培育混血B仔 周汶錡:一定要學 廣東話 !

培育混血B仔 周汶錡:一定要學 廣東話 !

要數到今年圈中「最萌BB」,女仔有包包,男仔一定是名模 周汶錡 (Kathy)的中法混血B仔Jacques!轉眼間Jacques已經一歲大,紅卜卜的雙頰成為其標記,獲網民大讚kawaii!Kathy笑稱囝囝一出街就熱到紅卜卜,不過粉絲們不用擔心,Jacques仔身體非常健康,只是容易發熱變紅。

 

自Jacques十個月大起,Kathy驚覺小朋友的發展之快,「頭六個月佢只係食瞓屙,真係同人有交流係呢兩個月開始。」Kathy發現囝囝屬冷靜思考型,對父母的說話會思考過才模仿,而且記性好好,生字教一次就入腦,近兩個月已識講多個單字。做事循序漸進的Kathy,知道囝囝有如此潛質後,正思考與囝囝怎行下一步。

2_275K_family
囝囝Jacques Lepeu 雷棨宇 1歲。最萌星B

從無愛到母愛

「我冇諗過自己會做親子訪問。」Kathy甫坐下笑說。「我以前對小朋友嘅感覺一般,啲朋友抱住BB好開心,咁我就唔係好了解,好少同佢哋玩,唔會好興奮玩追逐。」囝囝Jacques的到來,令她對小朋友的態度180度轉變,「由出世到依家一年,個感覺已經完全唔同,每日都係挑戰,加埋新鮮好奇嘅感覺。由懷孕到依家日日都好開心,呢種開心只有增加冇減少,雖然有時佢會扭計鬧情緒,但個個都有㗎啦!」

4_275K_family
法籍老公不喜歡鋪張,百日宴也只擺了幾圍,邀請最相熟的親友參加。

Kathy與老公Julien於2012年結婚,Julien非常喜歡小朋友,想與老婆製造愛情結晶,Kathy考慮過後,覺得可以嘗試,2015年宣布懷孕。「我係一個循序漸進嘅人,所有嘢唔會跳嚟做,我好慢嘅,做咩都慢慢嚟,結咗婚,老公想要小朋友,OK!下一步係可以嘗試,咁就大咗肚。」 懷孕後的Kathy在準備過程依然慢,一開始只知道要找醫生,直到懷孕五個月才找陪月,「我一直都冇刻意安排,宣布懷孕後啲人問起,我先去搵陪月,樣樣都逐步嚟。到BB出世後,啲人問我會帶個仔去邊度玩,我話喺屋企玩囉!有冇安排去學咩?我冇諗咁多喎,第一步應該識行先啦,咁快去學嘢好辛苦。」

5_275K_family
Kathy透露妹妹周麗淇好喜歡小朋友,湊小朋友亦有一手,但不能叫她快快生BB,「佢成日話玩住你個先囉,又話『個BB係我㗎!』係喇,係你㗎喇!」

想試本地學校

Kathy連懷孕、新手媽咪書籍都沒有翻閱,一來可以邊湊邊學,二來覺得別人的一套,未必自己合用,何必花精神去研讀?到BB出世後,朋友又勸說多看學校資訊,做定入學準備。「每人嘅方法同性格唔同,你嗰套未必啱我用,我想湊佢湊得舒服啲,等囝囝少啲壓力,入唔到呢間咪入第二間囉,總有其他選擇。其實家長咁諗係正常嘅,只係我冇諗咁多,到時先算,哈哈。」

11_275K_family
雖然爸爸在法國讀書長大,但都希望囝囝在本地學校讀書,學好中文,有問題才考慮轉讀法國國際學校。

囝囝現在才一歲,Kathy現階段不會為兒子選校,惟有一個小小要求,「一定要識基本中文,識寫識講,因為廣東話好難,如果小朋友唔去學,大個學就好辛苦,所以我想佢試試local school先。小朋友好似一個空殼,你唔知佢潛質去到邊,你以為佢吸收唔到嘅嘢,可能佢吸收到呢?俾佢嘗試咗先,唔得咪讀其他。」

9.jpg
Jacques識睇人眉頭眼額,如果扭計激嬲媽咪,就會望實媽咪笑去氹她,「估唔到佢咁細個就識呢啲,比我想像中快。」

阿仔記性好

別以為Kathy是香港人,只有她才希望兒子學 廣東話 ,法籍老公對廣東話有更濃厚興趣,但成年人學習新語言始終較困難,他現在能聽少少,講到簡單詞彙,不知何時才能說得一口流利 廣東話 。「我提議過老公不如先學國語,但佢話喺香港居住,點解要學國語呢?又唔係返大陸,佢想學好廣東話。」Kathy笑老公比較另類,絕大部分外國人都想學國語,但他偏偏捨易取難,所以他希望囝囝生活在香港,更應從小學習地道語言。

7_275K_family
Kathy是一個平靜的媽媽,不急於為囝t囝安排一切,按情況慢慢教。

Jacques近兩個月的智力發展,令Kathy驚覺小朋友的潛能無限,尤其是他的模仿能力及記憶力,「A for apple係我第一個教佢嘅字,咁apple係紅色,有次我件tee有兩個A字,我就指住件tee,A is for apple,佢轉頭就指住個A字講『apple』。隔兩日我再着呢件tee,佢再指住我,冇講apple,但我知道佢已經入咗腦。」Kathy知道了囝囝好記性,才去安排下一步的學習,比起急於催谷應來得有效。

懷孕無升Cup keep fit要少甜

身為名模的Kathy,懷孕期間只長胎不長肉,產後立即回復產前的fit爆身形,令一眾媽咪艷羨非常,希望可以請教一下。她透露某程度是遺傳,但懷孕期間亦需做一點工夫,由於陀B時位置偏低,醫生建議不能搭飛機、不能做運動,只能在床上拉筋,增加血液循環,所以她從飲食入手。「懷孕時我都食好多嘢,但就好少食甜嘢,因為我本身唔係好鍾意。我覺得少甜對孕婦好啲,如果孕婦患上妊娠糖尿會好麻煩,所以懷孕後我更加戒甜,對保持身形、對BB發展都有幫助。」好多孕婦均出現水腫,她從頭到尾都沒有,認為清淡飲食至為重要,「鹽分會令人水腫,糖分會增長脂肪,所以飲食清淡會令孕婦健康啲。」 或許Kathy的名模形象,令她一直有意志控制身形,但懷孕對身體的變化難以估計,高大的她早有心理準備變成「巨胸巨籮」,疊埋心水產後減肥,豈料身形沒有「升Cup」。「人哋大肚個胸會升四五Cup,我以為自己會有F Cup,我都想試吓F或G Cup係點,點知我個胸都冇乜大過,升咗一兩Cup咋,生完都還原番,唉,算啦!」

13_2015_09.jpg
2 months
15_2015_11.jpg
4 months
17_275K_family
6 months
19_2016_03.jpg
8 months
21_275K_family
10 months
23_2016_07.jpg
12 months

Jacques的4大趣事

1.最愛車轆
連行李的四個轆都好鍾意,試過媽咪放低行李,Jacques即刻爬去玩轆;他常坐的BB車、學行車、私家車,每次見到也緊盯着車轆,想摸轆多過坐車。難道將來想做整車師傅?

2.討厭換尿片
近月Jacques最討厭換片,一換片就爆喊,每次都要合兩人之力快快手換掉,媽咪也百思不得其解,現在買尿片要選最易穿着的款式。

3.公仔陪瞓
Jacques或許欠缺一點安全感,而媽咪亦不會對他抱睡,所以他每次都愛黐着公仔和攬枕睡覺。

4.抗拒飲水
Jacques只愛飲奶不飲水,完全不想張開嘴,導致便便較乾身,令媽咪大為緊張,婆婆就把水加入少許奶粉,他覺得有奶味就願意飲多少少。

 

撰文:Ling
攝影:Sing Ho(部分相片由受訪者提供)
化妝︰[email protected] Corner
髮型︰[email protected] Culture
服裝︰Claudie Pierlot、Maje

更多精選內容