長索島沙洲｜BB級郊遊路線 欣澳海濱睇日落＋長索島沙洲打卡 絕美海景影靚相
廣告
長索島沙洲｜欣澳海濱長廊非常易行，可以睇到超靚海景之餘，仲可以睇埋長索島沙洲，同小朋友係海中心影相。BB級路線，小朋友都可以輕鬆睇日落！
長索島沙洲｜BB級路程 輕鬆睇日落
呢幾日天氣幾好，黃昏開始冇咁熱，今次就由Blogger媽媽帶大家去欣澳睇日落啦！呢條路線全程大部份係平路，只有少少樓梯，所以好輕鬆，小朋友都可以行到。前前後後連埋影相打卡，大約用咗兩個鐘，睇日落之餘，仲可以去埋長索島打卡。
長索島沙洲｜景點一：欣澳海濱長廊
欣澳海濱長廊好好行，望過對岸已經見到長索島，水中心就見到大大小小嘅木樁插喺水，左邊就係地鐵列車，天空時不時都有飛機經過，感覺好悠閑，沿途都可以影到好多靚相 。雖然影唔到好清晰的長索島，但係海景都好靚，木樁都好有特色，回程時配上日落，超級浪漫。
長索島沙洲｜景點二：海中小石灘
行完海濱長廊就到鹿頸村，可以感受下漁村風情。村入面亦有啲士多，可以買啲飲品補給。過咗鹿頸村碼頭就會見到有啲樓梯落去石灘，之後再向前行多幾分鐘就到長索連島沙洲喇！潮退嘅時候鹿頸村同埋長索島中間嘅一段路就會露出水面，可以行去對面長索島，畫面超級神奇，爸爸媽媽記住較啱時間去！
長索島沙洲｜景點三：回程日落打卡
長索島沙洲可以影到企係海中心的照片超靚，見到潮退之後條石仔路，小朋友超級好奇。呢度除咗影相打卡，仲會見到好多蟹仔喺石灘度，唔好拎走佢哋呀，睇吓好啦。影完相之後就沿原路返番起點，Blogger媽媽離開長索島嘅時候係六點幾，雖然沿路可以影到好靚嘅日落，不過日落後鹿頸村一段路都幾黑㗎，建議大家早少少出發。
長索島沙洲｜一日遊小貼士
- 要留意潮退的時間，才可以看到鹿頸村和長索島中間的一段路露出水面。
- 欣澳海濱長廊和長索連島沙洲都影到日落。
- 可以在鹿頸村中補給水和食物。
- 好多蟹仔喺石灘度記住唔好帶走。
- 建議可以早一點出發，避免離開時的路段太黑。
長索島沙洲｜交通方法
路線：欣澳海濱長廊 → 鹿頸村 → 長索島沙洲
交通：起點係欣澳站，A出口直行穿過巴士站，去到海堤路就轉左一路向前行。
時長：2小時
難度：★☆☆☆☆
常見問題：
問：如何去欣澳睇日落？
答：起點係欣澳站，A出口直行穿過巴士站，去到海堤路就轉左一路向前行。
問：完成欣澳睇日落路線需時多久？
答：2小時
如何去欣澳睇日落？
起點係欣澳站，A出口直行穿過巴士站，去到海堤路就轉左一路向前行。
完成欣澳睇日落路線需時多久？
2小時
撰文：Natmama親子育兒生活誌圖片來源：Natmama親子育兒生活誌
