Tokyo Disney Sea

三月去完東京迪士尼，暑假就決定一定要去埋Disney sea ，因為去左幾次東京迪士尼，都未去過Disney Sea，我哋今次神咁早未夠八點半，已經係門口等開門啦！

Jasmine仲六點半就自己彈起身，揀衫着。東京夏天真係好熱，我哋一入門口就排長龍攞Toys story Mania嘅fast pass ， 排到我哋都要等到3至4點先玩得呀。

第一個遊戲Aquatopia，我哋就玩到濕晒身，為炎夏降降溫。

之後就去咗Indiana Jones，真係好似的，好似真係身處險境咁，最後比隱藏嘅影相機影到我地嘅醜態，同埋囡囡Jasmine塞左個頭係老豆心口度嗰個樣，真係好好笑。

由於Jasmine第一次完全匿埋唔敢睇，點知佢話要再玩第二次，因為好早嘅關係，完全唔使排隊，所以我哋就真係玩咗第二次，我哋仲好叻叻咁係隱藏嘅影相機面前笑住做勝利手勢！

呢度嘅爆谷有好多唔同味道，我哋就揀咗白朱古力味，香濃得來唔太甜。

因為東京海洋迪士尼真係有好多香港迪士尼冇嘅遊戲，所以我哋針對冇玩過嘅遊戲， 暢玩一番。

本來以為6歲嘅Jasmine 會驚玩Haunted mansion ，但係佢一啲都唔驚，仲話好似香港迪士尼嘅迷離莊園。

樂園好大，我哋周圍行之後去到一個神秘島，去咗潛艇參觀海底20,000呎，海底世界好靚，Jasmine睇得好開心，仲不停問會唔會見到美人魚Ariel。

食午餐之前，Jasmine換上Princess Jasmine公主服，然後我哋就去咗坐茉莉公主的飛天魔毯，就係呢個時候，我哋比當地日本嘅情侶邀請合照，佢哋係咁講Kawaii ， Jasmine 就用日文回覆多謝。

第一次坐飛毯嘅Jasmine， 仲唱起阿拉丁主題曲A whole new world !

之後去咗阿拉伯海岸，坐船睇阿拉伯嘅木偶，呢個遊戲好似香港迪士尼嘅小小世界，但係日本呢度嘅木偶表情真實好多同埋時間長好多，足足有10分鐘，真係俾我哋好好休息嘆下冷氣。

我哋行下行下，見到有一座兩層高嘅旋轉木馬，因為有兩層嘅關係，有好多座位，完全唔使排隊，就可以揀到心儀嘅迪士尼人物座位。

因為Jasmine太入戲嘅關係，我哋仲特登去咗睇神燈劇場，入場前我哋睇咗啲3D動畫，之後排隊入場繼續睇動畫加真人騷，個故事好好笑，好適合年幼小童。

之後我哋去咗食自助餐，我哋嗌咗支香檳，仲有個15周年嘅記念襟章送添啊！

然後就返轉頭玩兩個攞咗快証嘅遊戲， Tower of Terror .

好似跳樓機咁，好快速好恐怖，完全冇時間思考，就已經高速墜下，我同老公都完全無心理準備 ，嚇個半死，又唔知道個遊戲幾時完，但係Jasmine竟然又係一啲都唔驚，仲話要玩多次添啊，最後媽咪爹哋都話太驚唔玩啦!

咁就去到全日最後一個遊戲，就係東京海洋迪士尼最Hit嘅Toy story Mania ，由八點半一入場，到走嘅時候大約4點先玩得，但真係好值得，個遊戲都算幾長，一邊佈置顏色豐富，又好靚，戴上3D眼鏡瞄準發射，好緊張好刺激，我仲攞咗同組嘅最高分添啊！不枉我哋等左咁多個鐘，真係好值得玩。

日本迪士尼同歐洲嘅迪士尼一樣，有好多香港冇嘅迪士尼茉莉公主產品架，我地個小公主Jasmine都睇到開心大叫呀。

呢一D咁罕有嘅迪士尼貨品，已經係我家小公主嘅收藏品啦。

臨走前，仲係門口附近見到高飛狗，本來好多遊客圍住高飛想影相，但係高飛見到小公主出巡，就拖住小公主係廣場度行咗一個圈，最後仲企定定俾媽咪影相，Jasmine 真是個幸運兒！

我哋買咗好多手信，就出發離開玩左八個鐘嘅海洋迪士尼，我同Daddy都覺得唔夠喉，計劃下一次要再嚟迪士尼酒店住時，順便玩返兩日一夜，玩遍兩個樂園，一次過滿足晒兩個願望！

https://www.facebook.com/BonnieWongJasmineRawlinson