澳門兩大PLAYHOUSE – 童夢天地 vs 華納滿FUN童樂園

澳門兩大PLAYHOUSE – 童夢天地 vs 華納滿FUN童樂園

同野人去過澳門兩個大型PLAYHOUSE,一個係新濠天地嘅童夢天地(KIDS’CITY);另一個就係今年先開業,喺新濠影滙嘅華納滿FUN童樂園(WarnerBros.™FunZone)。各有各特色,各有各好玩之處。

先講新濠天地嘅童夢天地(KIDS’CITY),要去童夢天地玩,有一樣重要提示一定要分享,就係「小。朋。友。記。住。著。長。袖。衫。褲」!!!!!!!我就係一直傻下傻下唔知呢件事直到要去玩前嘅一晚😛正直夏天,邊有帶長袖衫褲俾野人!!!!!好彩一向都預備長袖睡衣褲俾野人喺酒店著,所以最後兩隻嘢唯有超有趣地著住睡衣套裝入童夢天地玩 😛

1

2

 

雖然如果你有睇呢篇Blog就應該唔會犯呢個錯😛但如果。。。如果真係唔記得帶長衫褲,童夢天地入口位置都有得買(價錢大約$100/衫;$100/褲),但嗰款式。。。就。。。應該野人套睡衣比較好樣😛另外,大人小孩都記住要著「襪」🙂

童夢天地地方相當闊落,一共分幾個部分,最好玩我會揀攀爬區。因為呢度有一般PLAYHOUSE較少見嘅高身旋轉滑梯。

3

4

 

旋轉滑梯外,仲有條直到睇落有80度嘅滑梯!!!!我本來以為野仔細膽會唔玩(因為我咁鐘意玩都有D驚😛)點知哥哥一支箭就衝去瀡,弟弟仲要緊隨其後!!!雖然望落幾危險,但都有做足安全措施。除咗要戴頭盔玩之外,滑梯個入口都有職員「把守」住,職員幫小朋友戴頭盔之餘,都可以防止有小朋友唔覺意瀡落去🙂垂直嘅滑梯,好似快到一秒就瀡完,完全影唔切相😛

5

 

兩款刺激滑梯外,攀爬區內一般繩網陣、波波池、滑梯、射槍都一定有。。。

6

7

8

 

如果年紀比較細嘅小朋友,都有另外一個地方有嘢啱玩

9

10

11

 

定時仲有WORKSHOP玩,做下小手工

12

 

童夢天地除咗照顧小朋友,大人都有幾款電子遊戲一齊開心下🙂

(所有電子遊戲唔使另外收費,但我唔知係咪長期都免費呀😛)

13

14

 

玩到攰,可以休息下、睇下電視。電視區附近有個「大變身」嘅地方,不過野人一向都唔多LIKE呢類裝身遊戲,所以我就冇深究點玩😛

15

16

 

又或者可以食下嘢、飲下嘢,因為場內都有個蚊型小賣部。另外仲有提供水機,洗手位置都好乾淨,感覺好舒服🙂

17

18

19

 

第二個要分享嘅係新濠影滙嘅華納滿FUN童樂園。由於呢個係以華納卡通為背景嘅PLAYHOUSE,所以場內外都有卡通人物俾你影相留念,而且PLAYHOUSE外亦有紀念品店以及主題餐廳。

20

21

 

最初被吸引去「華納」玩,係因為見到有個名為「反斗戰車」嘅揸車設施。野人去邊都會玩揸車,所以諗住一定鍾意玩。點知玩完之後確實幾失望,第一,架車速度算幾慢,毫無揸車樂趣;第二,賽道圈好細;第三,每次有3至4架車同時間玩,但整條賽道就只有「頭尾」兩端可以雙行行車,其他位置都係單行,換言之,如果喺「頭尾」兩端,所有車都冇交換位置,絕大部份時間都係跟住第一個開車嘅小朋友行,亳無「賽車」樂趣🙁

22

 

不過有兩個設施我覺得幾好玩。一個係野人身後嘅攀爬牆,對小朋友嚟講,都算幾高,幾有挑戰性。

23

 

做好安全措施,就可以開始爬。攀爬牆有兩個難度,以野人110CM嘅高度,只可以玩低難度嗰邊。雖則話低難度,但要爬到上頂都幾高。本來野人爬到中段都想放棄,但最後氹氹下,兩個都堅持爬到上頂😛

24

25

 

另一個好玩設施係「華納極速迴旋」,其實係得我同虎爸覺得好玩,野人唔覺好玩,因為佢地怕黑,所以玩咗一次就唔再玩,反而我同虎爸就玩咗幾次😛「華納極速迴旋」其實就係坐上架車,揸住支槍,由架車帶你去唔同地方用支槍對住屏幕完成任務,戴埋3D眼鏡,感覺更迫真🙂

26

 

除咗以上設施,仲有野人每次見到,都一定玩到好興奮嘅「跳樓機」同埋可以不停跑嚟跑去嘅「攀爬迷宮」(大人都可以進入)

27

28

 

華納同童夢天地一樣,都有照顧年紀比較小嘅小朋友專區🙂

29

 

兩個PLAYHOUSE,玩嘅嘢完全唔同,去唒兩個都唔怕重覆

 

童夢天地(KIDS’CITY)

位置:新濠天地三樓

收費:星期一至五–$120首兩小時;星期六、日、公眾假期–$150首兩小時

(一大一小;另加成人$50/位或$70/位)

營業時間:上午10時至晚上8時(週一至週日)

 

華納滿FUN童樂園(WarnerBros.™FunZone)

位置:新濠影滙三樓

收費:$200首兩小時(一大一小;另加成人$75/位)

營業時間:上午10時至晚上7時(週一至週日)

 

溫馨提示!!!!!(重要提示!!!!!!) 兩個PLAYHOUSE都係超時一分鐘都會額外收費!!!!!如果唔想額外俾錢,記住早少少提小朋友離開喇😛

Facebook Image

 

 

更多精選內容