古明華寄語女兒 勿行後悔的路

古明華寄語女兒 勿行後悔的路

入行超過廿年的古明華(古佬),演藝事業浮浮沉沉,直至兩年前,終憑《巴不得媽媽》乸型角色「蘇基」奪得最佳男配角獎,演技得到認同。劇集播出後,曾訪問古佬談家庭,以「蘇基」形象出現的他,自覺為家人捱出頭來,面露幸福笑容。兩年後的今日,古佬已完全甩掉「乸味」,一臉嚴肅,或被17歲獨女Tammi的青少年問題困擾,「佢下年就考DSE,但我覺得佢未盡力讀書,放太多時間玩電腦。」Tammi正值青少年反叛期,與爸爸少溝通,兩父女的思想愈走愈遠,古佬坦言未想到解決辦法,只希望明年18歲成人的女兒,能清晰找到將來的路,「犯錯唔緊要,但呢個錯唔可以令自己後悔。」

1
古佬感慨女兒長大後,不再是以前聽聽話話的小女孩,「佢喺我心目中,係一個細路仔嘅大人,佢始終係我個女,就算四五十歲都係我個女,喺我眼中永遠都係細路仔。」

《愛·回家》 新登場

自奪得最佳男配角後,古佬一直劇接劇,《On Call 36小時II》、《貓屎媽媽》及《M Club》等,戲份比以前重得多。「攞獎後不停拍劇,劇與劇之間不至於疊住,有時停兩星期、半個月就開新劇。」他最新加入處境劇《愛·回家》飾演律師畢凡,剛於10月1日出場,「如果反應好,會keep住拍落去。」拍處境劇的好處是時間穩定,又維持曝光率,「依家生活好正常,七點幾起身,收工返去跑步食飯,我劇中做一個律師,我嘅生活就好似真正律師。至於個角色點發展落去,有咩感情線,我都未知,要睇觀眾嘅接受程度,如果觀眾想睇,編劇會向呢方面寫多啲。」這兩年來,古佬密密開工,一家人生活安穩,他笑言太太和女兒坐享其成,「其實老婆辛苦咗,自從我多嘢做之後,需要人幫手,佢就車我周圍去、幫我攞嘢、準備衫褲等等,好似今日嚟做訪問,老婆要車我嚟,再返去幫個女買飯,做完佢要車我走。以前乜都我搞掂晒,自己揸車返工放工,唔需要做訪問。」

女兒青春期 懶理阿爸

女兒Tammi轉眼間已17歲,上次訪問時,她不欲曝光,如今不再介懷,能發放最新一家人照片。Tammi長得亭亭玉立,樣子似足媽媽,性格亦較依賴媽媽,與爸爸較疏離,古佬無奈道:「佢由一個好依附我嘅妹,變成咩都唔會問我嘅青少年。細個咩都
問我,依家知道我好多嘢都唔識,唔會再問我,好似女仔青春期,好多秘密嘢,唔方便同男人講,又或者有男仔喺學校想追佢,應唔應該接受?唔敢試定唔想試?係兩樣嘢,呢啲佢都唔會同我講。」古佬在女兒的青春期問題上,覺得尷尬不敢叉隻腳落去,要婉轉表達爸爸的關心,「有時見到個女有問題,就叫老婆問佢,佢咁樣喎?得唔得㗎?我唔知佢知唔知我用呢個途徑關心佢,但呢個係我諗到嘅唯一方法。」

沉迷電腦 父女起爭執

電子產品風靡青少年,日日對着電腦和手機,以文字取代面談,打機多過食飯,有問題寧願上網問網友,都不願請教父母,這問題深深困擾着古佬,更導致兩父女起衝突。「半年前,我叫佢唔好成日玩電腦,一起身就玩,佢話除咗打機仲做咗好多嘢,只係你睇唔到,我話淨係睇到你打機,睇唔到你上網做功課或者搵資料,甚至幫到你生活囉,佢就話點解要做俾你睇?我唔鍾意呀,你睇到咩就咩!一句得埋嚟喎!」古佬深思後,都認同自己並非24小時監察,既然她這樣解釋,就當她講真話。但一個月前,兩父女再因此爭執,古佬仍感氣憤,「佢中六出年考DSE,開咗學喇,暑假我唔出聲俾你玩,暑假完咗我先哦你!上個月我就哦佢,『喂,你究竟幾時開始溫習呀?你係咪唔想讀?唔想讀最少都考個合格吖,我最低要求㗎喇。 』佢話我有讀呀,係唔鍾意喺你面前讀!又係咁講!你當我老竇,做一次俾我睇得唔得呀?係咪咁難呀大佬?佢就冇聲冇氣。你考得唔好冇問題,但你要盡力囉,佢個盡力標準同我個標準好唔同。」兩父女的觀點與角度存在好大分歧,古佬覺得玩電腦不健康,甚至疏遠人與人之間的關係,「同佢溝通嘅唔係一個人,係一部機器,可能裏面都有人同佢傾偈,但文字係唔同媒介,唔係真正用語言交流,對我嚟講,人與人之間交流應該係傾偈,拍video都係,但我同佢觀點立場唔同,所以好多時因為咁出現衝突,到依家都唔知點解決。」

拒靠父蔭 學演戲

雖然如此,Tammi開始發掘到另一興趣,比玩電腦更上心,古佬拭目以待她的發展,「我係做戲,老婆跳舞,都係演藝出身,佢喺呢兩方面幾有潛質,做戲佢都想涉獵吓,但我想佢讀完書先搞啦,起碼完成中學階段先,你想入演藝,起碼要考到最低入大學資格,你考到我冇問題。」Tammi現有參加跳舞班,曾請求爸爸再介紹她演戲課程,但他覺得沒用,又奇怪女兒寧願出外學演戲,都不請教最親近的他。「真正有用嘅課程唔多,如果只係搵場舞台劇俾你做,做完就算數嗰啲演技訓練班,不如我教你啦,所以我冇搵。」兩父女又因此起衝突,古佬語重心長解釋,「呢方面你冇理由唔信我吖?但佢硬係覺得我唔幫佢。」很多星二代不想靠父母,或者Tammi想靠自己學戲呢?「呢個係唔成熟嘅諗法,我以前讀過幾年演藝,之後入話劇團、拍過電影,之後做咗廿年電視,我生活、做戲嘅經驗,佢睇到㗎嘛,唔係憑空想像,我喺呢方面所有知識、經驗,都可以幫到佢,冇理由唔信我。」

 

13
Tammi下年考DSE,爸爸只希望她最少能考合格分數。

支持女兒 讀演藝學院

古佬反對她參加外間的演技班,但支持她考入演藝,「讀演藝係學習過程,係讀書,過一個學生生活享受人生,如果唔係都冇用。」在香港演戲,他相信實戰比任何課程都重要,「講真喺TVB,有幾多人真正要求乜嘢演技最正確?我做咗廿年先知喺TVB要咁做,拍電影就咁拍,全部實戰先知,經驗係最重要。唔同英美舞台劇,有一個好強嘅系統,教你點處理一個角色、做一場戲,香港冇呢個渠道,好多客觀環境問題,有啲舞台劇為咗就明星檔期,排練八、九次就上台,好唔正統,舞台劇應該排得好充足……」他抒發了許多在香港和外國演戲的經驗之談,卻原來從未告訴女兒,「你問佢真正想要乜嘢,佢未答到你,佢淨係知跳舞可以釋放自己,唱歌跳舞又好過一班人喎,但喺過程入面,搵到幾多人生樂趣呢?佢未知。最近佢去Sunny Wong
嗰度學跳舞,完成咗個表演,佢每次去都好enjoy,但佢只知道呢一刻好開心,當佢將來面對社會,為生活做啲未必想做嘅工作,有比較下佢就明白,自己熱愛演戲跳舞到咩程度,原來搵到鍾意嘅嘢係幾咁幸福,我希望佢自己喺過程中學習到,唔係我話佢聽應該點做。」

11
女兒遺傳了古佬的演藝潛質,有志在這方面發展,但他不會做引導角色,希望她能在過程中,自我尋找人生樂趣和發展機會。

 

撰文:Ling
攝影:溫俊鏘(部分相片由受訪者提供)

更多精選內容