囡囡玩上癮 袁彩雲iPad戒癮法
性格扭曲變得暴躁
自2009年，Fiona嫁雞隨雞移居加拿大後，做全職家庭主婦，加上丈夫的工作不太繁忙，有好多時間家庭樂，到附近的大公園、戶外地方走走，回家又作親子閱讀，陪伴女兒Alycia成長。
臨近農曆年時間，Fiona為出席一些商業活動返港，順道帶Alycia過年。一踏足香港，就如好多港爸港媽一樣，因工作關係不能陪伴女兒，為了安撫她，利用iPad等電子產品作代替品陪女玩耍，看卡通片、玩益智遊戲，只是玩了兩星期，Alycia的性情立即扭轉了。「依家一攞走佢就好情緒化，變得暴躁，成日喊、?地、發脾氣，佢之前嘅性格比較溫和。」
拍攝當日Alycia一見到iPad就開心，看卡通片看到入晒神，連拍照都對鏡頭沒反應，繼續呆呆地睇戲，一拿走iPad又即刻喊，Fiona無奈道：「由我預備返香港開始，到返咗嚟有嘢做，就係呢兩個星期佢睇多咗iPad，就改變咗佢性格，對睇書嘅興趣減低咗好多，對iPad充滿熱情。」
自己識開YouTube睇片
Fiona當初讓她玩iPad，是相信當中也有好多益智apps，對小朋友學習有幫助，例如寫ABC、學數字及砌圖等，「我覺得呢啲apps都好正常，所以我都download咗好多，後來佢開始識得撳其他掣、識開YouTube，佢就成日睇片，鍾意睇人哋玩泥膠、人哋開出奇蛋有咩玩具、Peppa Pig同迪士尼卡通片。」
Fiona起初沒極力阻止，因為覺得Alycia選看的片都是兒童適宜，只偶然有廣告或播放後再連播的片段不太適當，但她也懂得飛走，繼續看自己有興趣的片。久而久之，她開始玩iPad成癮，沒有節制地用iPad睇YouTube，成為上癮元兇。
立即鎖機多閱讀
兩三星期後，Fiona意識到問題來了，必須立即糾正，「當知道佢性格轉差，一定要搵個方法扭轉番佢，要用密碼鎖鎖住部iPad，唔可以喺佢視線範圍出現，真係要攞番多啲有趣書本同佢睇，或者拎啲玩具同佢玩，多啲互動，希望逐漸令佢忘記iPad。」
Fiona明白自己做錯了，但不感到後悔，如果沒有錯過，就不知道電子產品禍害深遠，亦能給予其他家長一個借鏡，切勿讓孩子沉迷電子產品。一旦發現孩子上癮，及早制止都有得救，「iPad真係唔應該當係陪玩工具，好彩小朋友仲細，比較容易扭轉番佢性格，而且佢開始返學，當佢見到好多小朋友都係有紀律嘅時候，
佢都會慢慢學佢哋，會玩少好多。」
無意返港讀書
Alycia現已返加拿大N班開學了！Fiona指學校近他們的家，僅三分鐘車程，她決定每朝跑步推她上學，「佢坐車我跑步，順便可以做運動！」學校以玩樂為主，特別加入了烹飪課程，非常有趣，她希望囡囡會熱愛學習。
Fiona身邊有不少朋友的子女在港讀書，聽到他們的經歷之後，對返港讀書完全打消念頭，「我識嘅朋友仔女由一個月大到十三歲都有，所以我聽到唔同年齡階段嘅分享，好多朋友都覺得好大壓力，我想像唔到阿女要咁辛苦，佢辛苦我都會好辛苦，好慶幸我有多一個成長地方選擇。」縱使不願意接受香港教育，但中文一定要學，「可以係返香港學一陣，或者喺度返華人學校。」
一直在加國長大的Alycia，日常溝通以英文為主，但廣東話亦能流利應對，Fiona不敢說她有否語言天分，但驚覺她兩歲後學說話之快。「我有朋友個小朋友兩歲就講嘢好叻，到Alycia踏入兩歲都唔係好講嘢，我都有擔心過，但一到兩歲三個月，佢就bilibala講好多嘢，吸收能力特強，你講一句，佢就學你講嘢copy你語氣。」
學語文忌中英夾雜
本身精通廣東話、普通話、英、德、法五種語言的Fiona，對教育語文有一定心得，她認為學每種語文都必須多聽多講，而且家長需與子女雙方交流，而非單向式叫他們學習。「家長應該多用說話去表達自己做緊嘅嘢，形容自己心情俾小朋友聽，佢哋就會明白我大約講緊咩，加上手語、動作配合，佢哋就會更易吸收。」
不過，Fiona覺得自己教中英文也有不足，說話常中英夾雜，令女兒感到混淆，幸好她仍吸收到，能以中英文溝通。「我都會講『你幫我攞本book呀』，有時我都戒唔到，阿女問『What’s that』，我就英文答『This is xxx』，之後又講吓中文，其實咁樣唔係太好，有機會影響佢嘅grammar、用字，最好係爸爸講中文、媽媽講英文，分明啲。嚟緊我會tune番自己全講中文，因為阿女返學後有老師講英文，我就主要講廣東話，佢就好清晰知道返學講英文，返屋企講中文。」
返加展造人大計
Fiona在德國土生土長，在兩文三語以外多一項優勢，但她未有教女太多德文，怕她感到混淆，「我都猶豫佢明唔明，所以我都少講德文，其實可能我諗多咗，依家只係教咗1至10，利用上落樓梯方式教，佢都學得OK呀。」最近她帶女到住所附近一個公園玩，發現當中也有幾位德國小朋友，如果Alycia與他們一齊玩，就可以讓她吸收德文，「我都多個機會講番德文，講多啲就唔怕遺忘呢種語言。」未來一兩年，Fiona已計劃帶女兒返德國，感受其家鄉節日氣氛，屆時是時候全面教德文，認識德國文化。
訪問出街之日，Fiona一家已返回加拿大，亦可再度展開造人大計，她與丈夫都想添多個孩子，「好多朋友都問，我奶奶就更加想，喺加拿大會relax啲，上次都係made in Canada，喺香港好忙，成日趕嚟趕去氣都喘，返到去生活放慢啲。」
玩具？圖書？iPad？
當玩具、圖書、iPad放在面前，小朋友會選擇甚麼？袁彩雲的囡囡Alycia二話不說揀iPad，有聲有畫有得玩，Fiona慨嘆只是短短兩三星期，囡囡便一試愛上，繼而性情大變，由溫和的性格變得暴躁，一拿走iPad就發脾氣，令她感到好頭痛，沉迷iPad猶如中毒。片中她分享了對付iPad成癮的方法，呼籲家長們也要盡早挽救小朋友。
●撰文：Ling
●攝影：Paul Choi、 Francesca L (部分相片由受訪者提供)
●場地：SPRING Hong Kong (3465 5000)
※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。
