青衣西南體育館

【親子好去處】全新 青衣西南體育館 兒童遊戲室

親子好去處

廣告

全新開張的康記位於青衣的『 青衣西南體育館 』(唔好去錯青衣體育館),今日終於有機會嚟啦(始終朝九晚六只有假日先可以帶佢哋呢度去嗰度去)

話說呢個新場係康記轄下全港最大的,等我慢慢介紹一下啦

大家如果係青衣人就唔駛講點嚟啦,我就到青衣站轉乘249M往美景花園的巴士(因為以前我番學日日都係搭呢條線,所以都好熟路),去到長康邨康豐樓站落車,車程都只不過係10分鐘,一落車就見到對面好有型設計的體育館

然後直上天穚過對面

沿住天穚直入體育館二樓

經過這個綠化區真係感覺好舒服

在橋上望番落去一樓入口

行樓梯上到三樓就係兒童遊戲室所在,外面放了兩大排藍色櫈供人排隊之用。這裡採取先到先得方式,上限40人,每45分鐘一節(15分鐘清楚),詳細時間表列在文末

當完結前半小時就會安排外面排隊的各位入到嚟呢度,按次序號碼繼續在外等侯,每張小梳化上都印有號碼,成條龍舟型的號碼梳化真係好靚

始終係新場,秩序安排都好嚴緊,遊戲室只供4-9歲兒童進入,4歲以下一定要有大人陪同,所有入場朋友都一定要穿著襪子。

當中有個婆婆陪孫仔嚟玩,但自己冇著到襪,職員苦口婆心勸咗幾句,佢最後先肯番去屋企換番襪嚟!

我哋早咗成個鐘頭成11:00到(等下一場12:00開始),因為我怕遲咗嚟連12:00嗰場都Full埋,咁我就要等到2:00先有得玩(因為下午1:00-2:00係大清潔時間)

不過我哋隨身預備各樣打發時間百寶,兩個喺外面嘆住冷氣畫畫,已經轉個頭就成個鐘

場外都有6個BB泊車位

先唔好講有咩玩,真係一入到嚟就已經俾個場吸睛,真係又大又靚!面積350平方米(即3767呎)

睇吓天花用咗一個一個圓形板,彷彿好似水面的泡泡,而大家就在海底之下玩咁樣。

場內放置多個鞋架並有大有細,實在超有心思,照顧到著靴的朋友

另一邊有大D嘅架…相信係用嚟俾大家放包包,不過都有大朋友放咗自己對鞋喺度(可能要加D指示先得)

架裡面都仲有各樣海洋生物,乘機俾虎媽嚟玩都要教小朋友學英文

場內分為4區,古老木船造型一定唔少得啦,有瀡滑梯有小迷宮(總共有兩層)

一邊係燈塔區,多塊軟墊有高有低,俾小朋友跑嚟跑去都唔怕跌親(不過我睇見兩場都係俾大人用嚟休息玩電話多)

最特別就係呢個波浪造型的軟墊區,加埋地上的細小圓型軟墊,就好似波浪製造出的浪花及氣泡,可以訓練到小朋友的大肌肉及平衡感

最後一區其實就係一入場就見到的大海星(不過我覺得似芝士多D,哈~)

當佢瀡滑梯又得,當佢攀石牆都得(因為墊上有多個凹位可以俾小朋友攀爬)

這裡有多個海洋生物造型的玩樂設施,仲有落地大玻璃,令場內光線超充足(未知晚場如何?)

不過我解釋唔到點解會有4隻膠馬喺度…(唉咁認真做乜,有得你玩就玩啦)

牆上的裝置都多以訓練小朋友思考為主,適合較大的小朋友玩

都唔好講笑,連大人玩都未必即刻解得開

不過佢哋兩個都仲係鍾意喺度玩捉依因,咁總之落樓下公園算啦

場內其他佈置一樣讚

 

另外有多個軟墊組合,原來可以拼做一條海豚

唔識砌唔緊要,牆上有埋貓紙提示你

大功告成!

古船一樣好好玩,除咗可以穿穿插插爬嚟爬去,仲有條超快又刺激嘅瀡滑梯

船頭仲係個打咭位

場內都設有家庭洗手間(場外都有洗手間,大人可以考慮用場外的)

大家估唔做到呢兩個用盒蓋住係咩呢?

我問過職員,原來係飲用水機嚟!不過仲未攪掂

Photo byCANON 5D Mark IV,Len|EF 16-35mm f2.8L USM

呀劍評分:9分

呀劍評語:聽講係康文署全港最大的兒童遊戲室,始終是最新落成的,內裡乾淨整齊,秩序安排也很嚴緊,值得讚賞。等就預咗㗎啦(香港人文化),話時話最近流感高峰期,自己諗諗先好去。(體育館仲有泳池同戶外攀石牆)

青衣西南體育館

是一個位於香港新界青衣島湧美路70號的康樂大樓,於2017年7月26日正式投入服務,由康樂及文化事務署管理。建築物由建築署設計。

地址

青衣涌美路70號 3樓

開放時間

早上9時至12時45分;下午2時至晚上5時45分;下午7時至晚上9時45分

(每時段為45分鐘,15分鐘清潔)

下午1時至2時;下午6時至有時為大清潔時間

每節人數

上限30人

費用全免

查詢電話

2341 0102

(以上資料更新至文章當日)