張堅庭

張堅庭 談教育:分數絕無意義

育兒

廣告

一場TSA風波,觸發家長對香港教育制度的漫長控訴,著名導演張堅庭多次為反TSA發聲,直斥TSA,甚至香港整個填鴨式教育制度,把小朋友的上學熱情消磨殆盡,實屬香港悲劇。育有三個孩子高銘、一諾和高翔(Jonathan)的 張堅庭 坦言,香港的教育制度完全倒行逆施,「依家啲教育倒轉晒,分數令人競爭加劇,分數嘅意義只係證明你比更多失敗嘅人好,呢啲競爭性完全冇建設。」

 
條條大路通羅馬, 張堅庭 教育孩子從不追求分數,以培養學習興趣為首要目標,三子女對將來目標清晰,即使 Jonathan想做「未必搵到食」的職業足球員,亦鼓勵他向前邁進,因為 張堅庭 認為,父母最重要培養子女成人,不一定要成材。

培養子女樂於求學

眼見時下小朋友有很多不快回憶,教育問題必佔多數,因分數低、功課追不上而被父母打罵,經常發生, 張堅庭 近年為此四出走訪學校,游說學校及家長,別把功課及分數看得太重。「呢個咁簡單嘅道理,好多人都搞唔通,連搞教育嘅人都搞唔通。好多家長話冇錢讀國際學校,問題唔係有冇錢讀國際學校,其實國際學校最大分別係少功課、唔講分數,87分、88分係冇意義㗎,多啲多元化活動,當知識係一種樂趣,學校點會做唔到呢幾樣嘢呢?點解一定係國際學校先做到呢?大家都認同國際學校係好,所以大家就湧晒去,俾好多錢去讀。」

下頁:老師唔好覺得自己好醒!

在好多學校的學校理念、校長的話,總離不開這句「讓學生愉快學習」,亦相信無人反對,但學校偏偏講得出做不到,正如政府宣傳的「求學不是求分數」,得個講字。他覺得學校只要調整教學態度,就可以令學生開心好多,「多啲培養學生追尋知識,老師唔好覺得自己好醒,應該係學生生命中嘅同行者,咁教育就變得好開心。」老師質疑了,他們都是按制度下工作,很多時身不由己,張堅庭嘆謂:「大家都有責任,你都有責任回饋,呢個係制度下嘅悲劇,係香港其中一個悲劇,我哋改變唔到。」

 

戲劇教育助建人際關係

望子成龍,家長對仔女充滿期望,把期望轉化成分數,形成壓力,最終適得其反。「分數同測驗一定要擺到最後,第一必須培養小朋友學習興趣,覺得學習係開心嘅,家庭就會少好多焦慮。」放棄分數,入不到好學校怎辦?「你要諗個代價係乜喇,如果小朋友對讀書中途放棄,仲點考到大學呢?佢一生人都對學習冇興趣了,而你同小朋友個關係又惡劣。當佢對學習有興趣,就算佢今次考唔到好學校,但佢將來都有機會入到大學,入到佢心儀嘅學科,係lifelong嘅。」
 
一個人的成功元素除了找到自己方向,亦需建立好人際關係,所以張堅庭推廣了多年戲劇教育,「幸福嘅定義就喺人際關係,有好嘅家人、朋友,唔係搵到幾多錢。Drama係其中一個工具,係群體活動,訓練到點樣講嘢、表達,仲有文學修養,講嘢唔會乏味,幫助到一個人成長。」

拍片建立共同回憶

張堅庭 把三子女送往國際學校其中一個原因,正是培養他們對戲劇的興趣,「國際學校有多元化活動,有戲劇、跳舞等等。細仔細個講嘢都好『甩咳』,喺學校多參與 戲劇之後,講嘢慢慢有改進。」Jonathan今年將赴英國升學,主修drama、business及運動,「主要為咗踢波,希望將來向職業足球員發 展。」張堅庭知道兒子對戲劇有興趣,鼓勵他多加研讀,「踢波踢到咁上下要退落嚟,多一條路就可轉型做演員,做戲唔係話做就做,靠靚仔就得㗎嘛,佢間學校喺 戲劇、舞台藝術都幾出名。」

●撰文:Ling
●攝影:Clay Lam(部分相片由受訪者提供)

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。