魚腩童話集~序

中國人有句說話指一個人嘅性格係「三歲定八十」…我好懷疑…會唔會三個月已經定咗呢?我唔係講出生後三個月…係指喺媽咪肚裡嗰三個月!太太陀詠渝嗰陣,當時電視經常播一間航空公司嘅廣告。廣告中嘅小演員係個女仔,佢出發去旅行不停嘴講:我哋去嗰度..有無美國咁遠、有無英國咁遠、有無波士頓咁遠、有無上面咁遠、有無下面咁遠、有無左邊咁遠、有無右邊咁遠、究竟仲有幾遠呀?最後,空中服務員一杯雪糕令佢靜晒!嗰陣我同太太不約而同都好希望…第日自己個女都可以咁得意、咁多嘢講、同埋拍埋廣告就好喇!點知詠渝同卓楠出世後從識講嘢開始無時停,又鐘意拍廣告,兼且講嘢仲好大聲,攪到我經常好尷尬、無覺好瞓、仲爆出唔少笑料、以及經常聽到可愛嘅天真「童‧話」…….