自家製 棉花糖

小小豬又有新攪作，係我啲食譜書入面搵到本教整 棉花糖 嘅書，之後就要求我買材料同佢一齊整，見佢咁有誠意同埋大部份材料屋企都有，所以就嚟開工親子廚房一番啦！

其實內心深處我都係好鐘意食 棉花糖，不過都係買現成多，之前都未整過。雖然早前好友轉贈左本整棉花糖嘅書俾我，嗰時我都睇左好幾個食譜打算整，不過條懶根都仲未除晒，所以一直都係得個諗字，所以今次有小小豬帶起，我終於的起心肝啦！

細砂糖 150g、粟膠 1湯匙、蛋白2隻、魚膠粉 15g、檸檬汁 1湯匙、糖霜適量及水60ml~

材料好似好多咁，但整落又好似幾易，小小豬話邊睇住食譜邊整呀~

首先將兩隻蛋白加入碗中，然後用打蛋器打至發泡~

打到杰身，直至倒轉個碗都唔會下滑就完成了~

另一邊就將砂糖、魚膠粉、水及粟膠加入碗內~

之後就用加熱至溶化~

待溶液涼至室溫之後，就可以慢慢加入到蛋白泡泡啦~

一定要慢慢分幾次加入，同埋再慢慢攪勻，因為如果一快手，啲空氣入返去個蛋白泡泡度時，咁就會失敗啦~

之後再加檸檬汁~

再慢慢攪~

攪勻好晒就可以倒入小盒，之後放入雪櫃雪啦~

接下頁

雪左兩個鐘左右，就可以拎出嚟切細細粒~

最後碌一層糖霜(椰絲都可以呀)~

咁就完成晒啦~

小小豬有得食佢自家制嘅棉花糖啦~

其實個口感同平時係街上買嘅椰絲棉花糖係差唔多，只不過可能係我地都一向唔太好甜，所以入口就覺得過甜，所以感覺就唔算太啱我地口味。

但…依個係小小豬嘅努力製成品，所以我地都有KO晒啲棉花糖，因為要俾啲信心佢，咁佢先再有動力繼續主動提意整啲咩甜品呀！

BY 小小豬的成長日誌