薛家燕

薛家燕遭夫拋棄欲輕生 幸子女救一命|流行經典50年

育兒

廣告

流行經典50年》播出兩年多,當中節目的「台柱」薛家燕就因要舉行巡迴演唱會,以及處理其他工作而要退出節目,今集(7月14日)更是薛家燕所錄影的最後一集。現年69歲的薛家燕已入行61年當年憑《真情》「好姨」一角而人氣急升,8歲入行做童星嘅家燕姐婚後退出幕前,相夫教子,卻沒想到會遇上婚姻觸礁,最難捱嘅時候她想過輕生,幸而子女救她一命。現在苦盡甘來,子女們都事業有成,家燕姐更有位拍拖13年嘅圈外商人男友,雖然男方兩度求婚但都被家燕姐婉拒,箇中原因她娓娓道來。

撰文:Sunday Kiss|圖片來源:新傳媒圖片、劇照、微博、薛家燕Facebook專頁王梓軒微博石耀庭Instagram

薛家燕憑「好姨」再創事業高峰

TVB經典的處境劇《真情》又重播,當年從1995年至1999年,橫跨4年時間播出,合共播出了1128集。相信今次重播,會陪大家到2023年!《真情》已經是23年前的劇集,但卻是TVB最經典的處境劇,現在好多人見到家燕姐仍然會叫佢做「好姨」,家燕姐飾演的好姨是個爽朗率真的「師奶」,雖然有點潑辣,但當家人或朋友遇到困難時總是會挺身而出,說話也坦白而且熱心助人,角色相當討好,劇集出街時深得觀眾喜愛。

《真情》唔止捧紅咗不少演員,不少資深的演員如李司棋、薛家燕因為呢套劇再次爆紅。

不少演員因此劇而人氣急升更成演藝涯的代表作,比如張慧儀鄭子誠、馬蹄露,而不少大台日後的當紅小生、花旦如郭可盈、蘇玉華、陳錦鴻、劉愷威、滕麗名、馬德鐘、謝天華、黃智賢都出演過。

奪萬千光輝演藝人大獎

68歲的薛家燕在去年奪得萬千光輝演藝人大獎,家燕姐講感言時表示要感恩,演藝生涯已60年實在不簡單,她特別多謝曾勵珍找她拍《真情》,是她人生轉捩點!當時很辛苦,但從來都沒有跟公司說辛苦,又多謝樂小姐及余詠珊小姐給她的支持及協助,家燕更講到喊:「TVB呢個大家庭係畀我好大支持,當中包括幕後及一班合作過嘅藝人,有時唔記得食嘢買埋畀我食,我慳埋好多,我會繼續努力報答大家。」

由胡楓、黎小田頒獎,頒獎前黎小田指得獎者「事業心重」,胡楓又指她很勤力是偉大母親,未頒已呼之欲出是薛家燕。家燕姐今次攞獎唔着登基黃袍,反而以全紅色登場。

《真情》演員聯誼

家燕姐人緣甚好,年年生日都有大批朋友同排住隊同佢慶祝生日。前年家燕姐就喺社交網上載咗一班好友同佢慶生嘅相片,當中有無綫高層曾勵珍、劉丹、劉愷威、馬海倫、林漪娸等,呢個組合之唔係無綫經典長壽處境劇《真情》入面嘅人物!劉丹係「叉燒炳」、劉愷威係「安仔」、馬海倫係「Helen馬小姐」、林漪娸係「小梅」!

家燕姐留言:「今天很開心,雖然我的生日已過了,但真情的一班同事,還抽空和我補做生日,謝謝珍姐、漪娸、馬海倫、丹爺、劉太,最難得的是愷威也在港,大家樂也融融的相聚,談笑風生,回憶往日的事,多愉快的一個晚上,再次謝謝大家。」

七公主其中一員薛家燕紅足半百年

60年代係七公主嘅天下。身為其中一員嘅薛家燕,8歲就入行做童星,直到今日家燕媽媽仍然係廣告商同埋監製嘅寵兒,可謂紅足半百年。只是80或90後嘅你,可能只係見過家燕媽媽風光嗰一面。其實當年佢試過由事業高峰期急流引退,經歷人生低潮,一度諗過輕生。但為咗仔女,重新振作同生活搏鬥,捱出重病,重差啲同大家緣分已盡。一個女人,帶住3個仔女,經歷起起跌跌。今時今日,家燕媽媽仍然心境豁達,驀然回首,當年嘅一切只不過係人生路上嘅幾塊小沙石。

拍1日戲就買到1個單位

粵語片時代,成個東南亞都係七公主嘅fans。家燕媽媽當年重讀緊書,但係已經搵唔少錢。「初初入行搵10蚊日,後來變成萬幾蚊日。當年萬幾蚊可以買到個單位喇!以前大家嘅巴士月票個套都攝晒我哋啲相,放學又有好多人喺學校門口等我。」銀色旅途看似順利,可惜70年代粵語片開始式微,七公主主將陳寶珠同蕭芳芳放低演藝事業,走去美國讀書。而當年19歲嘅家燕媽媽,就被揀中簽約過日本接受培訓做歌手。

「當年我喺日本training半年都未出碟,做新人得$8,000個月,連食宿都唔夠,重要爸爸寄錢俾我生活。雖然真係學到好多嘢,但爸爸就覺得浪費咗 我最黃金嘅時間,因為我未train之前已經係女主角。當年兩個經理人都係日本人,佢哋對我好好。但係爸爸係華籍英軍,佢以前同日本人打過扙,怕我嫁俾日 本人,所以最後就叫咗我返嚟。」自細就行緊條風順路嘅家燕媽媽, 呢次港、日兩地嘅事業一鋪清,遇上人生中嘅第1次失落。

前夫失蹤 慳啲使

返到香港,家燕媽媽拍咗幾部國語片,人氣又再回升,重喺東南亞接咗好多登台jobs。之後4年,佢更為麗的電視(亞視前身)主持代表作《家燕與小田》。點知家燕媽媽重振雄風後,選擇急流引退。「當時我已經28歲喇!我係個好傳統嘅女人,我覺得應該要結婚。」家燕媽媽成為人妻之後,退出娛圈,開始發展錄影帶生意。

曾經諗過跳樓

「當時生意做到好大,我攞咗無綫同亞視嘅劇集代理權,星馬人要睇劇,就要同我租帶。」之後佢誕下3個仔女,表面上一切都幸福如意,但家庭觀念好重嘅家燕姐,呢個時候就遇上人生中最不如意嘅事。「當時我前夫失咗蹤,好無奈……3年來完全搵佢唔到。我帶住3個仔女,都要生活㗎!惟有慳啲使。曾經試過做保險同埋地產,但係我又唔夠厚面皮。試過自薦做《婦女新姿》嘅主持,但監製以為我係少奶奶,重覺得我講緊笑,當時真係好苦惱、好擔心。」

再堅強嘅人,都有脆弱嘅一刻,家燕媽媽當年1個人擔起頭家,差啲因為經濟問題而自殺。「當年我連住緊嘅屋都差啲被人收番,本來諗住跳樓,已經爬咗出窗,好彩我啲仔女叫住我。我望番轉頭,個大女攬住我喊,個仔就話:『我買咗薯條俾你食呀!』當時我就諗,班仔女都咁懂事,我唔應該揼低佢哋。」

家燕媽媽公開離婚之後,《真情》嘅監製就想搵家燕媽媽演好姨一角,起初佢都好掙扎。

「開頭我推咗監製,因為大女覺得好姨呢個角色好乞人憎。當時最細個女得3歲,拍劇要捱夜,冇時間睇住啲仔女,而且酬勞亦唔多,得$2,000集。」最徬徨嘅時候,家燕媽媽遇上曾經公開傾慕佢嘅知己黎小田。「黎小田知道我離咗婚,重話:『早知嫁俾我啦!』哈哈!同佢傾開先知,當時管藝員科嘅同事Ben Chan,係《家燕與小田》嘅工作人員,於是佢就幫手聯絡珍姐(曾勵珍),搵我上去傾下加人工囉!」就咁促成咗個膾炙人口嘅角色——好姨,同時亦造就咗家燕媽媽第3個事業高峰。

出唔到院 寫定遺囑

拍《真情》呢段日子,係家燕媽媽成世人最忙、最難過嘅日子。「嗰時好多人搵我拍廣告,但係我冇經理人、冇司機、冇助手,惟有自己mark檔期。返到屋企已經12點幾,又要睇仔女啲功課,背劇本背到3點,晨早6點又要起身送啲仔女返學。《真情》後又拍咗《皆大歡喜》,頭尾加埋差唔多10年冇停過。

「曾經試過搵唔到工,養唔起班仔女。當年冇諗過可以紅到而家,所以一有機會,就梗係接啦!拍《富貴門》嗰時,因為卡士大,啲期好難就。開拍之前我一次過割 咗痔瘡同埋膽石,割完之後就即刻開劇喇!當時成日都心口痛,於是就入院檢查,點知原來膽管、胰臟同腹膜都發炎,加上又肺積水,已經出唔到院。」百病纏身,當時家燕姐已經寫定遺囑。「好記得阿肥(沈殿霞)當年都係割咗個膽,跟住就覺得周身唔舒服,同我嘅情況好似。3個仔女都喺美國,touch wood有咩事我都要同佢哋有個交代。」好彩,家燕媽媽大步檻過!

投資蝕3分1身家

曾經有間大學搵咗3千個小朋友做過調查,問佢哋心目中嘅爸爸媽媽係邊個。結果,佢哋揀咗李嘉誠做爸爸,而家燕媽媽就係佢哋心目中嘅媽媽。「我唱兒歌同埋製作兒童書籍,係想帶動小朋友有個好思維。所以我就向學校推廣《弟子規》一書(由家燕媽媽演繹孔子嘅教誨故事),引導佢哋學識德育嘅重要。」

家燕媽媽坦白承認,而家辦學(家燕媽媽藝術中心)同埋搞品牌,比拍戲搵得更多。「當時唔識投資,而家識嘛!不過幾年前我都試過因為投資而蝕咗3分1身家。但係我唔會去諗喇!又唔係我1個人蝕。最近我都蝕咗7位數字(股票),其實只係個數字,我唔放都唔叫蝕咗。」

由抑鬱到想輕生,直到成為搞笑高手,氹番人開心,家燕媽媽睇得好開。「做嘢嘅過程會遇到好多困難,會諗唔到解決方法,我就同自己講,識得解決嘅事就做,唔識嘅就求救,如果人哋都幫唔到你,就擺埋一邊唔好理,船到橋頭自然直。惟有以呢種心態,先至可以面對挫折。」

細女在「母親的抉擇」做社工

家燕姐大女石祐珊早年在社交網站分享妹妹畢業禮的照片,留言:「Proud of this little one today !」見佢哋一家四口笑容滿面,尤其是家燕姐笑到四萬咁口,梗係啦!囡囡學有所成,而二子石耀庭6月成家立室,家燕姐更準備飲新抱茶,苦盡甘來,相信佢覺得好安慰!

家燕姐為珠珠引以為傲,早前她透露女兒自到泰北做義工後,感受幫助別人的喜悅而立志做社工。原來珠珠願望達成,現在於「母親的抉擇」工作做社工。而大女石祐珊在IG晒出合照,並留言:「Proud of this little one today(為你驕傲)#masterofsocialwork #smartestinthefamily #hku」見石耀珠着住畢業袍戴埋四方帽,笑得好開心!

兒子求婚成功薛家燕喊埋一份

薛家燕的30歲兒子石耀庭(Jackson)目前從事幕後製作,去年四月,在家姐石祐珊及好友王梓軒協助下,向圈外女友求婚。他向圈外女友Zoe表示要去看好友王梓軒的綵排,抵達九展後突然由石耀庭換上歌手位置向女友自彈自唱《愛很簡單》,接著更跳出電影《星聲夢裡人》的舞,最後更以99枝玫瑰及戒指跪地求婚,令女友Zoe感動落淚並應承求婚,家燕姐都感動到喊埋一份。

見證兒子成家立室 家燕姐恨抱孫

家燕姐當年被前夫石保慶拋棄,她做單親媽媽母兼父職,十多年不眠不休咬緊牙關養大三名子女,現在子女均長大有成就,29歲的孻女珠珠(石耀珠)學有所成,在香港大學碩士畢業後現在於「母親的抉擇」做社工,二子石耀庭去年在洲際酒店舉行婚禮女友陳素怡(Zoe),家燕姐十分緊張阿仔的婚事,送樓送首飾、包辦兩場盛大婚宴等,夾夾埋埋豪擲4千萬娶新抱。

薛家燕:終於等到這一日

提到囝囝石耀庭和新抱Zoe早上敬茶令她感觸,她不禁眼濕濕,感覺終等到這一日,坦言下午簽紙儀式一對新人講誓詞一剎那更是喜極而泣,她說身旁的襯家都一樣,而她只哭了兩次而已。薛家燕在上台致辭時激動地哭道:「Jackson今天事業有成,還可以成家立室,我真係好開心,因為我等咗呢一日好耐,對唔住,唔好意思,我頭先仲喺下低諗,等一陣上台唔會咁(哭)⋯」

而在家燕姐上台前,他的囝囝致辭時也禁不住哭道:「我哋能經歷到撐到過去,我相信以後沒有事可以難倒我哋⋯」之後一對新人仲獻花給家燕姐及女家父母!

薛家燕 自爆拒婚原因

薛家燕去年被傳媒影到有個比佢年輕十幾年嘅圈外商人男友,而呢段姊弟戀原來發展了13年,男方更兩度求婚,只是被她婉拒。

事後記者問到現在感情穩定,會否再進一步再婚?家燕姐說不會打算再婚,更加莫說要閃婚:「年紀都咁大,好開心有個傾得埋嘅朋友,都諗住演唱會之後抽多啲時間陪家人同埋…………喜歡嘅人,其實我心入面都有啲內疚,咁多年都好忙,所以今個聖誕都推咗演出,可以去開心吓,同家人諗住去歐洲,但阿女話歐洲聖誕節好多地方都唔開,所以仲度緊。」

她透露男友曾經也希望結婚,但已適應現時生活,最緊要兩個人開心。講到三名子女都接受男友,家燕姐表示起初都有擔心,始終男友比她年輕多年,但對方一直待她很好,仔女也放心。

問到男友如何打動她?家燕姐表示對方雖然偶爾細路哥及好大懵,但整體而是相當成熟能夠照顧她,而每個生日男友都會提早一個月約她去慶祝,問到會否帶男友現身嚟緊嘅演唱會,她說:「會帶佢嚟睇,佢一定支持,但想低調啲!」

薛家燕 男友是國內商人

家姐姐喺訪問中透露,對方係一個喺上海創業嘅商人,兩人係透過朋友介紹認識,好傾得埋,完全冇因為年齡問題而出現障礙。男友曾經兩次求婚,但係家燕姐一直都未有答應,一來係兩人年齡有差距(家燕姐今年69歲),二來係因為上一段婚姻,仍然對家燕姐留有好大嘅陰影。

而大女珊珊亦都表明,三姊弟都好支持家燕姐呢段感情,以前見到媽咪有人追,都會擔心對方唔知係咪對媽咪有咩目的,但係經過13年嘅觀察,深深感受到對方對媽咪好好,好細心。但係因為對方唔係圈中人,所以家燕姐會繼續保持低調,好好保護呢段感情。