澳門親子之旅：華納滿Fun童樂園

依一個行程都唔係我地預先計劃，原本我地係打算左去大環山玩滑草，不過因為天氣唔好，都係留係室內地方就最安全，所以就決定俾小小豬嚟依個新開嘅遊樂場大放電啦！

二百蚊包成人及小童各一名任玩兩小時，其實我就覺得有少少貴，不過老公話又唔係成日嚟玩，既然小小豬鐘意就豪少少俾我地兩個入去玩，佢自己就周圍行哦(好一名慈父呢…哈哈哈)~

一入到場小小豬就一支箭咁跑左滑梯迷宮啦~

唔知係唔係平日關係，所以人流唔多，基本上小小豬可以話係包場，自己係個迷宮內不停跑呀~

續下頁

陪左小小豬玩左一轉之後，我地冇晒能量，真係十級攰。不過小小豬仍然係好新奇兼精力無限，所以就係旁邊睇住係佢自己玩啦！我咁放心俾佢自己玩另一原因，係因為迷宮內某幾個位都會有職員係度睇住，所以我都好放心呢~

之後小小豬就轉戰佢至愛遊戲，就係渣車啦~

車仔嘅款式都幾多，所以小小豬基本上每渣完一個圈就去換車，真係俾依隻貪心豬激C~

續下頁

玩左兩個輕鬆遊戲，小小豬就去攀爬體驗啦。職員哥哥先幫小小豬著好保護衣，然後慢慢咁教小小豬向上爬~

哈哈哈…雖然小小豬一向都可以稱得上大膽豬，不過依個攀爬體驗就難到佢，爬左幾步之後佢就話驚唔敢爬，要哥哥抱返佢落地呀…真係俾佢C。

小小豬一除左件保護衣之後，佢當然即刻心情轉靚再繼續玩，佢今次就去玩3D射槍~

其實個玩法同迪迪尼巴斯光年差唔多，不過就要載上3D眼鏡，同埋係對住個好大嘅屏幕嚟射壞人~

場內都有一個比較靜嘅遊戲~

續下頁

其實我係幾鐘意依個位置，因為好多好得意嘅卡通人物，好啱影相呀~

依度仲為小朋友提供圖畫同顏色筆，不過一向小小豬都唔鐘意塗顏色，所以望一眼就走左去啦…哈哈哈~

場內仲有一個小型跳樓機添~

之前係海洋公園都玩過，所以對小小豬嚟講都可以完全係零驚嚇，佢仲開心都不得了呀~

其實場內仲有啲電子遊戲機玩，不過我地一向都唔俾小小豬玩，所以冇行過去睇。

開開心心又玩左兩個鐘，係依兩個鐘頭入面小小豬都真係分秒必爭，因為玩完一樣又即刻去玩另一樣，佢真係攪到好忙咁呀…哈哈哈！