胡諾言 陳琪 流產 後喜迎B仔

育兒

TVB夫妻檔胡諾言(胡仔)和陳琪(June)結婚七年,育有兩個囡囡六歲的芷苓(Jay Jay)和三歲半的芷悠(Jacey),今年10月中將喜迎第三胎細仔Jayden。外界紛紛恭喜他們追仔成功,但同時指出他們不應為追仔而冒險,他們大呼冤枉,自 流產 經歷後早已打消生育念頭,一家四口樂也融融,但上天要安排奇蹟,他們阻擋不了。

 

撰文:Ling 攝影:Sing Ho(部分相片由受訪者提供)
化妝︰Pheobe Y 髮型:[email protected] Corner(Jack)
服裝:Adidas、Ted Baker(Jack)、Stylist’s own(June)、Elle、Dr.Kong(Jacey & Jay Jay)
造型:王碧姬(部分)

三年前,陳琪曾懷有第三胎,但陀至七周大時,胎兒突然停止心跳,需立即進行人工 流產 ,險流血不止要切子宮保命,醫生指再懷孕機會極微。自此兩人無意再生育,June亦已年過40,她坦言兩人不易有BB,頭兩胎也刻意計算11個月才成功,完全無想過會再有懷孕機會。可是,沒有計劃反而有奇蹟,今年竟發現再度懷孕,更一索得男!

流產三年意外懷孕

讀者可能會反駁,如果沒打算懷孕,就應該避孕。June坦言,醫生曾告之再懷孕機會極低,而且自己年紀大,那有可能?「咁大年紀邊會咁易有意外……原來真係會,我以為妹妹仔先有。同埋我陀Jay Jay同Jacey係好刻意去造,計好晒日子,都造咗11個月先有,以為今個月會中,噢又唔中!所以當上天要俾個小朋友你,係冇得選擇,如果佢唔俾你,都冇得問點解。」她回想,今次中獎的日子應是一家人去日韓滑雪的前後,「一定唔係旅行中,去旅行帶住一家大細去玩到爆,邊有精神造?一定係made in hong kong。」

眾所周知胡仔希望追仔,但見到太太流產的傷痛,怎忍心要求太太再努力?胡仔坦承自己是潮州人,思想傳統,但不能逆上天安排,「話唔想有仔就呃你嘅,但唔輪到我安排㗎嘛,想生仔嘅觀念喺頭兩胎強烈啲,到第三個意外小生命,我哋咁難得有,仲邊有得求男仔定女仔,我哋都冇追仔壓力。今次由兩個變三個,我哋已經賺咗。」

流血過多險切子宮

三年前的懷孕,兩人以為早有經驗,輕視了腹中胎兒,當時胚胎發育不佳,突然停止心跳,最後要人工流產,胡仔仍未知驚。「無諗過係咁嚴重,出血咁多,最壞情況仲要切子宮!當時我哋梗係唔開心,始終第一次面對,開頭都唔識處理,好彩我哋有一班老人家同兩個囡囡,每次返到屋企都好開心,絕對幫到我哋去平復。」當時June要拍劇,受到情緒困擾,幸得胡仔不斷開解,「其實都唔緊要啦,上天係要咁做一定有原因,如果夾硬去冒險,都未必係好事,所以我哋好快就忘記咗。」

胡仔笑言,自己是一個充滿正能量的人,屋企有這個「正能量爸爸」就無有怕。「我成日同太太講,我係一個正能量嘅人,諗好多正面嘢,你黐住我唔使驚啦!」

最驚BB無心跳

兩人早已將所有BB物品轉贈友人,不再留戀生多個。當拋開了一切包袱,好好享受一家四口的日子之際,竟然有奇蹟降臨,年初證實再添一名小生命,兩人異口同聲道:「唔係呀嘛?機會咁微都有?」再懷孕後June又驚又喜,始終都有流產陰影,好驚今胎又陀不穩。「我哋去睇醫生都好大壓力,不過醫生好好,佢話我最重要係休息,唔好再諗其他嘢,專心陀好呢個BB,所以我好聽醫生話,除咗做嘢,我喺屋企瞓咗兩個月。」

大肚婆疑心重重,June好驚胎兒又冇心跳,缺乏安全感,經常上網搜尋資訊,甚至想買胎兒心跳機,時時刻刻有得check,「成日都好緊張,驚個胎冇心跳,我又feel唔到……醫生就安慰我話,佢部儀器咁多錢先check到,你哋喺街買幾百蚊部就想聽心跳?嘥鬼氣!」醫生指懷孕十幾周開始會聽到心跳,「但十幾星期都好穩陣,你都唔使買啦!你享受吓嘔啦,嘔即係BB喺度!」

細女踢爆陀仔

直至陀B五個月,兩人才向外公布懷孕。寧可信其有,不可信其無,他們選擇聽從師傅的建議,到五個月才公布,亦已擇好日子剖腹,June說:「師傅既然咁提議,應該有佢原因,如果佢話着紅色衫好,我都會着㗎,總知人哋話好,我都會做!」有時迷信只但求安心,只要不是過分迷信,做少少事情能安定情緒的話,對陀B也有幫助。

最近兩人終於宣布陀仔,原本打算一直守秘密到出世,點知二女Jacey在公開活動上踢爆:「媽咪個BB係細佬嚟㗎!」兩人知道童言無忌,當然不介意Jacey爆響口,June笑說:「佢會喺街度話『媽咪,我想買呢個俾細佬!』家姐就講,『爹哋話唔可以話俾人知係細佬嚟㗎!』我哋叫佢哋唔好再講,佢哋就會繼續問『唔可以講係細佬咩?』算啦,遲早都會講。」

細佬送家姐碌架床

兩個囡囡已不太記得曾有一個小生命出現過,因三年前她們只有三歲及一歲,不太懂事,但當時胡仔都有作出適量輔導。「我同佢哋講,個小生命要做啲手術,不過唔緊要啦,總之姐姐要錫妹妹,妹妹都要錫家姐。反而今次佢哋好識性喇,我話有多個小生命,你哋會點樣做呀?出世後會去邊度玩?買啲咩俾佢?有咩玩具可以一齊share?佢哋係好開心,瞓覺前都會錫錫媽咪個肚,同細佬講goodnight。」

June笑兩個囡囡最開心搵細佬做藉口,大肆扭買,甚麼都話要買給細佬,惟有暫時對她們作出寬限!「依家小朋友真係好醒,尤其係氹我買嘢,個女話你買呢件玩具俾我學咗先,我再教番細佬,成日都講呢啲對白,兩個都係老千嚟㗎!」講到最想要的東西,兩個囡囡一直渴望瞓碌架床,可以爬高爬低好好玩,June決定代細佬送她們一張碌架床。「原本諗住出咗世先換,但最近執緊屋企啲位,決定趁暑假一次過搞掂佢,當係送俾兩個女嘅禮物啦,上格擺兩張床,唔使爭喇,細佬瞓下面。佢哋好開心,覺得因為細佬先有。」

德望多quiz 培養恆常溫習

June的預產期10月中,已懷孕八個月進入大直路,但她沒有太多時間休息,現正值九月開課大日子,她忙於為囡囡開學。Jay Jay今年升小二,Jacey升K2,兩姊妹均就讀德望學校,讀書重任一向交由June主理,德望雖貴為名校,但她覺得校內讀書壓力不大,兩女亦讀得開心。「我作為家長唔覺得大壓力,坦白講,考試係冇書溫,咁細個有幾多嘢考?只要平時逐少咁溫,考試前佢已經識晒㗎喇!」

家長經常投訴講默書測驗多,令學生好大壓力,June寧願多quiz和默書,促使學生平日多溫習,考試就不用臨急抱佛腳。「學校個個星期都有quiz,幾好呀平日同你溫晒書!反而考試嗰幾日我鼓勵佢瞓晏覺,因為考試會早放,三四點瞓醒我先同佢review,直到晚飯瞓覺,咁樣對小朋友同家長都冇咁大壓力,依家我個女最鍾意考試,因為又早放,又冇功課吖嘛!」

 

Save

Save

Save

Save

Save

你有獨家湊BB心得嗎?

更多精選內容