澳門酒店

澳門酒店 訂房前必讀 路氹19間酒店房價全攻略

親子好去處

廣告

澳門 ,就同長洲一樣,無論去過幾多次,都會翻兜再翻兜。但 澳門酒店 咁多,你又識唔識揀?下星期一(8月22日)又新開「永利皇宮」,9月仲有「巴黎人」,住得過嗎?!以下集齊該區酒店房價,大家可格吓價先,同埋其實記者我今年已經過咗7次大海,對 澳門酒店 都有啲心得,等我幫你分析吓點揀房喇~

 

撰文:gotrip

澳門酒店 揀房6大重要事項

Q1:咩途徑訂房最抵?

A:旅行社套票抵過散訂好多!以 新濠影滙為例,如果散訂,9月閒日入住每晚房價$1,266,再另訂雙人船票約$600,除開每位$933;但旅行社套票價每位僅$799,更包摩天輪和 4D蝙蝠俠入場費,抵成條街!旅行社中,以「搵房2」最平最多選擇,其次是「My Travel」和「明星」,可先上網格價。

搵房2:hotel002.com
My Travel:my-travel.com.hk
明星:bengsengtravel.com

Q2新開的永利同巴黎人揀邊間

A各有賣點,永利sell豪華,每位套票價$1,099,外圍設超吸睛吊車,可坐纜車進入酒店,內有大量土豪金裝飾,帶長輩去應該like!巴黎人亦夠噱頭,設1:2仿真巴黎鐵塔,套票價$859已包登塔門票,唔算貴,啱晒爸爸媽媽去二人世界。

Q3:親子遊,推介邊間?

A新濠影滙或喜來登。新濠影滙去年開幕較新,且有較多娛樂設施如8字摩天輪和4D蝙蝠俠影院,啱晒小朋友!套票價$799已包入場費,比區內最平的Broadway只貴2百蚊,性價比高。喜來登以卡通做主題,設「體驗夢工場」活動,有功夫熊貓阿寶等卡通人物出現,冧掂仔女無難度!套票價$859包入場,唔算貴啦。

Q4夏天想玩水住邊間

A澳門銀河去年完成二期,3樓的「天浪淘園」水上樂園大upgrade,面積足有9個足球場咁大!內有3條滑水梯、按摩池、泳池、人工沙灘等,最勁係有條575米長空中激流,規模拍得住收費樂園!只要入住銀河旗下酒店如Ritz-Carlton、悅榕庄、JW萬豪、大倉、百老匯或銀河,都可免費入場!最抵當然係住$599嘅百老匯喇。

Q5:邊間酒店buffet正?

A先講較貴的,有同事採訪過JW萬豪的Urban Kitchen,供應澳洲和牛、烤羊架、雪場蟹、生蠔等高檔嘢!晚市每位收$478,以質素而言算合理,幫襯過的澳門人都推介。另外喜來登的盛宴 有$238「土生葡人下午茶自助餐」,供應逾40款澳葡小食,夏日炎炎歎住冷氣食,正。

Q6邊間免費穿梭巴士最方便

A路氹城的酒店全部有免費巴士來往酒店和碼頭,但銀河同新濠天地還設巴士接送至澳門半島,巴士錢都慳返!銀河的車直達新馬路的新麗華酒店(10am至9:45pm,10至15分鐘一班);新濠天地都有,服務至12mn(11:30am至12mn,6至25分鐘一班)。