親子必睇！台灣殿堂級大師聯手FOCASA馬戲團將幾米繪本活現舞台

Jan 7 2025

週末想同小朋友一齊睇表演，但又驚佢哋坐唔定或者睇唔明？想搵個大人細路都啱睇，可以一齊大開眼界嘅節目，其實唔難！如果將大家成長回憶中嘅幾米繪本，變成真人喺舞台上面飛天遁地，上演各種精彩馬戲，小朋友實會睇到拍爛手掌！台灣殿堂級編舞大師林懷民，就聯同繪本大師幾米，以及FOCASA馬戲團，帶嚟闔家共賞嘅《幾米男孩的100次勇敢》。呢個表演將幾米筆下嘅溫暖角色同故事，以超高難度嘅馬戲技藝呈現，絕對係一場充滿歡樂同驚喜嘅奇幻旅程！

幾米（圖片來源：Hong Kong Arts Festival)） — （圖片來源：Hong Kong Arts Festival)）

殿堂級大師跨界聯手林懷民首部馬戲作品

台灣殿堂級編舞大師、雲門舞集創辦人林懷民雖然年屆78，但仍然懷有一顆赤子之心。這次他久休復出，破天荒跨界執導人生首部馬戲作品，為台灣最大型馬戲團FOCASA一班熱血追夢嘅年輕人編導。演出以台灣繪本大師幾米的畫作為靈感，林懷民從幾百幅畫中精挑細選，將平面嘅經典故事立體化，為觀眾帶來一場「沒有議題、只有歡樂」嘅繽紛演出。林懷民大師表示，創作嘅初衷很簡單：「要令每個觀眾看得開心！」這部作品唔單止係兩位大師嘅創意碰撞，仲係一份送給所有觀眾，充滿希望同溫暖嘅禮物。

台灣最強馬戲團FOCASA 施展渾身解數

FOCASA作為台灣首個專業當代馬戲團，創團15年，團長林智偉帶領一眾馬戲好手苦練多年，憑著追尋夢想嘅熱血，最終獲得林懷民大師青睞，親自為佢哋執導。為咗將幾米嘅世界完美呈現，團員們施展渾身解數，帶來連場炫目技藝，包括驚險刺激嘅獨輪車、展現力量與平衡嘅特技堆疊、充滿動感嘅花式跳繩等。舞台上，呼拉圈將幻化成閃爍光環，優美迷人嘅帽子舞亦會上演，保證讓大朋友、小朋友一起大開眼界！《幾米男孩的100次勇敢》喺台灣一年內已演出至少30場，贏得觀眾掌聲，今次嚟到香港，絕對不容錯過。

幾米繪本角色活現眼前重溫一幕幕溫暖經典

試想像，幾米繪本中那些陪伴無數人成長嘅經典場景同文字，將會投影喺劇院嘅大螢幕上，如同一幕幕回憶中嘅走馬燈。深受歡迎嘅角色將會跳出紙頁，活現眼前：《幸運兒》嘅小丑踩著大球拋波、《地下鐵》嘅盲女踏凳走過獨木橋，仲有玩具兵踏著高蹺昂首前行。向左走、向右走嘅男女主角、勇敢長大嘅小孩，將會構成一個有關男孩勇敢突破自己嘅勵志故事。整個演出更會配上韋華第《四季》、蕭斯達高維契的華爾茲，甚至五月天嘅《倔強》等美樂妙韻，繪形繪聲，帶領觀走進一個溫暖窩心嘅奇幻旅程。