主播王春媚 教女唔講新聞

主播王春媚 教女唔講新聞

從無綫新聞過檔有線做主播的王春媚(Mei),兩年多前已為人母,與丈夫Allan誕下女兒郭睿澄(Megan),名字由Mei夫婦親自操刀,投射了他們對女兒的期望——睿即聰明、澄指清澈,做人要有清澈的心。香港政治大是大非當前,隨時有突發大事,訪問當日正正爆出催淚彈,Mei亦急需消假開工,一行人發揮「唔好急,最緊要快」的精神,極速完成讓她返回崗位。Mei坦言,Megan年紀尚輕,未懂得透徹分析對與錯,即使面對政治大事,亦暫不會讓她接觸新聞,「對佢嚟講新聞係幾深,與其夾硬迫佢學咁深嘅嘢,倒不如我俾佢玩多啲,有番個童年。」

1
Mei 暫不打算再生第二個,現時照顧Megan已付出很多心機和時間,難以應付兩個,她慶幸囡囡有好多堂兄弟姊妹和表姐表哥,一起快樂成長。

「蟑螂事件」解畫

數到靚女主播,王春媚必入十大,其中經典一幕「蟑螂事件」,仍為人津津樂道。Mei效力TVB期間,在長洲直播報道太平清醮時,有隻疑似蟑螂飛到她頭上,她保持鎮定,直至報道完畢,鏡頭轉換前一刻才慌張撥開,被網民大讚專業、淡定,亦有人估計她根本不知情。Mei現正式解畫,當時的確知道頭上有異物,「幫我捉走嗰隻嘢嘅cam man講,嗰隻唔係曱甴,我都唔記得係咩,總之係昆蟲,我feel到有隻嘢飛嚟,唔知係咩,我堅驚!成班工作人員係咁叫我唔好郁,但我講緊live,唔通走咗去咩,嗰刻點都要頂埋佢,講完我都hold咗一陣,以為鏡頭cut咗,點知cut慢咗!我好驚昆蟲,平時見到曱甴我即刻彈開,嗰次係堅驚!」

南亞海嘯最難忘

這個惹笑場面,並非Mei最難忘的採訪經驗,南亞海嘯和菲律賓人質事件,才是刻骨銘心。2004年爆發南亞海嘯,總死亡人數超過29萬,Mei當時身在機場等候旅客返港,新聞部急call她買機票前往重災區布吉,一星期的採訪震撼人心。「收容中心有塊board,張貼晒搵到嘅屍體相,啲屍體浸咗好耐,根本認唔到,但家屬好努力嘗試喺堆相度搵親人,真係好難忘,至今仲有陰影,前排有套戲講海嘯,我都唔敢睇。」Mei於2007年結婚,成為郭太後成熟了,但依然眼淺,2010年發生菲律賓人質事件,目睹多名孩子遭槍殺,已為人婦的她觸動心靈,強忍淚水報新聞。「我喺廠讀緊新聞,成個下午大家都覺得冇乜嘢,個槍手只係行來行去,但夜晚突然開槍,自己都始料不及,好多細路仔喺旅遊巴上,嗰一刻我好想喊出嚟,但我喺嗰個崗位,就要完成工作。我好記得當晚收工後,返屋企一見到老公,即刻攬住佢喊。」

8
Megan 很少上興趣班,唯一主動提出學芭蕾舞,因每日返學會經過芭蕾舞室,想加入翩翩起舞。

主播絕非花瓶

作為新聞從業員, 必須收起情緒, 緊守崗位,對眼淺的Mei來說絕不容易,「做記者見盡好多生離死別、好多慘事,對自己情緒管理係好大挑戰。」在無綫一直兼任記者主播的她,05年轉投有線擔任全職主播,前年她誕B後腳頭好,升任總主播至今。Mei解釋過檔與無綫新聞立場無關,只希望專注主播工作,「TVB兩樣都要做,我都鍾意採訪,但體力上唔係好應付到,採訪要日曬雨淋,自己身體唔係十分好,所以決定轉去有線做全職主播。有線分工好仔細,因為24小時新聞,需要全職主播。」靚女做主播,常被抨擊為花瓶,Mei絕不認同,「有線好着重主播訓練,我哋唔係齋讀稿,會做好多直播,好多時都冇稿,需要預備好多嘢,要自己寫自己搵,一做直播就靠我哋講晒,入面最多提你最新消息,所以我哋唔係齋讀稿嘅花瓶。」

Mei 曾想過做全職媽媽,但她熱愛主播工作,不捨得離職。
Mei 曾想過做全職媽媽,但她熱愛主播工作,不捨得離職。

嚴禁囡囡睇電視

Mei熱愛現時工作,但始終時間較困身,有大新聞又要消假上班,偶有辭職當全職媽媽的念頭,「久唔久就覺得好矛盾,份
工我鍾意做,但個女亦需要我陪,佢好似大得好快,錯過咗一啲成長片段。」幸好丈夫Allan做生產小型家電生意,時間彈性得
多,可以早收工陪囡囡Megan游水玩耍,讓Mei放心工作。她坦言工作與家庭時間難分配,很多時收工Megan已入睡,「我哋返shift,我已經較多日更,通常收夜晚八點,但佢八點就瞓。」她自小培養囡囡早睡早起習慣,「早瞓會叻啲吖嘛,哈哈!小朋友要瞓多啲㗎,佢起碼瞓到朝早七點幾。」Megan平日想見媽媽,開電視可能快過等收工,但Mei嚴禁囡囡睇電視,「雖然我做電視呢行,但我好少俾佢睇電視,我覺得小朋友細個嘅專注力好重要,所以佢兩歲前好少睇電視,唔想影響佢專注力,依家都係間中睇,佢睇過一次我讀新聞,之後成日覺得媽咪喺電視入面,同佢解釋過,唔知佢明唔明喇。」

入讀華德福學前班

雖然Mei對時事新聞認識深,但她笑言回家後不會再看新聞,「返工仲睇唔夠咩,哈哈!」她對Megan亦未展開通識教育,待她大一點有分析能力後,才灌輸新聞通識,「通識對佢嚟講太複雜,我希望佢學習生活細節先,例如點照顧自己、培養性格、禮貌等等,我比較着重呢方面。知識佢大大吓自然會學到,唔使太細個塞好多嘢俾佢,相反性格、禮貌,大個咗就教唔番,一定要從小培育。」兩歲半的Megan已開始上學生涯,Mei貫徹遊戲學習、重品德的教育方針,選擇入讀位於銀線灣的Garden House Pre-school and Kindergarten,採用華德福教育法(Waldorf Education ),崇尚自然教學,Mei說:「學校講明七歲前唔教寫字,着重透過遊戲同生活去學習,例如返三個鐘,頭九個字喺playground玩,之後有小食同去廁所時間,最特別會學整餅、整麵包,係佢哋親自整,playgroup已經有學。整完餅之後就唱歌、聽故事時間,老師會用木偶呢啲實物去講故事。」在現今功利主義的讀書環境,就讀這類強調玩樂的學校,難以升讀較佳小學,Mei卻不介意,「讀書我未諗得好詳細,個女返過呢間學校嘅playgroup,玩得好開心,下年讀K1都考慮繼續讀,長遠想小學後送佢外國讀書。」Mei寧願囡囡做個快樂小孩,好過接受填鴨式教育,弄至身心俱疲,「快樂係培養一個人有好品德、好性格嘅主要元素,所以從揀學校,到平常培養佢,都會從呢一點出發。 」

11
Mei 長遠想送囡囡到外國讀書,現階段重點學好中文,「中文比其他語言難學,中文個個字都唔同,英文只係得26個字母。」

●撰文:Ling
●攝影:黃大立 (部分相片由受訪者提供)
●場地:Little Pods (tel: 2510 0353)

 

更多精選內容