陳君宜

名媛 陳君宜 訓練工人湊B手冊

育兒

廣告

卡通點心近一年席捲熱潮,有蛋黃哥、Little Twins Star到近日的醜比頭,幕後主腦有莊思敏、苟芸慧等藝人及名媛 陳君宜 (Qinnie)。模特兒出身、2010年下嫁富商鄭躬明(Roland)的Qinnie,

去年初誕下一子鄭嵐升(Ayden),受囝囝的啟發下,做飲食生意也多以小朋友角度出發,希望打造「好玩好食」的親子餐廳。
囝囝出身自富裕之家,Qinnie坦言也害怕囝囝會變「港孩」,所以她第一時間訓練工人姐姐,
絕不能縱容「少主」,「train工人緊要過train個仔,如果唔係好易縱壞。」口講無用,她撰寫了一本工人手冊,列明衣食住行如何處理,更重要是教好囝囝自理,跌倒不能扶!須嚴格遵守規律生活!

契媽羅霖錫到燶

初出道有「翻版周嘉玲」之稱的Qinnie,與千憶新抱徐子淇同期出道,故兩人份屬好友,連Qinnie的婚禮都請到子淇爸爸做主婚人。子淇八年抱四,湊仔經驗豐富,但Qinnie明言,現時13個月大的囝囝與子淇的孩子年齡不相近,不太啱玩,都是自己尋找「網絡大神」,搜集資料去學湊仔。
Qinnie在圈中人緣甚廣,其中成為亞視熄機最後一個鏡頭的羅霖(Candy),就做了Ayden的契媽,她笑稱羅霖好錫Ayden,「囝囝上個月一歲生日,我哋一家都唔喺香港,隔咗咁耐Candy都照補送生日禮物俾我個仔。」Qinnie誕子後向Candy說了幾句戲言,Candy便認真當起契媽,對這個半邊仔錫到燶,更為Qinnie提供了不少育兒心得。

六個月識企 十個月識行

Qinnie一眾媽咪級好友意見紛紜,但她不會照單全收,自己上網翻查資料之餘,會再徵詢醫生意見。Ayden六個月大時,有想學行的跡象,Qinnie力排眾議購買學行車給囝囝,坐了兩個月,到十個月大已不用扶着,識自己行路。「全部朋友都話唔好咁早用學行車呀,對腳會曲㗎,但醫生話其實唔會嘅,只要腳夠力、骨架好,佢對腳就唔會曲。其實以前都有好多小朋友坐學行車,都冇出問題,唔知點解依家咁多人講。」
俗語謂「三仆、六坐、九扶籬」,即六個月大BB會學識坐,九個月大能扶着站立,約十二個月開始學行,現時十三個月大的Ayden,比一般小朋友發展快了幾個月,「佢依家直頭想跑㖭,隻腳成日損晒,哈哈!」Qinnie解釋一切都是囝囝自然發展,沒有強迫他「贏在起跑線」,「佢六、七個月大已經成日扶嘢企起身,見佢好似想學行,先俾佢提早開始,買咗個大圍欄俾佢學爬學行,但佢從來都冇爬過,只係扶住欄杆行,所以佢到依家都唔識爬。」

六個月食牛扒

好多專家曾指出,跳過爬行過程直接行路,有機會影響BB的心智發展,而且爬行好處多,透過四肢能刺激腦部智能及肌肉發展,但Qinnie指囝囝智力正常,亦沒有O形腳,覺得家長可因應自己孩子的發展進度作選擇。「好多家長會以訛傳訛,又話驚O型腳、先爬行會聰明啲㗎,依家囝囝13個月,我唔覺佢比其他小朋友蠢呀。」不過,Qinnie也不希望囝囝完全跳過爬行階段,購入了一些專為爬行而設、韓國產可摺疊成四方的軟墊,重新培訓他的爬行發展。
Ayden行得快,食飯都快人一步,六個月大的BB開始食糊仔,他已食牛扒,Qinnie笑說:「我切得好碎,佢又食到!好多媽咪話唔好俾佢食呀,BB個胃未發展得好,咁早食牛扒驚消化唔到,我老公就話如果佢真係消化唔到,可能會肚屙,但佢又冇事,可能佢比較強壯啲,依家已經開始食淋啲嘅飯,因為佢已經唔想食糊仔。」

BB餐三餸一湯

Ayden的進食能力如此迅速,可能與囝囝從小與家人同枱開飯有關, Qinnie說:「我哋每次食飯都擺佢喺側邊,唔知係咪睇得多,見到我哋比較多餸菜,自己得兜糊仔,佢就開始唔想食,成日指住我哋啲餸,再指自己,所以我就設計咗三餸一湯俾佢,似番我哋咁食,第一次佢真係超級開心,覺得係食緊我哋嘅嘢。」
BB餐有三餸一湯,每日不同款式,都頗有難度,但Qinnie要打理餐廳生意,好多時要交託工人姐姐幫手,她會寫好時間表及所有餐單,不怕工人搞錯。「講都冇用,唔寫出嚟佢哋唔會記得,今日食魚、聽日食雞、後日食豬,如果俾晒工人搞就會日日俾同一款餸,

博我唔知。我又買晒盒仔,隔幾日買一次餸,分好晒三日六餐,預先切好晒,每一餐所需食材就放入一個盒仔,三日就裝六個盒,咁工人每次拎一個盒出來煮就得。」

跌倒絕不能扶

「訓練工人好緊要」,Qinnie明言自婚後已開始撰寫「工人手冊」,減少好多爭拗,生B後亦第一時間訓練工人姐姐,絕不能縱容少主變港孩。「有次佢跌低,工人全部衝晒去扶佢,前排我工作忙成日唔喺屋企,唔知佢哋係咁樣,有一日我喺屋企見到個仔跌一跌後不停喊,我見佢又冇整親,做乜喊得咁犀利?原來啲工人姐姐衝去呵番佢。我就同番佢哋講,個個細路都會跌親,個仔跌由佢跌,唔好表現驚慌仲哄埋去,佢仲喊得犀利。我見佢跌親,我會話『起番身,冇事嘅!』佢依家都識自己起番身,堅強咗好多。」
近日天氣忽冷忽熱,單靠工人幫「少主」着衫又弊,經常一件外套走天涯,「有時我出咗街,叫工人帶囝囝出來,上星期10幾度着件厚褸,今日20度又着番呢件褸,轉涼又唔識幫佢着留件衫,我話你哋都會有感覺㗎嘛!我就影晒相5至10度着咩衫,15至20度就着呢啲。」

Qinnie花在教育工人的時間,可能比囝囝更多,可有想過把這些時間全放在兒子身上?「又好難,請工人係來幫我手,所以我就要諗方法令佢真係幫到我,一齊教好小朋友。」

工人湊B要點
自理:跌倒不能扶!嚴格跟從BB規律時間表!訓練BB自行睡覺,工人一放BB落床就要離開,不能又氹又抱!
飲食:寫下要工人買甚麼餸菜,或者親自預先買好幾日餸菜,
切好並做每餐分類,再放食物盒,每盒代表一餐,其寫明多變的烹調方法,不能每次烚熟就算。
穿衣:為孩子的衣服分類拍照,列明幾多度應穿甚麼類型衣服。

BB扮靚貼士
Qinnie是模特兒出身,亦讀過fashion,喜歡網購為自己及囝囝扮靚,對此有很多心得,她有三點建議︰
1 童裝毋須買名牌,小朋友大得快,衣服好快不合穿;更毋須買大size,以為留待半年、一年後穿,但到時可能因應季節又不合穿,造成浪費。
2 質量是首重,洗多幾次都不會霉,因為小朋友需經常換衫,為質量貴少少都值。
3 鞋必須軟熟,切勿貪靚買一些硬底鞋,影響BB學行,但又不能太軟,因為要出街;另外買新鞋時留意有否頂趾,小朋友不太懂得表達,家長要按一按鞋頭測試。
網店推介:
Shan and Toad :www.shanandtoad.com

Mini Rodini: www.minirodini.com

●撰文:Ling
●攝影:黃大立(部分相片由受訪者提供)

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。