MK-Pop女神 –  Christy周葆諭

MK-Pop女神 – Christy周葆諭

2015年,一個$900蚊嘅MV,4個服裝、化妝全部錯哂嘅女仔,令大家認識到FFx!點知一日放學,着住校服,素住顏嘅 Christy周葆諭 ,俾狗仔隊撞到,訪問廣為流傳後,令一眾巴打立時眼前一亮,仲將Christy封咗做女神,話佢素顏仲靚過化妝!係囉,17歲,pure已經係無敵啦!

14184

通常見到Christy都係唱唱跳跳,其實佢係一個動靜皆宜嘅學生嚟架,最鍾意就係去圖書館借書,同去自修室,喺運動方面長跑、游水、擲鐵餅,佢都一樣得架!仲係校隊嚟tim!不過自從加入咗FFx之後,佢都唯有減少參與課外活動,咁先可以兼顧到學業同事業丫嘛!

13990

Christy話學校嘅老師同同學都對佢好好,尤其係老師啦!最初入行,的確有俾訓導老師召見,不過老師都只係擔心一個未見過世面嘅學生會俾人呃,而唔係怕佢喺出面會闖禍。而當「MV事件」發生咗之後,的確有好多老師關注,不過佢哋都係擔心Christy會受負面情緒影響,知道佢自己可以應付到之後,仲俾咗好多鼓勵佢tim!

0707

作為一個學生,Christy自問都係一個好學嘅人,佢覺得學習係會令人進步嘅,而喺咁多個科目當中呢,佢最鍾意就係數學喇!唔係因為成績特別好,而係Christy覺得可以去破解一條數學題目,係一件好有挑戰性嘅事,而且可以破解成功,亦都會好有滿足感!

14253

喺DSE放榜之後,Christy希望可以繼續升學,佢最心儀嘅科目就係職業治療喇!因為佢自己本身有讀寫障礙,亦有屋企人係腦退化症同柏金遜症患者,所以好明白患者同身邊嘅人,喺生理同心理上都要承受好大壓力,如果可以成為一個治療師,幫到佢哋跨過難關,Christy就覺得好有意義喇!

13899

Christy本身被譽為FFx當中最索嗰個,而FFx最近又由4人,變成3人組合,呢個「MK-Pop」天團,究竟仲可以走幾遠呢?Christy就話都有唔少記者問過佢會唔會單飛,不過佢話FFx而家3位成員,現時都會各自出show,嚟緊每人又會有一首單曲;需要嘅時候,又會合體變番FFx,所以Christy覺得冇單飛嘅必要,佢同其他兩位成員都已經有默契,相信觀眾都好樂意睇到,佢哋個人同合體時嘅唔同面貌!

 

「學界男女神」唔止要睇盡中學界靚人,仲要殺入大專界!

所以無論你係讀緊中學定大專,只要你認為自己或者身邊嘅同學仔有呢個資格,都可以自薦或推薦俾我哋!

參加方法好簡單,只要將想推薦嘅同學,或者自薦人嘅facebook ,tag喺下面 “Comment”嘅位置; 再將參加者及提名人嘅姓名、年齡、就讀學校、個人專長、聯絡電話,仲有一個月內影嘅近照兩張(全身及正面),喺學界男女神facebook專頁 inbox或電郵到[email protected]俾我哋;如果成功通過編輯部審核,就有機會成為「學界男女神」!

「學界男女神」,等緊你嚟挑戰!

撰文: Joanne

攝影: Clay Lam

拍攝: Anthony Leong

剪接+美術:Ks

Hair+Makeup: [email protected] EM Makeup

 

 

更多精選內容