嘅港產片。仲讚孖仔比佢想像中好、有驚喜，但係對白急咗，要學吓掌握演戲嘅個節奏！
丹爺兩公婆都唔止一次話孖仔好有潛質，係可造之材！
事實上爸爸對孖仔嘅要求，比老闆丹爺仲要高。有次湯鎮業去片場探班，導演表示OK但爸爸都唔滿意，話佢哋表情唔夠生動。
但係孖仔都覺得呢啲係動力多過壓力，因為爸爸對佢哋有要求，會令佢哋想做得更好！
兩兄弟自細受到爸爸嘅影響，對演戲都好有興趣，而且爸爸亦都好鼓勵佢哋咁做！
而且細細個就見爸爸喺片場捱世界，所以兩兄弟都好清楚，做演員呢條路一定係要捱嘅。
父母雖然早已離異，但係一家人嘅感情都依然好好，好多時都有家庭聚會！
一齊出世，一齊讀書，一齊出道，兩兄弟感情應該好好！！
但係原來一樣都係咁鍾意打籃球嘅孖仔，都試過打波變打交！
中五嗰年，兩兄弟因為打籃球嗌大交，阿Bruce當時一拳打去Chris鼻樑，令到Chris鼻骨歪掉要做手術。
嗰次之後，兩兄弟冇再打交，大家都成熟咗，感情亦好咗。阿Chris話當時好嬲阿哥，不過最後都原諒咗佢。
爸爸知道之後都有鬧佢哋，仲話：「點解屋企人打自己人，要打就打出邊啲人，唔好打自己人！」
兩兄弟而家開始賺錢，唔使爸爸再畀零用錢，就連爸爸畀嘅信用卡都Cut埋！
下個目標就係希望自己賺到錢之餘，可以養埋爸爸，等佢唔使咁辛苦！
