【滋潤 祛濕 之選】無花果雪梨薏米水

【滋潤 祛濕 之選】無花果雪梨薏米水

小小豬唔知做乜依幾日個咀角爆擦,係呀….正常都係應該秋天先會爆擦,唔知點解佢咁奇怪炎炎夏日嚟爆。

緊係啦,依隻豬仔平日都唔算多飲水,加上身體又成日出汗,所以整個人都唔夠水,所以就煲滋潤 祛濕 嘅無花果雪梨薏米水俾隻豬仔潤返下啦!

 

無花果我多數用嚟煲湯,用嚟調味為主。不過原來用嚟做主角都一樣係好正,因為無花果係好益,可以補血氣、強體質、滋潤喉嚨、幫助皮膚鎖水、祛水腫 同埋潤腸減少便秘。

無花果再加埋雪梨就夠晒滋潤,再加埋薏米一齊,就可以有埋祛濕同祛水腫,真係飲完可以即刻潤返晒,飲完仲唔即刻靚返晒。

材料:雪梨4個、無花果6粒、生薏米及熟薏米各半碗~
Picture

平時我煲湯就用普通細細粒嗰啲無花果,不過我今次就買左大大粒嗰啲土耳其無花果,咁煲出嚟嘅味道就會甜啲,咁就可以連冰糖都唔洗加呀~

Picture

生熟薏米先浸1小時;無花果略沖洗後切開一半(咁就可以易啲出味);雪梨去芯切件~
Picture

煲內放入3水,然後將所有材料加入煲內~
Picture

待水滾後,用大火加蓋煲約15分鐘~
Picture

然後轉慢火加蓋煲多一個鐘~
Picture

煲好之後就可以試下味,如果有需要就可以加少少冰糖調味。不過我就覺得只係用無花果都夠甜,所以就冇加冰糖都好好飲~
Picture

有小小豬鐘意飲嘅雪梨水,加上味道又甜甜地,依隻豬仔都好鐘意飲呀~
Picture

除左滋潤之外,平日食得多熱氣嘢、捱夜或睡眠不足(即係我啦),都好啱飲呀!

 

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

 

BY 小小豬的成長日誌
Picture

更多精選內容