鄭麗莎 拒減胎  三個缺一不可

鄭麗莎 拒減胎 三個缺一不可

兩屆包山后、世界健體小姐「蜘蛛女」 鄭麗莎 (Lisa),一直希望與金融才俊丈夫Calvin組織大家庭,希望生夠六個!2014年10月率先誕下大仔汪晉頤(晉晉),30歲的Lisa希望猴年追多個「馬騮仔」,諮詢過醫生意見後服食排卵藥,副作用是「多胞症」,果真中招,一索三胞胎,兩女一男,兩年間湊成兩對「好」字!

01

「得知有三個嘅時候好surprise,完全冇預計過,醫生建議過我減胎,因為三胞胎對媽媽同BB都有風險。」Lisa與家人商量後,相信三個BB是緣份,亦有信心自己撐得到,決定全數留下三個寶寶,「要減胎的話,作為媽媽嘅心態都唔係幾好,好似要將佢嘅生命結束,要簽墮胎協議,聽到呢啲就好唔想囉。」

13394098_10153823532988353_277718417254788992_n

Lisa作為專業運動員,平日亦操開健身、攀石、拳擊、泰拳等等,相信自己的運動底子能撐起三胞胎,至今已陀到32周,仍然腰板挺直,三個BB每次產檢都合格,令Lisa放下心頭大石。不過,Lisa的性格坐不定,懷孕期間也經常郁動,懷孕初中期常去公園散步,陪囝囝出沙灘玩,令親友飽食驚風散。經勸喻下,Lisa終乖乖留家養胎,少做運動,暫停工作。「依家最多都係喺屋企行來行去、落街買嘢、同朋友喺附近食飯,有得出街個感覺舒服啲。近期少咗去公園散步喇,淨係陪大仔玩。」

以為陀三胞胎一定好重磅?Lisa只「長胎不長肉」,原本她體重徘徊58至59公斤,而三胞胎分別重近4磅、3磅半及3磅,但她的體重竟然只升了約7公斤,非常奇怪!「醫生話三個BB夾埋10磅,情況良好,加埋胎水佢哋應該佔咗20磅,所以我啲營養係俾佢哋吸晒!」

02

為了補充營養,Lisa經常提醒自己多進食,但個肚頂住個胃,要少食多餐,「半夜會起兩次身搵吓有咩食,食完瞓先覺得安樂。」雖然身體負荷大,亦出現懷孕徵狀如尿頻、爆根、流牙血等,但對她來說不算太辛苦,最重要以正面態度面對問題。「都係BB愈來愈大,我先會出現呢啲情況,證明佢哋喺肚入面健康成長。自己辛苦唔緊要,最緊要佢哋好。」

13592179_10153910521498353_4835949149689910723_n

至於胎動方面,可能三個BB住得迫,只是少少踢肚,「呢度彈一吓,嗰度彈一吓,唔算踢得好勁,似手指劃過咁。」Lisa的孕期已踏入32周,巨肚達42吋,已執好走佬袋準備隨時早產。她目標望陀至34周,每個BB都有4磅,「不過醫生話數字唔係問題,最重要佢哋留喺我個肚耐啲會健康啲。所以28周時打咗強肺針,令BB內臟、器官強壯啲,預防早產。」距離目標周數尚餘兩周,現已密密見醫生產檢,醫生話一feel到有問題就要立即剖腹,「到時由邊度攞出嚟先就邊個做大孖喇!」

 

撰文︰Ling
攝影︰Clay Lam (部分取自受訪者facebook)
化妝: WiL [email protected] MAKEUP
髮型: Wilson [email protected] MAKEUP

更多精選內容