懷孕 便秘 救星A+B

懷孕 便秘 救星A+B

由初孕到依家25weeks,便秘 嘅問題一直困擾住我,平常人便秘已經好痛苦,懷孕期間便秘真係會想殺人。嚴重期間幾乎兩星期無大便,最近亂打亂撞下有重大發現,便秘問題終於有緩和嘅跡象…

 

生果
食生果有助通便,但咩組合可以發揮得最好?

 

孕期反應人人都有少少唔同,初孕無胃口、口啖啖,我都唔例外,嘢又唔想食,水都唔想飲,成日胃脹胃痛,有次重胃酸倒流有火燒心嘅情況,所以初孕時期比懷孕前輕咗幾Kg。

 

便秘時開始了飲水及排便紀錄
3月開始做飲水紀錄提醒自己飲夠水幫忙排便

 

每朝早餐麥皮麥片+香蕉+乳酪+鮮奶以為夠晒乖啦,衰就衰在初孕時好為食,薯片餅乾起勢咁食,大肚又唔可以飲涼茶,令 便秘 問題出現喺早孕期。

 

豐富纖維有助解決便秘問題
麥皮加香蕉係每日嘅早餐

 

無大便亦無便意,個肚實晒,感覺到個人好熱氣,口又臭放屁時連自己都頂唔順,最慘係懷孕期間又唔可以飲涼茶之類,所以我試咗好多坊間通大便嘅方法。以下六種方法唔係無效,好多人都萬試萬靈,有 便秘嘅 朋友不妨試試,包括:

 

1/ 西梅-食新鮮西梅或飲西梅汁

2/ 蜜糖-紐西蘭蜂膠

3/ 乳酪-早餐時搭套

4/ 小麥肧芽-早餐時搭配麥皮

5/ 奇異果-酸到流眼水照食

6/ 按摩-主要係按肚邊浴腸道打圈

 

飲用蜂蜜可解決便秘問題
最好揀選可供孕婦食用嘅蜂蜜

 

最近亂打亂撞下發現好野!我嘅懷孕便秘救星A+B就係檸檬+香蕉,當日我飲完檸水再食香蕉,都唔駛十五分鐘就嚟料,如果你都有 便秘 問題,事不宜遲,試試佢啦, 便秘 唔舒緩會生痔瘡㗎。

 

最後喺度都提醒返,要解決 便秘 問題,除咗食療,定期坐廁所嘅習慣係其中一樣最好嘅方法。另外,如果真係排唔到出嚟都唔好強迫自己,因為過度用力係會令血管擴張,從而產生痔瘡嘅問題,祝大家早日通便!

更多精選內容