包包

徐榮爆 包包 十大軼事

熱話

廣告

包包 咁得人鍾意,一歲未夠就已經爆紅喇! 相信大家對於鏡頭下嘅佢,一定更加有興趣啦! 包爸 徐榮 非常慷慨,而家就爆 包包 鮮為人知嘅十件事俾大家知!

 

 

●撰文:Ling ●攝影:Paul Choi (部分相片由受訪者提供)

徐榮爆 包包 十大軼事

1.出世重7.1磅
「佢順產出世,重7磅1,七個月大已經18磅,依家都唔敢磅,應該正常嘅,上次身體檢查,醫生話佢骨骼、各方面都正常。」

2.瞓覺要紗巾蓋頭、拉媽咪頭髮
「我細個都鍾意拉阿媽頭髮,佢呢方面似我。唔知點解佢一蓋住紗巾就好易瞓着,紗巾仔唔怕焗親,佢約兩個月大戒咗夜奶,三個月大就有呢個習慣,11點一瞓到朝早6點。」

3.唔食人奶食奶粉
「佢同哥哥一樣食奶粉大,無食人奶,研究係話飲人奶好啲,但飲人奶媽咪嘅飲食都要好小心。太太生完已經好辛苦,俾佢食番自己鍾意嘅嘢啦,食吓刺身、飲吓酒,可以自由啲,情緒都好啲。」

4.每餐快食6安奶
「即180ml,佢食得好快好急,成日食到濁親,我冇count時間,但一定唔使半個鐘。同我個仔相反,個仔要兩歲先戒到夜奶,又食得慢,所以今次好幸運,食得好瞓得好。」

5.愛吃蘋果茸
「佢依家食緊糊仔喇,將蘋果切粒蒸一蒸攪成蘋果茸,仲有蘿蔔茸、米糊、字母粉佢都鍾意食。」

6.急poo似貓呆樣
「佢眼神一定,好似啲貓想便便咁,我哋就去廁所逗佢屙,『唔…唔…』聲引佢,佢就開始跟我哋啲聲去屙poo。」

7.鍾意睇波
「佢鍾意睇足球比賽,可能佢喺媽咪肚入面已經成日陪我哋去球場睇波,聽到球場啲歡呼聲。依家我哋電視睇波,佢一聽到呢啲聲就定晒型咁望,依家佢識踢波㖭呀,知道足球係用腳踢。」

8.一見哥哥即笑
「哥哥淨係望住唔使做反應, 包包 就識笑,可能知道哥哥鍾意佢鍾意到不得了!」

9.Selfie要睇清楚
「以前同佢影相,引佢視線就會跟住,依家啲人同佢影相,佢要望清楚你係邊個先會影,由頭掃到落腳,好搞笑。」

10.未睇過西醫
「除咗打針之外未睇過醫生,因為媽咪唔想佢食西藥,佢試過發燒,媽咪就幫佢搽精油、按摩,用佢自己方法搞好,touch wood到依家都好健康。」