陳浩民

五年抱四 陳浩民 鍾意屋企夠嘈

育兒

廣告

「一代馬騮精」 陳浩民 自2011年結婚後做了多仔公,五年間誕下四隻「馬騮仔」,第四個剛在今個月30日剖腹出世,又是一名女嬰,大女雅薷(Elizabeth)早已為細妹取了花名Lulu,浩民則想改名Victoria,「係秘密,Victoria’s Secret,哈哈哈……爛gag!」

 

●撰文:Ling
●攝影:Paul Choi (部分相片由受訪者提供)

浩民一家在誕B前接受本刊專訪,帶齊三個小孩及挺着巨肚的太太蔣麗莎(Lisa),全程吵吵鬧鬧、東奔西跑,連筆者也疲於奔命「捉細路」,浩民卻享受這種吵鬧的生活,「細路哥應該係咁,生多啲細路就係想多啲互動,一定有開心同吵鬧嘅時間,日日都爭寵、日日都互相投訴,但太太同我都認同一件事,咁先係童年㗎嘛。」

快人一步生四個

數到圈中同樣生四個的,近期都只有徐子淇,八年抱四, 陳浩民 五年抱四、三年抱三更厲害,「我哋只係快人一步啫,我相信嚟緊都好多人生三、四個,我只係前衛少少。依家生兩個好普遍,而且香港豐衣足食,生多個問題不大,上一代比我哋窮十倍都生七、八個啦,我阿爸嗰代都五個,我就兩個(另有一妹陳浩珊),其實屋企就應該咁熱鬧。」
當然浩民財政上負擔得到,和Lisa又喜歡小朋友,多幾個小朋友一起成長能有更快樂的童年,何樂而不為?「一切順其自然,呢個係上天俾我哋嘅恩典,俗語都話有小朋友係福份。」
男主外,女主內,Lisa全職在家照顧孩子,浩民則揹起整頭家,養起一家六口,他覺得只要喜歡小朋友,有心就會照顧得到,「當然有一定壓力,但唔係人口多咗,財政壓力就會多咗,反過來說,我覺得養小朋友係勞心,勞力都還好,最緊要佢哋健康成長,錢都係其次,你喺佢哋身上花時間係最緊要。生性嘅,使乜四百萬,佢幫你賺番都仲得;唔生性嘅,你俾佢四千萬都無用。」

錯失成長 爸爸面對現實

道理他明白,知道應多花時間在子女身上,但現實是「成日見就冇飯食喇喎。」這是很多爸爸的難處,他即使放棄內地市場返港拍戲,一樣會長時間開工,返屋企就瞓,分別不大,「冇辦法,人總要面對現實。每一刻我都有錯失小朋友成長嘅感覺,好似第一次行路、第一次講嘢,基本上都冇我份,惟有靠視頻聯絡,每日靠訊息update大家。」
家長會疑惑,爸爸經常不在的話,生少兩個好過啦,媽媽無咁吃力,但浩民有另一看法,「如果生一個,我唔喺度佢仲孤單,得大同細玩,所以先生多個有伴,但點知接住第三、四個又嚟,上一個奶都未斷又話有咗!」據稱媽媽副「引擎」run順了會易中,「真係掂吓都有!」

二仔跟家姐愛公主

大女Elizabeth已經4歲半讀K2,性格男仔頭,有大家姐風範,知道自己有照顧弟妹的責任,會幫弟妹出頭;歲幾的細女Isabella則斯斯文文,仍是個BB女;兩歲的二仔Cyrus就比較溫馴,Lisa覺得他性格和樣貌都似足老公,浩民同意道,「我係㗎,我淨係對住老婆發脾氣,對其他人唔會。」可能家中多女人,爸爸又經常返內地工作,令Cyrus的喜好變得女性化,Lisa笑謂:「佢好鍾意Frozen、Rapunzel長髮公主,因為家姐都好鍾意,家姐做乜佢跟住做乜,好崇拜家姐。有次大女搽指甲俾我睇,點知個仔又跟住搽,我都有少少驚,我話呢個係女孩子玩㗎,女孩子搽就beautiful,男孩子就ugly喇。」

第四個又是女孩,爸爸當然好開心,不介意多幾個「前世情人」,「仔女我都鍾意嘅,不過都係女好啲,我個妹對我阿爸都好好,所以生多啲女對我好啲,哈哈!同埋抱住個女錫冇咁起雞皮,攬住個仔硬係怪怪咁。」Lisa聞言搶答:「我唔會,我好錫我個仔。」

子女爭寵好過做低頭族

爸爸坦言鍾意女,媽媽鍾意仔,實際上也盡量做到不偏私,令仔女不會覺得偏心,浩民指自己公平公正,「買嘢買三份,你知佢哋多數爭啲乜嘢,最多係爭糖、爭嘢食,呢啲就會買三份,但玩具我梗係唔會咁傻買三份啦,會買可以分享嘅玩具,好似泥膠、Lego,可以一齊玩。」
一屋三個小朋友,爭執在所難免,浩民笑他們日日互相「篤背脊」,「呢一分鐘糖黐豆,下一分鐘就水溝油,成日投訴『佢搶咗我啲嘢呀』、『佢推我呀』、『佢踢我呀』……想我哋做『打手』,『你幫我打佢呀!』我哋多數聽完就算,叫佢哋自己解決。其實咁樣互動吓係好㗎,生多幾個小朋友都係想咁,好過拎住個個iPad靜晒,以為iPad在手,天下太平。」Lisa同意道,兄弟姊妹間有爭執,可以學習溝通解決問題,返到學校,以至將來投身社會,都更快融入群體生活,所以寧願「家嘈屋閉」,好過人人做低頭族。

女兒教媽媽廣東話

浩民和Lisa是一段中港婚姻,婚後Lisa留港照顧小孩,亦經常帶同孩子北上探班,早前她回港時遭入境處審查近兩小時,常被懷疑是假婚姻,在微博呻每次入境都好麻煩,最後他們要一起返內地辦理所需文件,證明是真實有效的婚姻,事件終於得到解決。
中港文化不同,Lisa要融入香港社會,必須學好廣東話及繁體字,她坦言自己起初完全不懂,還要大女充當她的廣東話老師,「我個女返咗學之後,返屋企就好鍾意講廣東話,咁佢講廣東話我就講廣東話,佢講普通話我先跟番佢。」Elizabeth就讀熱門幼稚園St. Catherine’s,着重英普發展,同學間就講廣東話,加上屋企的語言環境,令她的兩文三語發展得好。

K2的Elizabeth亦開始學認字,浩民和Lisa都認為身為中國人,繁簡體正如國粵語一樣都要識,Lisa來港後亦有學習繁體字,現全都看懂,只是不太識寫,她希望女兒最少都要看懂兩種字體。「我教佢認字會喺黑板寫晒兩種字體,好似佢個名『陳雅薷、雅薷』、『門口、门口』,我唔需要佢每個字都掌握到,最少要睇得明。」

搬大屋養一家六口

Lisa在家中要肩負教育四小孩的重任,是家中的「大姐」,浩民也笑稱他出去拍戲是「大哥」,返回家中只是「做」,聽晒老婆話,「所以你問我鍾唔鍾意出去拍戲?我都幾鍾意㗎,喺出面先搵到我嘅存在感,我俾人服侍,返屋企我就服侍人。」
老婆辛苦為他生四個,有甚麼獎勵呀?「個個都問呢個問題……其實我唔係用獎勵去鼓勵佢生仔,我哋都唔興呢啲嘢,我一向都咁愛佢啦,我有嘅都俾晒佢,所以我都冇乜剩低嚟獎勵佢,有嘅都喺晒佢度。」口說沒有,其實浩民早前已購入新大屋送家人,正在裝修階段,希望一家六口住得更安逸,「依家嗰度唔係好夠住,所以先換間大啲,都係半投資半住,第日老咗都有層樓揸手。」Lisa笑說,都是託小朋友之福才有新屋住,浩民即刻氹老婆:「唔係呀,我都係因為你先買,真㗎!」夠晒幸福。

五個小孩的校長?
陳浩民 和老婆Lisa五年抱四,非常好生養,而且兩人未打算封肚,可能再追多個!原來浩民小時候經常有種奇怪感覺,就是自己會成為「五個小孩的校長」,將來應該生五個,現在已愈來愈接近這種感覺,對此他亦不抗拒再追,「鍾意嚟就嚟,唔嚟就唔嚟啦!」去片聽聽浩民的多仔心得。

●撰文:Ling
●攝影:Paul Choi (部分相片由受訪者提供)

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。