工展會

工展會 即場試食點評

親子好去處

廣告

工展會除咗多平嘢賣,多好嘢食亦都係一大賣點! 今屆工展會嘅”美食廣場”,有地道小食,亦都有鮑魚海鮮和牛呢類貴價食材,咁究竟抵唔抵食呢? 我哋嘅記者就到場實地行咗轉,即刻嚟睇吓試食報告啦!

鴻星糯米飯 夠香!

現場人氣最勁,最多人排隊,就係鴻星嘅糯米飯喇! 離遠就已經聞到飯香,而且一路有蒸籠保溫,夠哂新鮮熱辣!

唔少人仲即買即喺旁邊嘅高腳枱開餐tim!

糯米飯食落唔唔覺太油膩,臘味驟眼睇唔算多,不過飯同臘味分量勝在夠均勻,啖啖都有,香味十足! 唔怪得咁多人排隊啦!

鴻星集團

攤位號碼: 6C18-19, 32-33

 

$78歎六頭南非鮑

香港仔同柴灣嘅街坊,應該對”嘉嘉餐廳”呢個名會認識多啲,今次喺工展會擺檔,都有唔少噱頭食品,當中以”日本汁煮南非鮑”就最吸晴! 而且$78蚊就食到六頭鮑,仲想點?

日本汁味甜,鮑魚夠厚身,煮得夠淋,$78蚊,抵到爆啦!

超大粒魚旦,就同普通咖哩魚旦冇咩分別,味道唔算特出。長洲都係十蚊2粒,呢度廿蚊得3粒,好似唔多抵,唔試都唔會蝕底!

嘉嘉餐廳

攤位號碼: 6C42-43, 56-57

人氣Kitty包 特首都買

卡通造型手工點心係近年大熱,Hello Kitty中菜軒都有嚟擺檔趁吓熱鬧。Kitty包造至夠cute,黃色耿拉糕夠鬆軟,白色流沙包唔太甜,每個$15蚊,呃Like必試!

除咗流沙包同馬拉糕,仲有叉燒酥($18)同蓮蓉包($12),全部都有入櫃保溫,咁就唔怕啲流沙包唔識流沙啦!

呢個三代同堂壽包,每個$108,不過每日都有限量供應,如果想買就要早啲入場喇!

Hello Kitty中菜軒

攤位號碼: 4A21

下一頁有$25蚊和牛漢堡

$25蚊和牛漢堡

蛋撻王唔止係賣蛋撻,今次嚟到工展會擺檔,以大件夾抵食做賣點,實行貴貸平賣益街坊,如果入場主打係醫肚嘅,一定要嚟呢度昅昅先!

去麥記食個足三両都要廿幾蚊啦! 呢個和牛漢堡,睇落配料唔算多,但係塊和牛咁厚喎! 都係賣$25蚊,就算唔係頂級和牛,都抵啦!

一個漢堡都唔滿足,即管隊埋呢個一呎大熱狗($28),一呎長腸配芝麻包,上面除咗茄汁同芥辣,仲有加咗肉醬,非常惹味! 不過即場食,一定成口都係,所以食前記得準備定紙巾!

蛋撻王

攤位號碼: 6C38-40, 59-61

 

下一頁仲有兩款”一口小食”

惹味一口蘿蔔糕

除咗西式快餐,中式小食一樣唔少得! 呢個xo醬粒粒蘿蔔糕,一啖一粒,邊行邊食最方便! 而且xo醬辣度夠,而且現場仲有辣椒油提供,嗜辣嘅朋友,要加辣都冇難度!

現場即烤台式波波腸($28),熱辣辣,肥瘦均勻,食落都夠香口,一份有10粒,一啖一粒,乾手淨腳!

蛋撻王

攤位號碼: 6C38-40, 59-61

$20兩隻牛油煎帶子

優質堂賣開冷凍海鮮食品,工展會現場仲有熟食賣! 不過唔好齋睇banner就行動呀! 睇佢廿蚊2隻煎帶子,以為好抵,但係一日未睇到實物,都唔知有冇伏架!

兩隻帶子的確超大隻,煎嗰陣加咗牛油,不過味道一般,而且因為想增加色水,所以煎過咗籠,未食睇樣就已經覺dry喇! 如果唔係咁,廿蚊2隻都真係幾抵食嘅!

優質堂

攤位號碼: 6C14-15

 

 

撰文:Joanne

攝影:Angela

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。

 

關鍵詞
工展會