【甜甜地易入口】小朋友版 消暑茶

【甜甜地易入口】小朋友版 消暑茶

剛剛外遊回港,身心都仍然未想去煮飯,不過今日我都要去執藥材去煲涼茶俾小小豬飲,因為連續曬左好幾日,要飲返啲 消暑茶 去消暑先得。

 

其實小小豬真係非常需要消暑,回想返佢上星期五係迪士尼做下小武士時個疑似中暑樣,都真係幾驚嚇(好在休息一陣就冇事,最後仲盡興而回)。另外我地去沖繩玩嗰幾日陽光又十分之好,所以一返香港第一時間就煲啲消暑茶俾小小豬解一解暑啦!

 

原本我都打算煲傳統嗰啲冬瓜消暑茶,不過根據過往經驗,小小豬都係喊住咁飲,因為嗰一啲藥材味小小豬唔鐘意嘛!

 

同藥材店店主傾開,佢就介紹左我煲依個小朋友版消暑茶,雖然係冇傳統嗰啲功效咁強,不過對小朋友嚟講已經係好足夠,最重要係…..入口唔難飲,小朋友實唔抗拒。咁之前店主都介紹過幾款涼茶俾我都係唔錯,所以就聽佢教路執一份俾小小豬試下啦!

 

材料就有蘆根、茅根、淡竹葉、麥冬、澤瀉、薏米、甘草及茯苓(基本上同店員講大約有幾多人飲,佢就會執所需份量),之後就再加啲冰糖調味~
Picture

 

蘆根清熱生津,除煩止嘔;茅根涼血止血,清熱利尿;淡竹葉清熱除煩,通利小便;麥冬養陰潤肺、益胃生津;澤瀉利水滲濕,泄熱;薏米利水滲濕,健脾清熱;甘草益氣補中,清熱解毒;茯苓利水滲濕,健脾安神~
Picture

 

藥材先浸洗最少半小時~
Picture

 

煲內倒入八碗水份量~
Picture

 

然後加入藥材~
Picture

接下頁

待水滾後,轉慢火加蓋煲30分鍾~
Picture

 

然後加入冰糖,再以慢火加蓋煲多15分鍾~
Picture

 

待涼後就可以過濾入樽,就可以飲用啦~
Picture

 

初初都有丁點擔心小小豬唔鐘意飲,不過原來入口都冇乜藥材味,而且可能加左冰糖關係,成杯涼茶都甜甜地,都係唔錯哦。

 

睇嚟炎炎夏日將至,真係要煲多啲俾小小豬飲,等佢減少啲疑似中暑機會呀!

 

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

 

BY 小小豬的成長日誌
Picture

 

關鍵詞
消暑茶

更多精選內容