高皓正

高皓正 反對同性婚姻 兩個媽咪唔完整

育兒

廣告

虔誠高主教VS大愛何同志,基督徒 高皓正 (Zac)與女同志何韻詩存在着信仰及婚姻看法的矛盾,Viu TV節目《跟着矛盾去旅行》撮合二人,同遊史上第一個以人民公投通過同性婚姻的天主教國家愛爾蘭,阿詩帶Zac去基吧見識,Zac則帶她前往由禮拜堂改建成的餐廳,經過多日相處及了解後,落淚向她道歉:「我相信神愛世人,唔係神愛直人,我覺得神係好愛你,甚至可能代表住一班受迫壓嘅人,唔知我哋有冇一日能夠做到教友,at least可以做朋友。」Zac坦言自己仍是反對同性婚姻,但不反對別人有自己意見,但婚姻涉及下一代,兩個爸爸或兩個媽媽之下,在生育小朋友的問題仍充滿矛盾……

 

不斷祈禱的「港仔」

Zac和阿詩十年前friend過一陣子,不久斷了聯絡,大家各走兩極,他希望透過今次旅程能了解她的世界,做回朋友,「出發前我最想聽佢講,平時只喺報章雜誌見到佢。今次我最想做到嘅係,我喺呢行其實都有好多同性戀朋友,一直可以融洽相處,但點解個社會好似搞到有信仰嘅人係『恐同』呢?你哋『耶X』就係排斥人。根本唔係事實,我想以一個信耶穌嘅人去話俾大家知,其實我哋係點睇,唔係『恐同』㗎喎!」節目中他除了不斷祈禱之外,與其他港男沒分別,連阿詩都話他是一名「港仔」,鍾意shopping、玩樂,從沒有向她洗腦,試圖迫她信耶穌。

不會迫人信耶穌

「我只係好鍾意自己信念,好似點解咁多人想移民去美國,可能因為啲人好、制度好,就算文化、法律同我哋唔一樣,只要個國家做得好,就自然多人想去。正如我哋信仰係好嘅,啲人出嚟係好嘅,自然就有人buy呢一套。」他自覺有使命去讓更多人認識聖經這一套,他本身就是一個榜樣,你buy的,就自然會信,「聖經教我嘅,我做咗出嚟,如果你哋覺得我咁樣係好嘅,你自然就會羨慕,而唔係我迫你,冇得迫㗎。」

兩人對婚姻的看法截然不同,阿詩一直爭取同性婚姻合法化,Zac則表明會投下反對票,但不代表他反對別人支持的聲音,「我會同好多人探討,有啲資訊可能大家都未知,連支持嘅人都唔會講。我以前讀性學研究,讀咗好多關於兩性嘅前文後理、歷史背景、形成問題等等,所以我先較清楚全面嘅資訊。」

續下頁

探討下一代成長

無論是一夫一妻,還是同性婚姻,Zac認為皆不能盲撐,必須先作全面了解,身為兩孩之父的他,最關注同性婚姻下的小朋友發展。「好似兩個男士一齊,佢哋要生一個小朋友,其中一方一定同個小朋友冇血緣,係咪可以咁理想用法律令家庭融洽?公公婆婆承唔承認小朋友?遺產點分?而呢個小朋友一定有生母,但生母又未必係DNA個媽咪,而呢兩個『媽咪』又未必可以同個小朋友生活,一定會造成某啲情況需要解決,例如個生母係咪心靈健康?佢懷胎十月又係咪健康?生母係點對胎兒有好大影響。」

節目中阿詩反指,小朋友的成長環境才是最重要,而宗教亦不應左右人的基本選擇權,Zac從阿詩的世界中得到很多新看法。「佢哋覺得,好多人都係單親家庭成長,一樣可以生活得好,依家俾你兩個爸爸,或者兩個媽媽,點解唔好呢?嗯……都可以咁睇喎。」

夫婦須放對方首位

堅守異性婚姻的「高主教」,深信家庭建基於愛,父母之間有濃厚的愛,才能帶給下一代溫暖,所以他與太太陸凱兒一直灌輸仔女,父母永遠將雙方放第一位,令仔女在家中充滿安全感。「屋企係一個小社會,要俾小朋友知道佢哋唔係皇帝,爹哋媽咪先係做主,我哋喺對方心目中都係最重要嘅,小朋友要融入我哋關係,所以佢哋知道唔可以破壞我哋,唔會向我投訴媽咪,或者向媽咪投訴我,我哋永遠睇法一致,聽媽咪話即係聽我話。」

 

●撰文:Ling
●攝影:Clay Lam(部分相片由受訪者提供)