楊千嬅

維繫愛情與婚姻 楊千嬅 :相信自己直覺

育兒

廣告

「成世流流長,總會愛上幾個人渣。」余春嬌總算找對了張志明,從相識、拍拖,經過離離合合,來到第三集《春嬌救志明》,兩人與其他戀人一樣,在平淡的感情中開始思考將來,在走向婚姻的道路上,發現大家步伐不一致,在感情上需互相拯救。

每個女人從余春嬌當中,都能輕易找到自己的影子,當與伴侶經歷了長時間,必定會遇到樽頸位,千嬅勉勵各位女士,想解決問題必須忠於自己直覺。「無論自己過去同經歷如何,要相信當下嘅直覺,如果你有種感覺係好愛或者放唔低,不如順自己感覺行咗先,唔好迫自己,你嘅本能感覺可能係你嘅命運。」

現實中, 楊千嬅 與老公丁子高攜手走過八個年頭,育有快五歲的兒子丁進諾(Torres),一家三口樂也融融。談起與丁生的婚姻,千相信兩人走在一起是緣份,每日返屋企見到老公和囝囝就感到無比幸福。

撰文:Ling
攝影:Issac Poon(部分相片由受訪者提供)

化妝:Ling [email protected] the makeup school
髮型:Vic [email protected]
場地: J Plus Hotel by YOO

春嬌遇感情樽頸位

自2010年第一集《志明與春嬌》開始,余春嬌與張志明這兩個角色陪着觀眾成長,觀眾亦一直留意着兩人的感情發展,第三集《春嬌救志明》兩人的感情已有一定基礎,但經過一段時間後,又有問題發生,導演彭浩翔為今集的主題解畫:「個問題唔係來自外在,而係內在,未必一定有別人嘅介入,好多時感情問題係因為兩個人相處、性格,到底呢個人能唔能夠同你長遠相處落去。」

將近40歲的春嬌渴望結婚,但她發現志明未ready,卻忽然提出想有小孩,令春嬌很猶豫,彭導解釋道;「究竟個男人想有小朋友先結婚,還是真心想結婚?想有小朋友係咪當多件玩具?呢件事令春嬌對婚姻卻步,因為春嬌嘅父母相處得唔好,導致婚姻失敗,所以春嬌好怕揀咗一個同佢爸爸一樣嘅男人,佢仲觀察到志明真係有一定程度佢爸爸嘅影子。」

「姊弟戀」是緣份

小朋友並非一條橡筋,用以紮實一段關係。千嬅 相信婚姻要靠夫妻兩人維繫,不能用小朋友作綑綁,很多單親家庭的例子,都是夫妻因了解而分開。又有些人以為,生小朋友後伴侶就會變得成熟,彭導認為此想法大錯特錯,「咁諗對小朋友唔公平,因為小朋友冇背負呢個責任。」

現實中的 千嬅 ,2009年與丁子高在拉斯維加斯結婚後,3年後誕下兒子Torres,轉眼間丁生丁太結婚八周年,千嬅 自言是婚後才慢慢建立家庭觀念,再決定生小孩。「我覺得婚姻都係一種學問,如果搞得掂呢種學問,你先再下一城建立家庭。兩個人如果溝通上搵唔到和諧共識,你就唔應該攞個小朋友去解決你哋之間

嘅問題。」

千嬅 與比較年少的男人特別有緣,張志明助她坐上影后寶座;老公丁子高更為她帶來美滿的家庭生活。談到「姊弟戀」開花結果, 千嬅 雖比丁子高大五年,但她指出年紀大並不等於心智成熟,相反亦然。「我覺得我哋係緣份,我唔係以年紀做出發點去搵一個伴侶,即使年紀大我好多都未必成熟,60歲唔成熟我都見過,所以兩個人喺埋一齊靠溝通同緣份。」

親子閱讀 揀學校故事書

父母為孩子講故事,能深深影響他們的將來,春嬌年近40,仍深深記着媽媽在她小時候所講的《趷趷剛》打怪獸故事。其實該故事是彭浩翔的外母所講,彭導覺得血腥得來很有趣,就拍出來放在《春嬌》開首。

千嬅 不敢將《趷趷剛》告訴兒子,因怪獸會食小朋友太驚嚇,「連King Kong都唔畀佢入場睇啦!」 千嬅 會選擇講多圖畫的故事書,培養Torres的閱讀興趣,不過隨着Torres長大,由以前天馬行空亂講一通,到現在主要講學校的故事書。「我冇天馬行空喇,依家小朋友好聰明,會踢橋㗎!佢會反問我好多問題,所以依家一定要講原著,有圖有聲有畫。學校嘅故事書最啱,兩文三語都有,又可以溫功課,又可以同佢溝通,簡直一石二鳥!仲有好多朋友送嘅圖書都會講,唔需要特登去搵啲乜嘢。」

囝囝嫌彭浩翔著作

彭導笑她夜晚講故事似教書, 千嬅 反駁:「我唔係用教書聲吖嘛!要睇人嘅性格,我會畀佢講先,佢識睇書喇嘛,『Torres你先講俾媽咪聽個故事講咩吖!』之後先到我講。」

彭導建議Torres看他的著作, 千嬅 話Torres有看過,但太多字完全無興趣,「佢拎過你送畀我嗰本pocket size嘅書,佢開頭睇覺得好靚,但揭揭吓唔對路,全部都係字覺得好怪就擺低咗。」

彭導介紹自己把很多小故事結集成書,可謂「100個床前小故事」,家長可以快快讀完收工。「啲古仔好犀利㗎,你講俾佢聽吖嘛!」 千嬅 沒好氣道:「就係犀利得滯,我要將佢變成圖畫去講,即係無端端要提升埋我學習水平?好似係我要讀書喎咁樣。佢啲故事好電影化,只係一場戲,好似『我依家落去買杯雪糕,完。』點呀?我要作埋落去呀?」

鐵人媽媽靠飲咖啡提神

千嬅 早前許下生日願望,希望Torres入到一間好的小學,去年更減少工作照顧小朋友,曾揚言一解決了Torres的入學問題,就可以更專心工作。千嬅 一向緊張囝囝的學業,但囝囝乖巧,教功課都未算勞氣,「對住彭導演仲勞氣,成日要乞求劇本!」

既要工作又要湊仔,對在職媽媽來說,一日24小時都不夠用,千嬅 靠飲咖啡去保持醒神狀態,「總之唔好俾自己瞓,工作期間保持精神抖擻;返到屋企見到個仔就好開心㗎喇,所以冇問題。」千嬅自封鐵人媽媽,拍戲的三十多日中,她朝早七時起床與囝囝打招呼,之後瞓到返夜班,如果拍通宵,朝早收工先送囝囝返學,再回家抱頭大睡,連丁生都讚過她萬能媽媽,無論幾忙都會抽空陪囝囝,千嬅說:「佢客氣啫,佢驚我叫佢買車畀我,哈哈!」

30多天的拍攝期間,千嬅 沒有帶囝囝去片場,一來時間不適合,二來避免分心,到電影上畫都不會帶囝囝入場,她坦言很少帶他看自己的電影,因為年紀不適合,唯獨一套《五個小孩的校長》。「佢開始讀書喇嘛,佢睇得明,會跟住小朋友啲線去,佢問我:『媽咪,點解啲小朋友咁慘冇得喺屋企做功課?』我話係呀,所以你好幸福,你要乖乖哋,好多小朋友都好獨立㗎。呢套戲就啱佢睇喇,可以從中教佢。」

感情不要忘初衷

至於會否開拍下一輯,彭導打趣謂可能拍春嬌停經。「故事發展好難講,可能係有咗,可能係詐糊,亦可能係停經。」 千嬅 聞言立即落閘:「未停經前已經反面啦,套戲再拍落去仲唔提早停經呀?就嚟心臟病呀對住你咁耐!」

千嬅 希望觀眾睇完第三集《春嬌》,對自己的感情能夠有所啟發,希望大家能忠於自己的直覺而行。「你嘅直覺可能係你嘅命運,千祈唔好迫自己。中間有咩問題或者結果唔好,至少你呢個經歷係開心,所以要忠於自己生活,不忘初衷。每對情侶一經歷咗長時間,必定會遇到樽頸位,即使結婚後20年、到50歲都會有問題,點去解決?不如諗番以前美好時光,點解會認識同愛上呢個人,就係因為我哋唔記得咗,先包容唔到佢嘅決點,當初呢啲缺點都係你愛佢嘅理由,我覺得大家都應該要諗下以前嘅開心片段。

 

你有獨家湊BB心得嗎?