路邊攤

漫畫家路邊攤 大懶蟲變勤媽媽

育兒

廣告

港產圖文書熱潮未減,新晉作家不斷湧現,但不是個個站得住腳,繼《我的低能》系列的馬仔之後,同樣行可愛搞笑路線的路邊攤亦相當受歡迎,2009年出道至今,作品已出到第十二本,內容圍繞日常搞笑生活。已育有兩歲女兒的路邊攤,開始以女兒做主角,最新作品講述懷孕一刻到誕女後數天的經歷,相信往後的故事發展離不開湊女趣事。

跟路邊攤傾育兒經,你不會得到頭頭是道的內容,她最常說:「最緊要開開心心、佢鍾意就得、做咩都冇所謂啦……」答案都是簡單直接,路邊攤從來都不是一個長篇大論,好有計劃的人,隨遇而安、開開心心,不論做人還是育兒,就本應如此。

小攤似爸爸心急

80後的路邊攤年紀輕輕,便事業家庭兩得意,擁有喜歡的繪畫事業,生活自由自在,又有疼錫她的老公和女兒,教很多港女羨慕不已。她堅信「愈懶惰愈快樂」為做人宗旨,培養出樂觀慢活的性格,無論工作、湊女都持開心態度去做。不過自女兒小攤攤出世後,她打破了「充足睡眠」的人生座右銘,自稱「米蟲」的她變成勤力媽媽,以前懶得煮飯,吃小食當正餐,現在為女兒一日煮足三餐,還要弄得精美,午餐會有米奇老鼠番茄通粉,還焗製女兒最愛的提子包。
路邊攤笑言女兒為人心急,最鍾意食,似足老公阿真,「無論佢個樣定係性格,都似我老公,凡事都好心急,做乜都要即刻,好似食飯未擺到佢面前,已經嘈住話要食,一擺落去就好快食晒。」小攤都有似媽媽的一面,終日都笑騎騎,遺傳了媽媽的樂天性格,路邊攤笑說:「佢好鍾意笑,唔知係咪我陀住佢嗰陣成日笑呢?人哋話媽媽係咩心情,個小朋友將來就會係咁樣。」

不過,路邊攤與老公和女兒的急性子相反,名副其實是條大懶蟲,大部分作品以「懶」為主題,自稱最愛發白日夢,心智發育一直停留在12歲,連寫書都是臨急趕死線之人,最新作《小攤攤的育成孕記》更加沒時間畫,但今次非衰懶惰,而是大部分時間投放在小攤身上。「今次畫嘅時間好緊迫,要屋企人得閒幫手湊,我先拿拿臨畫多啲。」不過她自覺已經好好彩,做漫畫家生活自由,有更多時間看着女兒成長,「至少我可以喺屋企睇住佢,趁佢瞓咗或者專心玩緊嗰陣,我都可以做吓嘢,唔使請工人姐姐湊。」

誕女中途對老公笑

小攤已差不多兩歲大,以前只想自由自在,從沒想過生育的路邊攤由決定懷孕至今轉變極大,希望好好與讀者分享。今次新作記錄了懷孕至誕女後數天,當中收錄了不少趣事,例如懷孕期間老公想老婆注意飲食,每日勁買饅頭,食到她口淡淡,為了想食麥當勞而爆喊;絕少做運動的她走去做孕婦瑜伽,手腳不協調左右不分,鬧出不少笑話。
最令路邊攤難忘的一幕是在產房誕女的過程,原本還好輕鬆去醫院待產,忽然爆痛生得要入產房,老公阿真全程陪產,為了不讓老公擔心,痛到爆的她仍對老公唧出笑容,「其實喺產房我已經非常之痛,但嗰刻一諗起老公可能好緊張好驚,我就生到一半途中對住佢笑,佢都被我嚇親!」

吸引媽咪級讀者

對比之前11本作品,今次這本《孕記》比之前的感受深得多,「因為自己第一次做媽媽,係我人生從未經歷過,好可能只此一次,所以畫嘅時候回憶番個過程感受好深。」真的只此一次?不打算生多個陪小攤嗎?「暫時都唔諗住,依家要湊佢又要畫畫,喺時間分配上未拿捏到,如果要生多個,我成日講笑話可能要封筆,哈哈!老公自己都忙,佢覺得有時間不如多啲陪小攤。」
讀者就像見證路邊攤長大,近年更多了一批媽咪級讀者,甚至一齊由單身至媽咪級,「有個讀者好多年㗎喇,我開簽名會佢帶埋六個月囝囝過嚟,好感動呀,因為帶住小朋友排咁耐隊好辛苦!仲有其他媽咪同我分享佢哋仔女嘅事啦,都好有共鳴,有媽咪生咗BB後send返張相俾我,覺得好溫馨,因為自己都知生BB好辛苦,見到人哋個B出世都感受到嗰種辛苦。」

傳統學校扼殺創意

路邊攤不喜歡焗促的生活,一家三口居住元朗村屋,即使最近為照顧小攤搬大屋,都是村尾搬到村頭,貪該區四周寧靜地方大,最適合她在家工作,「我諗我搬唔返出去㗎喇!」新居特設黑板牆給小攤畫畫,因為小朋友都喜歡畫牆,路邊攤就索性把其中一邊牆變成大黑板。「佢同一般小朋友差唔多,都係鍾意拎起支筆亂咁畫,佢哋覺得好得意,屋企整咗幅牆俾佢任畫。」
路邊攤自小就認定自己愛畫畫,小朋友時期已喜歡做繪圖筆記,工作幾年後決定開blog分享畫作,自此被發掘出書。她未看得出小攤是否有畫畫天分,但肯定她一樣喜歡畫畫,小攤也告訴我們「鍾意畫畫!」

至於讀書方面,路邊攤也開始為她安排讀N班,不功利的她,當然會選擇屋企附近的學校,最緊要返學方便、學得開心,但她都有個要求,不希望女兒在傳統學校讀書。「唔想佢讀本地制度嘅學校,好少發揮空間,好似我咁自細鍾意畫畫,但一直冇乜機會喺學校表現自己,最多都係做壁報,所以我想俾佢去一啲可以發揮潛能、自由度大啲嘅學校。」

對將來沒長遠計劃

家長現在選校的心態是「逆線思維」,先諗定中學讀那間名校,再睇哪間小學易入,最後才睇幼稚園和N班,有一個全盤大計。路邊攤卻完全相反,都是見步行步,入了N班才諗幼稚園,小學更加長遠,「我從來都唔係一個有長遠計劃嘅人。」自己的事業如是,作家們都會費煞思量如何不被長江後浪推前浪,路邊攤對此隨遇而安,「我都係船到橋頭自然直嘅人,我會keep住自己想畫嘅嘢,
如果真係有一日冇人睇,冇人幫我出書我咪擺上網,自己娛樂自己啦,哈哈。」

創意黑板牆
路邊攤為女兒小攤搬大屋,家中陳設好貼心,令小攤有好多活動空間,路邊攤更睇中小朋友鍾意在牆上亂畫,索性把一邊牆改裝成黑板牆,亂畫都無有怕,還可發揮無窮創意!路邊攤畫畫叻,女兒應該都遺傳到幾分,路邊攤就話女兒尚小未看得出天分,但她的確好喜歡畫畫,將來做接班人都唔出奇呢!

 

●撰文:Ling
●攝影:Clay Lam (部分相片由受訪者提供)

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。