真.華仁仔 – 潘朗峰

真.華仁仔 – 潘朗峰

華仁仔一向自由慣,獨立自主。好似今次嘅主角Ryan(潘朗峰)咁,係舊年點擊率最高嗰條Ball片嘅男主角,有超過14萬人次睇過佢嘅演出架!不過佢就話自己向來低調兼低質,唔敢玷污「男神」嘅雅名,今次嚟參加「學界男女神」,只係想多試多見識!總之你有你食花生,佢有佢繼續自得其樂!

9182

當初Ryan肯拍呢條片,純粹只係貪玩,根本冇諗過會有咁多人睇。而家有時出街,都會畀人眼望望, 而且啲眼神都唔多友善,可能係因為佢太樣衰咁話喎!但係筆者睇番youtube上面嘅comment,其實都有唔少人撐佢好樣過另一個男主角架!

8969

喺條Ball片入面,Ryan係飾演一名毒男,讀白一句“Your face, your fate”,應該引起唔少毒男嘅共鳴。Ryan話自己都毒毒地,不過又唔算好毒,但係佢就唔多認同呢句說話,因為做人,都係品格同內涵重要啲!

9248

Ryan話,喺華仁唔會怕撞板,因為撞過先至學嘢,所有老師唔會因為你做錯事而大吵大鬧,反而係教佢哋有啲咩可以改善,所以Ryan好珍惜呢個咁自由嘅學習空間。

9092

Ryan由Form 3開始夾band,玩嘅多數都係英文歌,主要係因為佢講中文唔多正, 唱中文歌嗰陣有啲似西人講中文咁。(但係佢明明係百分百local架喎!哈~)

9045

Ryan今年讀中五,出年就考DSE喇,雖然佢嘅夢想係以演戲為事業,不過佢話「夢想終歸是場夢!而家啲樓咁貴, 點敢博呀!? 有能力養得起屋企比追夢更重要!」所以始終都係入大學實際啲!

「學界男女神」唔止要睇盡中學界靚人,仲要殺入大專界!

所以無論你係讀緊中學定大專,只要你認為自己或者身邊嘅同學仔有呢個資格,都可以自薦或推薦俾我哋!

參加方法好簡單,只要將想推薦嘅同學,或者自薦人嘅facebook ,tag喺下面 “Comment”嘅位置; 再將參加者及提名人嘅姓名、年齡、就讀學校、個人專長、聯絡電話,仲有一個月內影嘅近照兩張(全身及正面),喺學界男女神facebook專頁 inbox或電郵到[email protected]俾我哋;如果成功通過編輯部審核,就有機會成為「學界男女神」!

「學界男女神」,等緊你嚟挑戰!

撰文: Joanne

攝影: Paul Choi

拍攝: Anthony Leong

剪接: Candy

美術: C.Ming

Hair+Makeup: EM Makeup

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。

更多精選內容