教仔

【小創夢家】醫生與治療師 科學理論教仔法

育兒

廣告

父母永遠給孩子最好的,James與Sandy兩夫婦決定送女兒一份無價寶,結合二人的專業,自訂湊女經。James是兒童行為治療師,Sandy是精神科專科醫生,見盡港孩百態,深知現今父母教仔不容易。在育兒理論滿天飛中,面對實況時,許多父母不知如何是好,他們決定採用創新教育,將女兒的禮物公諸於世,跟眾父母摸着石頭過河,學做個好爸媽。

天性鬧脾氣

英文諺語”Put yourself in other’s shoes.”穿上對方鞋子的意思是站在別人立場看事。兒童行為治療師葉偉麟(James)與精神科專科醫生梁婉珊(Sandy)兩夫婦均知道,孩子的鞋子很細小,爸媽能穿上鞋子的方法是把自我縮小。他們指出孩子扭計發脾氣,家長千萬不要打鬧嚇,須知道人類大腦的杏仁核像防衞系統,遇到危險時會發出訊息,是每個人天生就有的能力,孩子害怕、肚餓、不滿足而哭鬧,大多數是杏仁核發作!跟人的天性硬碰硬,不會有好下場。二人對於小朋友教養理念是一致的,皆認為建立小朋友自信、EQ等內在素質非常重要,而條件是父母需要透過解讀孩子的情緒,順應孩子腦部發展來培養之。

理性與感性互補

Sandy偏向認識多理論、了解有關腦部發展。而修讀戲劇、心理學的James,擅長觀察孩子的內心世界。他們工作上同樣會接觸到小朋友,Sandy解釋自己如同偵探:「例如好多時小朋友唔返學只是問題表徵,問題根源就要搵佢出嚟,可能係千絲萬縷原因,可能俾人蝦、跟同學老師相處不來、不適應學校教學模式、學業遇困難等等,又要了解整個家庭環境、是否有細佬妹出世、父母之間的關係……之後,醫生就要留意小朋友係咪過度活躍、自閉、讀寫障礙等等。」
James偏向運用心理學,展示小朋友內心真實世界。「象徵遊戲治療方式好適合小朋友,例如有三歲小朋友好憎爸爸,佢拎住鱷魚公仔問佢係咪壞人,拎住壞人去沙盆埋咗佢,一路講我唔鍾意你、我唔照顧你,其實佢將爸爸成日同佢講嘅說話講出嚟。在安全環境下,重新將小朋友情緒釋放出嚟,我會包容佢嘅情緒,然後好似一塊鏡,將佢情緒、思想、動機、行為反映俾佢睇,因為佢要識得控制自己、做番啱嘅行為,第一步要自覺。」

愛心+包容+四部曲

育有約15個月大女兒Natalie,James與Sandy分享教育方法使用四部曲。教女兒時,第一步察覺自我情緒,記得生氣時不是教仔好時機;第二步確認孩子背後的情緒,例如說出媽媽感受到你好唔開心;之後聆聽及接受心聲;最後反射情緒、思想、行為和動機,有同理心去代入孩子角色中。另加無限愛和無限包容。James說:「女兒15個月大,正在學習相信世界,譬如佢肚餓喊,有人覺得好煩唔想理,其實係要第一時間安撫佢情緒,試多幾次,佢會腦中記得原來爹哋媽咪喺度,實踐依附理論。」
Sandy補充:「阿女唔鍾意人餵佢食嘢,但食到周圍都係、成身都係,其實要容忍,真係好唔容易,自問要好有耐心和愛心。」為了統一教女法,兩公婆會叮囑外傭,James說:「同佢講由得小朋友食嘢食到周圍都係,食到成塊面係都無所謂,因為阿女要搞吓食物質感。有小朋友6、7歲食都周圍都係,原因係以前無試過食嘢整污糟。工人姐姐大部分係『目標為本』,幫你做最快,唔好阻我做嘢,企企理理最好,成身都係我又要執,係浪費時間。」

兩夫婦合力湊女

堅持照顧女兒不打不罵不發脾氣,耐性要極好。Sandy說:「我哋同好多香港家長一樣,放工後會無電,有時想愉懶,遇到咁啱阿女爆喊,真係會有壓力,好彩可以分工,佢(丈夫)真係100分。」在旁James表示父母宜分擔照顧孩子,當見到女兒搗蛋,察覺自己原來好嬲。他說:「老婆,我依家好嬲,要搵一個唔嬲嘅人對囡囡,我要時間冷靜。我知道勞氣教仔永遠都會出事,對小朋友有個深遠負面影響,小朋友有需要先喊,但你鬧佢,佢察覺原來我嘅需要唔會被滿足,就學會唔信人。」Sandy直言他倆那樣堅持,是深信對女兒做的事會影響孩子一生,長大後或會難自我處理情緒,一想到此,他們自會出現耐性,發揮專家的技巧。Sandy有感近年小朋友壓力較大,他倆計劃不讓女兒讀傳統學校,考慮讀國際學校以便日後往外國升學,又或入讀用蒙特梭利教學的幼稚園。「最緊要開心,唔開心情緒唔好,無一樣嘢掂。」

培養自信心

現時很多小朋友缺乏自信,早早承受學業壓力,「有氣無碇抖」似的。James分享:「有個小一女生一個星期上足七日興趣班,嚟呢度唔會亂掂嘢,好拘謹,有一日我囡囡嚟到周圍搞,女生媽咪問點解我個女咁好奇,跟佢個女好唔同。其實係媽咪一直唔俾阿女做,阿女就一直縮、無自信唔enjoy,之後更唔願返學。」自信心是面對問題的素質之一,兩夫婦望建立女兒信心。「唔可以咩都唔俾Natalie試,多讚賞。例如佢幫狗仔抹身,讚佢Good Girl!又或好簡單講『你幫狗抹身,好叻喎!』就可以。」Sandy分享。
「我哋唔主張太細個學好多嘢,會上兩歲班、學興趣班,但唔會係珠心算這類。芬蘭教育六歲前唔俾學寫字,但全球出得最多學者、科學家、諾貝爾獎就出自芬蘭,點解呢?就係細個無催谷。Natalie好快識行,行得好穩,會安排郁身郁勢放電活動俾佢;音樂也可以試一樣,對發展好。學術唔愁,依家上網咩都有,最重要是learning to learn。有自信、獨立、有學習能力,去到邊都唔驚,呢啲係內在素質。」James堅定地說。

出書送女兒兼分享

兩夫婦走在最前,接觸不少小朋友,決定寫書送女兒,並跟眾家長分享。James說:「三、四年前,一齊去美國心理學學會的學術會議,全球好多學者去分享新研究,包括親子教育。外國唔會獨立學術還學術,實戰還實戰,好想將嚟樣嘢帶返香港,就計劃寫書。」
將科研及學術資料變成爸媽每日都用到的技巧,Sandy坦言不容易。「我偏向學術方面,好想將多些理論寫出嚟,但就會好悶,最後做咗好多修改,先可以取得平衡。我同丈夫合著,期間好多拗撬,為了呢本書,鬧過好多次架。」James解畫:「大家出發點唔同,覺得『重要』不同,如果當我係Layman(外行)去睇,呢啲會唔會多得滯?會唔會好悶呢?」《父母一句話,啟動孩子解難力》有血有淚,幸好他倆滿意成品。

後記:語言的威力
從《父》一書發現一句話的力量可大。「你想點?硬係同我作對?」、「點解你唔似人哋咁叻?」、「立即收聲唔好喊!三!二!一!」、「咁蠢!咁簡單都錯!」、「你一定係天才,聽日考試都唔溫書。」、「你成績咁差,大個乞食啦!」以上指摘反問、比較、威脅、侮辱、冷嘲熱諷和預言句句入肉,一下子就足以破壞關係,切記慎思慎言。

●撰文:Esther Ngan
●攝影:黃大立(部分相片由受訪者提供)

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。

常見問題

國際學校會有Logic Test?

部分學校會有Logic Test,有不同的圖畫及問題,考驗學生的邏輯思維以及認知能力。

你認同嗎?

更多精選內容