胎心機 安唔安全?

胎心機 安唔安全?

好多媽咪都會問: 胎心機 安唔安全? 胎心機嘅射頻會唔會影響胎兒? 胎心機 係咪有輻射? 我由10 weeks開始就有用胎心機,到今日已經25w1D,因為胎動已經出現了,所以我已經無再用胎心機喇,不過都想喺度分享返個心路歷程。

 

胎心
胎心超聲波圖,圖片是我在21週照結構時影的。

 

關於胎心,或許只有過來人明白,不幸之後再次懷孕,內心會有幾大嘅惶恐,所以我第一樣因懷孕而購買嘅係胎心機。真係好擔心時就會聽吓胎心,聽完就可以好放心地瞓覺。第一次產檢時,醫生照超聲波已經照到出嚟,準媽媽們會稱之為照閃閃,我覺得呢樣野係懷孕早期最最最重要嘅一關。尤其係曾經試過胎囊無胎心嘅朋友會明白,會好緊張。今次我好幸運,一發現中獎時已經有胎心,睇住超聲波屏幕一閃又一閃,醫生開聲比我聽,卜卜聲,果一幕我呢世都唔會忘記,因為果一刻令我真切地感受到有一個生命喺肚入面。

 

胎心機
胎心機,為咗安撫自己緊張心情而買的

 

不過,我用之前都搵過下資料,網上嘅資料太多,有賣胎心機嘅店舖亦好多,胎心機 又有好多,咁究竟 胎心機 安唔安全? 準媽媽又應該點樣選擇? 買之前,我都係上網搵資料,其中有一個網站本身係賣醫療產品,用google search 「 胎心機 射頻」就會睇到,一打開第一句就睇到「 胎心機 無用嘅!」但佢又係賣 胎心機 嘅公司,究竟咩葫蘆賣咩藥?

 

下頁:咁究竟用成點呢?

呢個網站提到:「美國藥品及食物管制局 (FDA) 以及加拿大衛生署(Health Canada) 有規定家用 胎心機 的超聲波劑量(低於 97mW/c㎡(Isata))…市面胎心機質量不高,探頭敏感度偏低,為彌補信號欠佳,必需加強超聲波劑量。此類產品一般在未有信號時(如擺放於空中)會有十分明顯的沙沙聲。使用這些產品的確有機會影響胎兒。」

 

參考完呢個網站所引出嘅權威資料,我覺得唔可以話胎心機無用嘅,只要唔好高過個安全輸出劑量就okay啦。睇返自己買果部輸出嘅超聲波資料:
空間峰值聲壓:25mW/c㎡
超聲輸出功率:<1mW/c㎡

 

聽心跳
聽心跳 (圖片在25週時拍的,只作示範)

 

兩個數都唔超過安全指引,咁我就唔再擔心 胎心機 會影響BB了。都係果句,如果擔心/有懷疑就唔好用/唔好食,如果要用/要食,最好睇清楚適唔適合先啦。

 

另外,前日出席某奶粉商媽媽會嘅產前講座,主辦單位送咗部 胎心機 比出席嘅媽咪,所以我依家有兩部呀,有需要嘅朋友,歡迎留言轉贈。

更多精選內容