趙頌茹 單親媽媽重新出發

趙頌茹 單親媽媽重新出發

全面培養良好性格

擔當單親媽媽不容易， 趙頌茹 覺得不論單親與否，所有媽咪都是辛苦的。「係咪單親都係一樣咁照顧小朋友，本身我都係自己一手一腳去湊大小朋友，其實任何父母都有辛苦嘅一面，如果你要諗得好辛苦，咁好多嘢都可以好辛苦。只不過我經歷得更多，學識更多嘢，我都覺得自己有成長。」
要獨力照顧兩個女的日常生活，體力上一定雙倍勞累，更重要是加倍關心女兒的想法，以免性格上有所偏離。「性格嘅成長係建立喺好多情感上面，喺呢方面我都諗咗好多，例如點教育小朋友、點顧及佢哋感受，得一個人去諗係吃力少少，亦都擔心只有媽咪角度去教育，會唔會唔夠全面呢？」幸好 趙頌茹 身邊有家人、朋友力撐，在湊女亦提供了多方面的意見，分擔了她的憂慮，「我爸爸、身邊嘅男性朋友，都好願意出嚟陪阿女玩，等阿女知道多啲男性角度嘅嘢，認識點同男性相處，咁先會完整。」

趙頌茹 向女兒坦白一切

父母分開，由媽咪獨力領行成長路，當中的是與非太複雜，不是小朋友的世界能理解， 趙頌茹 覺得家中發生了事情，小朋友都看在眼裏，心裏會有千個謎團，她寧願盡力向女兒解釋，好過有所隱瞞而令她們胡思亂想，影響其成長。「我每次都好坦白同佢哋講解，坦白嘅意思唔係將事情最差嘅一面話佢哋知，而係有限度、佢哋認知範圍上面，去讓佢哋明白到父母雖然分開居住，佢哋仍然有爸爸。」阿Yu強調，不會再責怪任何人，至於爸爸仍有否聯絡三母女，「佢有用自己方式搵個女。」至於自己，已不想與他再扯上關係。

衝破害怕的決定

事情一發生， 趙頌茹 是一邊處理問題，一邊教導女兒，盡量讓她們知道每件事，而經媽咪教導後，兩個女沒有爆發過情緒問題。「我唔想小朋友有情感上傷害，例如佢哋會唔會覺得有缺失，我都盡量滿足佢哋。當時一去到適當嘅timing我就會講，亦會作出教育，依家我睇到佢哋好信任我，每一日都充滿安全感。」
阿Yu坦言，作出離婚的決定是經過長久以來的掙扎，害怕改變，害怕一個人搞不定，「作出決定前已經諗咗好耐，又諗點樣先係對小朋友成長最好嘅決定，小朋友來到我哋身邊時，係一張白紙，佢哋嘅將來係由呢一刻開始建立，如果我對佢哋嘅基礎打得唔好，將來行差踏錯點算呢？」她覺得婚姻繼續下去的話，對小朋友的成長有較壞影響，才勇於下決定，「我希望佢哋喺一個開心嘅環境生活，每一刻都敢同我傾訴心聲，但過往我係睇唔到，佢哋好驚同我講，驚我唔開心。」

「長氣媽媽」乜都問

現在三母女都能開心見誠溝通，有不快都會坦承相告，阿Yu感恩道：「我好希望盡力做好溝通角色，過往我嘅父母都唔係咁，即我問佢哋意見，佢哋淨係答唔好但唔講點解，我唔想我嘅小朋友都係咁，可能我會變得長氣啲，但佢哋見我講咁多，就會講番咁多俾我聽。如果我成日都只答『唔好』，佢哋將來都會學番我講『唔好』，我要做好身教俾佢哋睇，乜都問乜都傾，當佢哋係小大人咁。」
阿Yu為了讓女兒見識更多，近日答應了有線電視的邀請，參與《帶阿B去旅行》的節目，首次帶兩個女去旅行，度過了快樂的八天台北花蓮遊。阿Yu一直都心郁郁想帶個女去玩，但一想到驚女兒走失、難控制及交通等問題，就打消了念頭，直到細女今年三歲大，識行識走溝通到，覺得是時候了。「今次有攝影師影住佢哋，點都唔怕走失先。」

慢遊花蓮 反思親子相處

帶小朋友去旅行，最大難關是怕他們不適應飛機上的氣壓，感到不適、耳鳴導致大哭，父母尷尬又怕麻煩到其他乘客， 趙頌茹 都一樣，有見今次只飛台北個半鐘，放膽一試。「佢哋成日都話想坐飛機，咁去台北咁短程就俾佢哋試吓，佢哋做得好好，全程都好興奮，一落機我就諗定，可以再帶佢哋去遠啲喇！」
兩個女在旅程感受了多個第一次：第一次搭飛機、第一次住民宿、第一次摸鸚鵡、第一次摸烏龜、第一次騎馬……三人在八日旅程中非常歡樂，「我哋去到外地更加團結。」對兩個女來說，多間民宿的大自然環境令她們最深刻，是香港完全接觸不到，阿Yu說：「大部分民宿都好似一間間屋，我哋打開晒啲門，佢哋就喺出面跑來跑去，周圍去人間房玩，我諗佢哋好鍾意熱鬧，喺香港個個都閂埋 度門。」

最令阿Yu印象深刻，是觀察到當地家庭在一間cafe的生活態度，令她反思自己養育小朋友的方式。「台灣嘅親子文化好強，有日去到一間親子cafe，入面有好多圖書，有對父母同個小朋友食緊lunch，佢哋食完就去嗰個角落睇書，一家人食lunch都有咁親密時間。我會諗番，我放假同小朋友做緊咩？佢哋生活好慢，我哋就好趕，喺香港我哋食就食㗎啦，食完先去第二度睇書，或者返屋企睇，但佢哋可以喺一個地方入面，有夫婦嘅相處時間，亦有同小朋友嘅相處時間。」
以前阿Yu也經常催促女兒食飯、返學，自己也趕頭趕命返屋企煮飯、洗衫、接放學，甚麼都趕一餐。返港後，阿Yu也學會放慢腳步，與女兒走過漫漫長路，「雖然生活如是，每日返學放學，但當中個心態改變咗，更加重視母女相處嘅quality time，追追趕趕反而會錯失好多。」

花蓮親子熱點推介

花蓮福町夜市
花蓮夜市經過大翻新，統合成由東大門夜市區域，當中福町夜市以遊樂為主打，街道寬闊整潔，大量的遊玩攤位適合親子同遊。

遠雄海洋公園
共有八大園區，是親子學習海洋生態保育的好去處，其中的「海洋夜未眠」活動，可讓一家大小在海洋生物前睡一晚，仿如在海底世界中入夢。

立川漁場
一個可以走進池塘中摸蜆的好地方，池塘廣闊水淺，適合小朋友玩；餐廳則提供新鮮的海產如貴妃魚、鰡等。另外，罕見的蜆味雪糕更加不可不試！

Alice Café Books親子餐廳
餐廳充滿文藝氣息，
有專為兒童而設的遊戲室和閱覽室，並提供大量繪本及圖書供閱讀。餐飲有提供和式定食。

●撰文：Ling
●攝影：Clay Lam （部分相片由受訪者提供）

●場地提供：Party Master(6733 7664)

※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。