陸永

陸永成吸金王 爭取時間湊女放學

育兒

廣告

要在演藝圈發展,除了要靠自己的實力之外,更要靠自己的運氣。組合農夫的陸永近年為衝刺事業搏到盡,他轉數快而且在歌影視以及廣告方面瓣數多,短短幾年間已經成為「娛圈吸金王」!陸永為養家活兒,絕對犧牲不少親子家庭樂,早前他又出發倫敦同鄭裕玲拍新一輯《Do姐去Shopping》,留港時間所剩無幾,加上他向來自理能力偏低,全靠有個靚老婆一打十打理得頭家井井有條。日前,陸永趁出發去同Do姐拍節目前,為幫輕老婆兵分兩路湊女放學,做個稱職爸爸在囡囡面前搶分。

編輯:Sunday Kiss|原文:東方新地|圖片來源:新傳媒圖片庫,陸永Instagrammissussix@Instagram

陸永靠湊女搶分

結婚八年,分別育有7歲陸一穎(Hannah)同5歲陸一心(SimSim)兩個寶貝女,婚後陸永瞓身賺錢養家之餘,亦都出名錫到老婆Reina燶。咁又難怪,Reina唔止靚女出得廳堂,亦都十八項全能湊女煮飯跟功課幫女扮靚樣樣耍家的生活智慧王。陸永年終無休搵食至上,難得放假做替工湊一次女,總在社交網絡忍不住慨嘆老婆持家有道樣樣安排井井有條,又自爆搵食以外係生活白癡,未考車牌出街要依賴老婆、日前連床頭電話叉電過熱自燃險爆都照樣沉睡,多得醒目老婆及時出手「多謝陸太嘅嗅覺救咗我條命,亦都為世界挽救了一張美好的臉!」

分頭湊女sweet爆

《婚姻合伙人》憑飾演毒男入型入格的陸永人氣再升,工作排山倒海又要出埠同拍檔C君跟住Do姐去倫敦,陸永自知身不由己經常缺席家庭生活,臨上機就爭取時間同老婆分工湊女。今年七歲的Hannah已入讀西貢區小學,SimSim就仲喺九龍城讀緊幼稚園,日前照舊由陸太Reina做司機先車陸永出九龍城接細女,陸太再入西貢等大女放學。

父女的時光

平時由朝六叫醒兩個女食早餐返學,直踩到夜晚沖涼瞓覺都未見Reina呻攰,呢日下午至出發湊細女前,陸永都精神不振咁個樣,要先買杯咖啡提提神。不過開工幾攰幾唔夠瞓都好,寶貝女提神功效絕對強過杯啡,幼稚園打鐘放學一見個女出現,陸永一秒打醒精神仲四萬咁口,兩父女拖住手過馬路、截的士會合老婆同大女時,一路說說笑笑打打鬧鬧,呢一刻父女時光開心無價,相信陸永都搶回唔少分!

貼心老婆

陸太果然如陸永形容持家有道又細心,放低老公再揸車入西貢,先去麵包店買個蛋糕仔畀返足成日學剛升小的Hannah醫吓肚。

老婆笑唔識揸車同踩單車,大熱天時永遠著厚衞衣嘅陸永,早前曾話為影低兩女生活照去學影相,去到英國更教Do姐影相,最後卻被Do姐笑呢位陸大師係威係勢,但影相outfocus。

搵食身不由己,不過陸永呢個老竇盡量做到滿分,平時錫到老婆燶,知個女好想睇BTS男團演唱會,仲出動埋Do姐撲飛!

離家有牽掛

陸永自知工作忙碌錯過不少親子時間,上周出發倫敦前陸太帶埋兩個女送機,陸永仲喺社交網呻冇得陪女過生日、又冇得陪生B愛貓坐月,呢次離家好多心事未了。