疫情下超人媽媽分享平衡工作與家庭的秘密 海鮮雜菜炊飯啱晒忙碌父母【五味人生】

撰文：Clara | 資料、圖片授權：受訪者余媽媽

超人媽媽公開工作時間表

余媽媽與老公以前讀書時候已經認識，拍拖多年，後來結束愛情長跑，拉埋天窗，結婚超過十年，猶如童話故事。余媽媽很慶幸可以與老公相愛多年，她指雙方有種默契：「有時啲嘢唔使講已經大家想點或者諗咩。」

婚後，余媽媽與老公誕下了兒子余小b，要負擔媽媽的責任已經很不容易，余媽媽還繼續努力上班，做好在職媽媽的角色。她坦言每天工作都很忙碌，幸好早上有婆婆幫忙照料兒子。一到午飯時間，她就會爭取時間致電給兒子，希望聽聽他的聲音。放工後，她就會接回兒子，之後就要馬上煮飯、洗碗、幫兒子對功課、溫默書。如今疫情蔓延下，雖然不能出國旅行，但余媽媽仍會趁假期會帶兒子本地遊歷，去行山、去離島（如長洲、大澳、愉景灣），遠離石屎森林。她說：「其實唔使下下去到好遠，最緊要係畀佢哋接觸到其他小朋友，佢哋就好開心。」

平衡工作與家庭的秘密

建立了家庭，父母忙到「甩轆」，壓力大到爆煲。余媽媽認為懂得減壓很重要，她指夫妻之間必須有二人世界，所以他們每個月都會盡量爭取一次外出「撐枱腳」的機會，將兒子交給家人照顧，享受甜蜜時光。有二人世界時間，亦要有私人時間，余媽媽指老公喜愛打網球，他一星期會有一、兩次與朋友出去打波；而她自己也會偶爾跟朋友出去聚餐、參加興趣班。她認為夫婦要懂得平衡親子時間與私人時間，輪流休息。

余媽媽慶幸有個廿四孝老公。她大讚老公很幫得手，可能有段時間由她幫兒子溫書，之後就由老公接力。而且兩人會分別負責教兒子不同科目，她教中英文，老公教數學。她說：「喺呢個家庭裡面大家要分工合作，千祈唔好推晒畀媽媽做，全職媽媽都唔得。」

育兒心得1. 疫情下孩子太心散怎麼辦？

疫症期間，很多課堂轉為網上授課，沒有老師在場監督，家長們叫苦連天，大呻小朋友比以前心散。余媽媽指兒子初升上小學時，對溫書、考試毫無概念，不知道為甚麼要溫書，令她很「激氣」：「好勞氣，亦好無奈，佢始終有啲惰性。」於是余媽媽特意買了補充練習給兒子做，她強調買補充練習並非想「死谷爛谷」仔女成績，而是可保持仔女的學習進度，又可以讓仔女知道自己有甚麼掌握到，有甚麼掌握不到：「要等佢知道有工作要做吓，唔係上完課就可以玩。如果佢跟唔到進度，自信心會低咗，學業成效又差啲。無辦法，疫情下家長可以做嘅就係陪佢一齊做。」余媽媽表示兒子愈來愈喜歡做補充練習，後來她才知道兒子最喜歡看文章，做閱讀理解，成功培養閱讀興趣：「佢好快可以完成，係咁問我有無第二份。」

育兒心得2. 孩子扭計買玩具怎麼辦？

小朋友長大，少不免會扭計，余媽媽兒子都不例外。有時他會扭計想買玩具，余媽媽會跟他約法三章，約定離開時間：「我哋只係嚟睇一睇！」余媽媽表示玩具可買，但要求兒子表現好，才可得到一張貼紙，透過儲到一定數量貼紙來換取新玩具，讓他明白要付出才有成果：「例如溫咗書、做好功課、坑手做家務、有禮貌對人就有一張。」

育兒心得3. 與孩子關係有距離感怎麼辦？

余媽媽指作為家長，即使生活節奏急促都不應忽略親子互動的重要性。第一，她會跟兒子講睡前故事，以及用精油幫他做身體按摩，增加親子互動。第二，她會主動與兒子聊天，聆聽他細數每日發生的趣事。她教家長同仔女聊天時不應只談及「功課做晒未」、「讀書讀成點」，而是問「你今日有無特別嘢想分享啊？」、「發生啲咩事？」，不但可以增加親子感情，還可訓練仔女的表達能力。她笑言：「有時聽佢講嘢幾開心，對大人嚟講唔係好特別嘅嘢，但對小朋友嚟講原來好有意義。」

海鮮雜菜炊飯 啱晒忙碌父母

余媽媽表示平時工作很忙，有時放工回家未必有時間整多味菜。她為了縮短烹調時間，設計了懶人食譜─海鮮雜菜炊飯。她指炊飯製作簡單，一煲到尾，而且材料豐富，對兒子又有營養。她笑言兒子很乖巧，主動幫她切東西，親力親為，所以特別喜歡這個菜式：「佢食自己有份整嘅嘢特別好味，飯都食到兩大碗啊。」

海鮮雜菜炊飯簡易食譜材料：

海鮮雜菜炊飯簡易食譜調味料：

海鮮雜菜炊飯簡易食譜做法：

1. 將所有材料洗淨切好。
2. 加水開鰹魚粉，變成湯。
3. 所有調味料、材料放入電飯煲，按下煲飯功能。
4. 撒上三文魚鬆，撈勻，完成。

海鮮雜菜炊飯簡易食譜小貼士：

1. 鮮味小秘訣就是一開始加入鰹魚湯底一齊煲，特別鮮甜，超好味。
2. 可以自己更改材料，例如加入去殼的青口、蜆肉，或者切粒的蔬菜、菇菌。
3. 煲好飯之後不要馬上開蓋，待五分鐘後開蓋，米飯會更香。

資料、圖片授權：受訪者余媽媽