DJ朱薰 輕鬆面試之皇

育兒之道：鬆得嚟緊

為人緊張的朱薰常自言：「我好有潛力成為怪獸家長！」幸而有個鬆過鬆弛熊的老公——Mr.成員Dash（譚健文）的孖生弟弟譚健榮，當自己如橡筋拉得太緊時，會出手彈鬆她。面對着硬頸的兒子，兩人一凹一凸的性格揣摩到「鬆得嚟緊」的教仔法。在教導過程中，朱薰發覺不能與兒子硬碰硬，打罵喝只會令他大發脾氣，故嘗試花唇舌去說服他。「用鬧嘅方法佢未必真心順從，我同佢解釋點解要咁做，可能要多花時間講多幾次，就算佢細個未有認知都照講，其實佢明㗎。」
別以為孩子還小不明白，其實只要耐心解釋，孩子一定會明白，只要願意踏出耐性的第一步，往後就會愈來愈順利。「可能開頭要講五次先做，下一次講三次就做到，再大個啲可能講一次就得！係好㗎，訓練父母EQ，但到依家我都覺得好有用。」

「鐵面媽媽」對付Trouble 2

之仔剛滿三歲，度過了Trouble 2的階段，有人不叫Trouble 2，改了一個更恐怖的Terrible 2，可見湊兩歲小孩的挑戰性！兩歲孩子開始有自己思想，懂得表達感情，之仔也經常表達「唔肯唔做唔鍾意」，朱薰的解決方法是跟他一樣堅持，變身「鐵面媽媽」，有次早上之仔要刷牙洗面上playgroup，他扭計不肯刷牙，朱薰亦寸步不讓，堅持要他刷牙才讓他出門，結果寧願放棄上playgroup，都要他刷牙。換轉其他媽媽早已妥協，但朱薰覺得，一妥協他下次就會照辦煮碗，沒有準則界線了。
兩歲孩子亦開始認識甚麼是「我」，處理失當會令孩子的性格變得自我，當之仔出現如此情況，朱薰會停一停、想一想，先了解兒子的想法。「我開頭都好驚，一早打底睇好多關於Trouble 2嘅資訊，當佢開始講『呢樣嘢係我㗎！』我就會提醒自己呢個階段佢係咁嘅，我唔會第一時間話佢，而係嘗試了解點解佢咁諗，多啲叫佢講番原因。」兩歲階段能安然度過，她覺得最重要多親子溝通，了解其內心，自己亦加闊容忍度，就不會出現Terrible 2了。

考八間PN全收

朱薰一套「鬆得嚟緊」的教仔方法，令之仔去年PN報學校取得好成績，八間學校全收，最後選讀維多利亞（康怡）幼兒園，Trouble 2變Fantastic 2！以為她報了八間學校好誇張，兩母子一定好大壓力，其實不然，只要父母的心態是輕鬆，孩子in多幾間都不成問題。「我都唔想咁緊張，加上懶啦，我想輕輕鬆鬆鄧梓峰。」地區是她首要考慮，不想一家人晨早起身趕返學，另外懶得排隊取form，所以只選區內可以上網填form的學校。
最後選定了八間學校面試，沒有準備工夫，只當帶他去遊樂場玩，不給予壓力，朱薰覺得對兒子來說，去幼兒園比去百貨公司更好玩，因為幼兒園有玩具及playground，三番四次玩到不願離開！

其實連面試老師都是逗孩子玩的，看看他們能否砌puzzle，能否分享蘋果給媽媽，在無壓力的情況下，孩子表現自然會好，老師亦感受到孩子開心，必然增加印象分。「你面試時人揀你，亦係你揀佢，你去到都要睇個環境自己同小朋友鍾唔鍾意，老師合唔合乎你心水，唔係淨係諗學校收唔收我呢，家長唔使咁被動。」

維多利亞康怡輕鬆教學

現在朱薰正為兒子考K1，但因懷孕初期的疲憊令她錯過了很多報讀機會，樂觀的她沒有自怨自艾，心態反而更輕鬆。「原本諗住報六七間，點知miss咗五間過晒deadline，咁就算啦，報到咪報囉，原來咁樣仲輕鬆喎，唔使帶佢出去咁多次，錯有錯着，隨遇而安啦。」
另一選擇是升讀維多利亞同區幼稚園或其他分校，覺得該校能給予孩子愉快學習的空間，「依家阿仔返學好開心，冇話過唔想返學，PN班一早講咗唔會有功課，都係喺學校做勞作仔，有時就親子勞作，課程算輕鬆，開好個頭好緊要，等佢覺得返學係輕鬆好正嘅，往後就易行啲。」維多利亞最出名是銅鑼灣校，名人明星爭崩頭讀，康怡分校規模則相對細一點，朱薰覺得細有細好，「校長老師好快會識晒所有人，可以集中了解學生，好快話到俾家長聽小朋友嘅情況。」

第二胎陀「猴女」

相隔三年，朱薰再做媽媽陀「猴女」，湊成一個「好」字，原來起初她想生多個仔，「多個仔都OK呀，同之仔可以係好好嘅兄弟，我好想兩個關係好close，兩個仔做buddy可能仲好！依家係女當然冇所謂啦，爸爸仲開心！」老公笑言多個女可以嘗試不同感覺，想要個女都好正常呢。
現懷孕五個月的她已開始教之仔做大哥哥，迎接妹妹出世，她亦有一套說法教導之仔學做哥哥，以免他呷醋。「我話媽咪依家肚子有個baby，係妹妹嚟㗎，你就快做人哥哥喇，你知唔知媽咪好錫你吖？我用咁多時間錫你，妹妹出世後可能我冇咁多時間錫佢，因為我要錫你吖嘛，你可唔可以幫手錫佢呀？佢就話好，好似俾少少責任佢咁。」這個說法之仔好buy，最近開始識講自己大個仔，不會再做錯事，成為一個小小男子漢了！

少爺占跟風湊仔

朱薰生完第一個之後，陸續送了好多BB用品給好友，包括緊隨其後生仔的少爺占，剛好細一年，可以完全接收朱薰仔的衫褲鞋襪、玩具、BB車等數之不盡的物品，朱薰笑指少爺占教仔甚麼都跟風。「我哋住得好近，返工又見，所以我哋成日分享點湊仔。佢個仔出世嗰陣就話正呀，啱啱跟住你生，咩都你搞先，揀學校揀興趣班你識咗再話我知！」朱薰一路與少爺占分享各種經驗，包括學校面試、興趣班都有，包無行錯路！
三歲朱薰仔和兩歲占仔Timmy一樣老友鬼鬼，經常分享玩具，有時去占家玩耍時會驚見曾玩過的玩具，朱薰笑說：「佢記得以前玩過呢件玩具，我就教佢因為呢件玩具唔啱佢年紀玩喇，要送俾其他小朋友玩，佢就話要送俾Timmy弟弟。」如今朱薰生多個，少爺占可以將那些BB物品歸還給原主人，非常環保。「好似BB車，我用完一輪俾人，人哋用完又俾番我，幾正幾環保呀！」

我最Rock！
之仔有兩大喜好，第一是車，第二樣就是音樂了！他的音樂喜好絕非兒歌ABC，三歲的他已聽緊外國搖滾音樂，跟足音樂人爸爸及DJ媽媽的音樂世界。之仔亦好撐廣東歌，常指定要聽方大同和CC叔叔、陸永叔叔的歌，片段中他大晒其搖滾細胞，拿起結他un得似模似樣，十分搞笑呢！

●撰文：Ling
●攝影：Sing Ho（部分相片由受訪者提供）

※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。