【親子好去處】馬會大型嘉年華 同心同步同樂日2019

撰文：Kammy｜圖片來源：相關機構網頁

同心同步同樂日2019

今年嘉年華以「跨代共融」為主題，包括5個遊戲區同70各式各樣嘅遊戲同活動，真係啱晒一家大細一齊去玩！大家記住要留意，門票將於3月25日上午10時正開始公開發售，每人只限購買最多6張門票，所以大家記得Mark低售票時間啦！

五大同樂區域

1.同策駿馬園

不得不提，嘉年華有好多同馬匹近距離接觸嘅活動，包括馬術示範、與雪特蘭小馬合照等，小朋友只要係3歲至16歲，身高達85厘米或以上就可以一嘗騎小馬嘅滋味！

2.同樂互動區

嘉年華又點少得互動攤位呢，活動期間有多個攤位遊戲、活動及DIY工作坊，可以透過各種創新遊玩組合及嶄新體驗去開拓小朋友嘅新思維！另外，仲可以喺互動展覽中了解香港賽馬會嘅發展史，以及沙田馬場與社區嘅演變關係。

3.同步動起來

熱愛足球嘅青少年可參加錦標賽同一系列精彩活動，而其他小朋友亦可以玩唔同類型嘅氣墊遊戲添！

4.同拍同分享

活動期間仲有臉部彩繪師同卡通人像師為小朋友繪畫趣緻作品，而且到時仲有好多打卡位添，可以上載照片到社交網頁！

5.同看繽紛SHOW

嘉年華提供一個平台，畀大人同小朋友一齊觀賞兒童粵劇，可以喺無伴奏歌唱表演中欣賞音樂，不過最重要都係要留意現場嘅馬術示範，當中有越野賽特別示範、盛裝舞步示範、場地障礙賽示範，咁精彩嘅演出真係唔可以錯過呀！

同心同步同樂日2019活動詳情

活動日期：2019年4月19至21日
地點：沙田馬場及彭福公園
售票詳情
日期︰ 3月25日起
購票方法：3月25日上午10時正起於Ticketflap電子售票網公開發售。門票數量有限，先到先得，售完即止。
票價︰ 普通門票（適用於3歲或以上人士）每張港幣60元；長者門票（適用於65歲或以上人士）每張港幣40元
購票詳情
＊兩種門票均已包括遊戲券5張。 每名持票人士可帶同乙名未滿3歲的小童免費入場。
詳情請到官方網站