里安納度

里安納度 不為人知的童年事

熱話

廣告

里安納度嘅稱帝之路,係荷里活偶像明星努力脫胎換骨成演技派嘅最佳實例。喺《復仇勇者》裡面嘅金句:「風,吹不倒根扎得深的樹。」正正係里安納度嘅寫照。

里安納度嘅父母喺佢1歲嘅時候就離咗婚,里安媽雖然同個仔住喺平民區,但係好搏命咁打幾份工,都要送里安仔入讀名校網嘅好學校。

不過里安納度喺學校成日都畀同學欺凌,唔係同學嫌佢窮,而係佢好多口,成日搵老師告狀,所以好多時一放學,佢班同學仔就會喺學校門口聯群結黨伏佢,仲一巴一巴咁打佢tim呀,真係陰公豬呀!

9歲嗰年,里安仔終於忍唔住同媽咪講:「我唔讀書喇,我要去拍戲賺錢!」媽媽當然唔畀個仔輟學啦,但係畫漫畫維生嘅里安爸就即刻帶阿仔去睇《午夜狂奔》,指住銀幕上嘅男主角羅拔狄尼路講:「你要做演員,就要好似佢咁。」

當時里安仔又睇唔明部戲,更加唔知羅拔狄尼路係乜水,不過好多年之後,呢個人竟夠成為第1位影響佢進入電影圈嘅貴人。

到咗15歲,有火柴盒公司請里安納度拍廣告,仲出高價想佢做代言人,佢以為自己終於有理由唔讀書喇!點知原來係個騙局,里安仔失望咁等咗成年,就連一個鏡頭都冇拍過,一蚊都搵唔到!

1992年,里安納度畀羅拔狄尼路選中,為電影《不如重新開始》試鏡,超興奮嘅里安納度竟然喺試鏡嗰陣暴走,將啲對白嗌哂出嚟,試完鏡之後佢心諗:「今次冇喇!」

點知羅拔狄尼路就係欣賞佢呢種躁動又叛逆嘅狂野,二人一拍即合,直到今日里安納度都對呢個戲中嘅爸爸心存感恩。

有好多報導都提及過,里安媽陀B嗰陣睇達文西嘅名畫,感覺到肚入面嘅BB踢咗佢一吓,所以佢就幫BB改咗個同達文西一樣嘅名:里安納度。

不過影響里安納度最深嘅畫,共唔係達文西,而係荷蘭名畫家耶羅尼米斯·波希嘅名作《人間樂園》(Garden of Earthly Delights),畫中上帝創世紀、天堂與地獄、亞當與夏娃嘅伊甸園同失樂園… 自里安納度有記憶以來,就掛喺佢間房嘅天花板上面,深深影響佢每個成長階段的人生觀。

 

文字及部分圖片摘自網絡

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。