湯水

湯水推介 番茄豆腐豬肉碎蛋花湯

食譜

廣告

【湯水推介】雖然老火湯係好飲,不過有時簡單嘅滾湯都同樣好味又有益,就好似今日我專為小小豬而設嘅番茄豆腐豬肉碎蛋花湯,就一次過滿足小小豬三個願望啦!

 

湯水推介 番茄豆腐豬肉碎蛋花湯

點解會係三個願望?第一就當然係因為小小豬同我一樣都係好鐘意飲湯,一有湯飲佢就開心(當然最好唔係黑卒卒嗰啲啦)。第二就係因為今次啲材料全部都係小小豬鐘意兼有營養,佢緊係食得開懷。最後一個就係….因為依個係小小豬有份提意,佢仲唔係好有滿足感。

事緣有一日放學,小小豬即刻捉我埋一邊,問我係唔係好鍾意煲湯呀?原來佢係午膳時去圖書館借左一本湯類食譜圖書。見到佢滿心歡喜拎本食譜比我睇嘅時候,都真係有少少感動。所以我就係圖書入面揀左依個湯煲俾佢飲,等佢滿足下先嘛~

不過其實豆腐、番茄、豬肉碎及雞蛋都係一啲好有營養嘅食物素,絕對適合大小朋友呀!

營養靚湯
材料就只需要番茄三個、硬豆腐一磚、雞蛋2隻、免治豬肉約$15~

先用1/2茶匙鹽及少少胡椒粉將免治豬肉醃最少30分鐘~

將二個番茄切成番茄蓉,另一個就切塊;硬豆腐就切成粒粒~

煲內加入約1.5L水,待水煮沸後加入免治豬肉滾5分鐘~

然後再放入番茄蓉及豆腐煲10分鐘~

最後加入番茄塊及少少鹽調味後,再多煲5分鐘~

煲好後熄火,加入蛋漿拌勻~

成個過程唔洗半個鐘(唔計醃肉時間),就有一個湯飲啦~

又一個好飲有益兼可以當餸嘅一個菜,真係啱晒我呀~

小小豬見到個湯,又見到係圖書見到依個食譜嘅時候,佢真係好興奮,好似話俾我知….原來我都有啲貢獻咁,所以我都留左幾個食譜,下次再煮多款等佢開心下得!

BY 小小豬成長日誌

下一頁:滋潤止咳海底椰粟米湯