海帶蘿蔔蜆湯

【零失敗簡單美食】 海帶蘿蔔蜆湯

專欄

廣告

早幾日買左啲海帶打算整綠豆沙,無意間俾我搵到依個食譜,即刻心心眼,因為有我至愛嘅蜆,同埋有啖滾湯食飯時飲下,啱晒依家悶熱天氣,所以即刻煮依個 海帶蘿蔔蜆湯 啦!

 

其實海帶我地間唔中有食,就好似去日式餐廳飲麵豉湯就一定會食到,依個小小豬真係完全唔浪費,少少嘅一片佢都唔放過呀!食就食得多,不過我又真係好似冇煮過,因為成日以為海帶都係啲難處理嘅食物。

 

不過原來都係好簡單,只係煮前浸一陣15-20分鐘就可以,原來海帶仲可以提高免疫力、降壓及排毒,唔係上網搵食譜都唔知原來係有益呀!

 

簡單方便又易煮嘅餸就最啱我,三樣材料就可以煮到,海帶一片(如果個人鐘意可以加多一至兩片)、白蘿蔔一條、蜆1斤~

 

蜆用鹽水浸至吐沙;海帶浸水15-20分鐘待軟身~

 

白蘿蔔去皮,以滾筒式切塊~

 

海帶待軟身後切塊~

 

煲內放約2L水,水滾後加入海帶和蘿蔔,先用大火加蓋煲10分鐘,之後轉細火加蓋煲多10分鐘~

 

然後再轉返大火加入蜆~

 

煲至蜆開口,依個時候一定要留意觀察,因為煲太耐嘅蜆就會老身唔好食啦~

 

最後加少少鹽就食得啦~

 

食嘅時候將個蜆加少少湯一齊食,真係何其YUMMY呀~

 

依個真係簡單得嚟真係唔錯,只係得三樣材料,我都冇加入任何味精啖湯都好鮮甜,唔上蜆怪上身嘅我狂食,就連大老細都一隻接一隻咁食,所以今次依個新嘗試係成功呀!

 

BY 小小豬的成長日誌