關心妍

關心妍 的護胎戒條

育兒

廣告

十月懷胎,時間轉眼就過,但對 關心妍 來說,這段路仍然好漫長,「有咗真係好開心,但仲要守到38星期,呢段路依然好艱辛、好擔心,唔知自己身體可唔可以守到尾,我一定要身體好。」

懷孕頭三個月要守秘,是她第一個難關,年尾早已接下大量工作,又要出席樂壇頒獎禮、聖誕騷、新年騷,不能以懷孕作推搪,「我個半月就嘔,成日覺得好暈又眼 瞓,個人好似熄機咁,嗰排又好多嘢做,咪話俾人聽我腸胃炎,頂硬上囉!最好笑我成日去化妝整頭,一坐低就無止境咁瞓,一出騷就扮精神,其實我少少力量都 冇,以前我飲兩啖寶礦力就得,嗰陣飲成支都唔掂。」害喜加上工作,令她叫苦連天,她問BB:「唔好令媽咪咁辛苦得唔得呀。」BB好像聽到了,到她懷孕第 八、九個星期,個人重新開機,醒晒。

希望誕下大家姐

Jade 現在小心翼翼護胎,盡量少去人多的地方,以免感染細菌生病,因為她對部分藥物敏感,而且孕婦很多藥也不能吃,一病就手尾長,「即使孕婦可食嘅消炎藥我都唔 食得,因為我對盤尼西林敏感,醫生話如果我病要自己吽好,會危險啲,所以叫我盡量少去人多地方。」Jade以中西合璧養胎,開始飲一些安胎茶如桑寄生蛋 茶,以食療為主。

講起懷孕飲食,一向為食的Jade也乖乖戒口,並聽從腹中BB的選擇,「BB鍾意食得清淡,有蛋糕同白麵包揀,佢會叫我揀白麵包;果汁同水,佢揀水。平時我唔會食呢啲嘢,除咗開演唱會先食得咁清,冇油冇鹽。平時我好為食,鍾意下廚,有得揀我會揀蛋糕,點會揀白麵包。」

已懷孕六個月的Jade暫定剖腹生產,她公布今胎生B女,「大家姐照顧屋企、細佬妹會好過哥哥,女仔始終有一種母性,有鍾意照顧人嘅性格。」言下之意都想生多兩個吧?「如果真係有梗係welcome,但咁辛苦先有一個,嚟咗呢個先算啦,哈哈!」

●撰文:Ling
●攝影:Clay Lam (部分相片由受訪者提供)