半熟女孩 – 徐若晴

Tiffany而家喺賽馬會官立中學讀緊中四，佢話間學校雖然細，但係都算五臟俱全，而且位處九龍塘名校區，有時返學都會塞車，都幾唔方便，但係周圍都好幽靜，都幾舒服！呀！順帶一提，啱啱攞咗香港電影金像獎「最佳新人」同「最佳男配角」嘅白只，都係喺賽馬會官中畢業架！

跳舞係Tiffany最大嘅興趣，佢 3歲就開始學跳舞，芭蕾舞同街舞都有涉獵，佢話跳舞可以將自己嘅情緒放哂入去，尤其唔開心嗰陣，一跳舞，就可以將啲負面情緒發洩哂岀嚟！

就嚟DSE，Tiffany話對自己都幾有信心，如果夠分嘅話，當然希望喺本地升學。而佢最想入嘅就係HKU嘅藥劑學，仲話如果研制到一種藥可以增強記憶力，咁啲學生就唔駛讀書讀得咁辛苦！

好多人心目中嘅女神，都會係名模明星，而Tiffany心目中嘅女神，竟然係教化學嘅老師Miss Wu。佢話Miss Wu除咗教書好有心機之外，喺佢唔開心、最低落嗰陣，仲出手扶番佢起身。所以佢一見到呢位Missy，就覺得好有安全感，有咩事一定第一時間諗起佢！

其實Tiffany都幾文青架！除咗鍾意跳舞同彈琴，佢平時唔駛返學，就最鍾意同朋友去野餐，周圍揾靚景影相。佢話見到咁多植物，個人又放鬆啲，而且影到一張好靚嘅相，又會好有成功感，得閒攞番出嚟回味吓，都幾開心架！

「學界男女神」唔止要睇盡中學界靚人，仲要殺入大專界！

所以無論你係讀緊中學定大專，只要你認為自己或者身邊嘅同學仔有呢個資格，都可以自薦或推薦俾我哋!

參加方法好簡單，只要將想推薦嘅同學，或者自薦人嘅facebook ，tag喺下面 “Comment”嘅位置； 再將參加者及提名人嘅姓名、年齡、就讀學校、個人專長、聯絡電話，仲有一個月內影嘅近照兩張(全身及正面)，喺學界男女神facebook專頁 inbox或電郵到[email protected]俾我哋；如果成功通過編輯部審核，就有機會成為「學界男女神」!

「學界男女神」，等緊你嚟挑戰!

撰文: Joanne

攝影:黃大立

拍攝: Anthony Leong

剪接:Candy

美術:C.Ming

Hair+Makeup: EM Makeup

※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。