金銀花菊花杞子茶

金銀花菊花杞子茶

上次我煲紅豆水時,我都有俾小半杯小小豬飲。不過依隻衰豬飲完次後就即刻話『MaMi….我都係鐘意飲菊花茶多啲』,既然佢鐘意,我當然好樂意煲俾佢飲啦,所以今次就煲左金銀花菊花杞子茶啦!

 

菊花茶我都成日煲,不過今次加埋金銀花同埋杞子一齊煲,三者都係一啲性質溫和嘅藥材, 對清熱解毒同埋眼晴明目都好有幫助。除左啱小朋友飲之外,對一啲眼部浮腫同埋夜瞓人士(即係我啦)都好啱飲呀!

 

材料都只係需要四樣:金銀花(由於佢嘅味道有點甘味,所以唔可以落太多,如果唔係就會帶點味,所以我只係落左約兩湯匙)、菊花約十蚊、杞子約一湯匙及少少冰糖~
IMG_1626

 

將所有材料浸洗約半個鐘,然後隔水備用(記得要分開嚟浸洗,因為佢地落嘅次序唔同呀)~

IMG_1629

 

煲內放2L水,待滾水後加入金銀花及菊花,用中火煲20分鐘~
IMG_1633

 

之後加入杞子及冰糖再煲15分鐘(冰糖嘅份量可因應個人喜愛甜度,不過如果想更加有效達至清熱作用,就不建議加冰糖作調味,以免影響佢地嘅功效。不過如果俾小朋友飲的話,都係落少少等佢地甜甜地飲得開心啲)~
IMG_1637 IMG_1641

 

最後熄火焗10分鐘,然後隔榨就可以飲得啦~
IMG_1656

 

有佢鐘意菊花茶,小小豬緊係飲得開心,話咁快就飲晒依一大杯啦~
IMG_1642

 

温馨提示:雖然依個金銀花菊花杞子茶簡單易煲又幾好飲,不過蠶豆症嘅朋友仔係唔可以飲用金銀花,所以煲嘅時候要留意呀!

更多精選內容